நெல் கொள்முதல் நிலையங்களை திறக்க ஒன்றியக் குழுக் கூட்டத்தில் வலியுறுத்தல்

நெல் கொள்முதல் நிலையங்களை திறக்க வேண்டும் என வேதாரண்யம் ஒன்றியக் குழுக் கூட்டத்தில் வலியுறுத்தப்பட்டது.

வேதாரண்யம் ஒன்றியக் குழுக் கூட்டம், அதன்தலைவா் கமலா அன்பழகன் தலைமையில் வெள்ளிக்கிழமை நடைபெற்றது. இதில், உறுப்பினா்கள் பேசியது:

வைத்தியநாதன்: தானிக்கோட்டம் ஊராட்சி வானங்கோட்டகம் ஏரியை தூா்வாரி சீரமைக்க வேண்டும்.

வேதரத்னம்: பழுதடைந்துள்ள அரசு கட்டடங்கள் மற்றும் புயல் பாதுகாப்பு மையங்களை சீரமைக்க வேண்டும்.

ராஜசேகரன்: வேதாரண்யம் பகுதியில் நெல் அறுவடை பணிகள் தொடங்கியுள்ள நிலையில் அனைத்து அரசு நெல் கொள்முதல் நிலையங்களையும் உடனடியாகத் திறக்க வேண்டும்.

கண்ணகி: ஆயக்காரன்புலம் ஊராட்சி பகுதியில் மின்மயானம் அமைத்து தரவேண்டும்.

இதேபோல, தங்களின் வாா்டுகளுக்குள்பட்ட பிரச்னைகள் குறித்து உறுப்பினா்கள் பேசினா்.

தலைவா் கமலா அன்பழகன்: அரசிடமிருந்து வரும் நிதி ஆதாரங்களின் அடிப்படையில் அனைத்து ஊராட்சிகளுக்கும் வளா்ச்சி பணிகள் மேற்கொள்ள நடவடிக்கை எடுக்கப்படும் என்று தெரிவித்தாா்.

இதில், வட்டார வளா்ச்சி அலுவலா்கள் ராஜூ, பாஸ்கரன் ஆகியோா் பங்கேற்றனா்.