Enable Javscript for better performance
காவிரி விவகாரம்: அரசியல் கட்சியினர், ஆசிரியர் கூட்டணி ஆர்ப்பாட்டம்: ரயில் மறியலில் ஈடுபட முயன்ற 146- Dinamani

சுடச்சுட

    

    காவிரி விவகாரம்: அரசியல் கட்சியினர், ஆசிரியர் கூட்டணி ஆர்ப்பாட்டம்: ரயில் மறியலில் ஈடுபட முயன்ற 146 பேர் கைது

    By DIN  |   Published on : 04th April 2018 01:00 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    காவிரி மேலாண்மை வாரியம் அமைக்க வலியுறுத்தி, திருவாரூரில் அரசியல் கட்சியினர், தமிழ்நாடு தொடக்கப்பள்ளி ஆசிரியர் கூட்டணியினர் செவ்வாய்க்கிழமை ஆர்ப்பாட்டத்தில் ஈடுபட்டனர்.
    இக்கோரிக்கையை வலியுறுத்தி ரயில் மறியலுக்கு முயன்றதாக  146 பேர் முன்கூட்டியே கைது செய்யப்பட்டனர்.

    அரசியல் கட்சியினர் ஆர்ப்பாட்டம்...
    திருவாரூர் தலைமை தபால் நிலையம் எதிரில் நடைபெற்ற ஆர்ப்பாட்டத்துக்கு இந்திய கம்யூனிஸ்ட் கட்சியின் சார்பு அமைப்பான தமிழ்நாடு விவசாயிகள் சங்க மாநிலப் பொதுச் செயலர் பி.எஸ். மாசிலாமணி தலைமை வகித்தார். திமுக நகரச் செயலர் பிரகாஷ், ஒன்றியச் செயலர்கள் சேகர், தேவா, இந்திய கம்யூனிஸ்ட் கட்சியின் நகரச் செயலர் மாரியப்பன், விவசாயத் தொழிலாளர் சங்க நிர்வாகக் குழு உறுப்பினர் எம். நாகராஜன், மார்க்சிஸ்ட் கம்யூனிஸ்ட் கட்சியின் மாவட்டச் செயலர் ஜி. சுந்தரமூர்த்தி, மனிதநேய மக்கள் கட்சி நிர்வாகி மஜூல் ஹக், காவிரி விவசாயிகள் பாதுகாப்பு சங்கத் தலைவர் சேரன் உள்ளிட்ட பலர் பங்கேற்றனர்.


    தமிழ்நாடு தொடக்கப்பள்ளி ஆசிரியர் கூட்டணி  ஆர்ப்பாட்டம்....
    திருவாரூர் பேருந்து நிலையம் அருகில் தமிழ்நாடு தொடக்கப்பள்ளி ஆசிரியர் கூட்டணி சார்பில் நடைபெற்ற ஆர்ப்பாட்டத்துக்கு அதன் மாவட்டத் தலைவர் இரா. முருகேசன் தலைமை வகித்தார். மாவட்டப் பொருளாளர் ஆ.சுபாஷ் முன்னிலை வகித்தார். கோரிக்கைகளை வலியுறுத்தி மாவட்டச் செயலாளர் ஆர். ஈவேரா, ஓய்வு பிரிவு அணி மாவட்டச் செயலாளர் நா. மதிவாணன் ஆகியோர் பேசினர். 
    இதில் மாநில செயற்குழு உறுப்பினர்கள் கிருஷ்ணமூர்த்தி,  ஜூலியஸ்,  அகில இந்திய பொதுக்குழு உறுப்பினர் ஜோன்ஸ்ஐன்ஸ்டீன்,  மாவட்ட நிர்வாகிகள் சத்தியநாராயணன்,  ஸ்டாலின்,  வடுகநாதன் உள்ளிட்ட பலர் பங்கேற்றனர்.  


    ரயில் மறியலுக்கு முயன்ற 146 பேர் கைது...
    இதேபோல், திருவாரூரில் ரயில் மறியல் செய்யக்கூடும் என்பதற்காக மனிதநேய ஜனநாயக கட்சி உறுப்பினர்கள் 29 பேர், தமிழக காவிரி விவசாயிகள் சங்க உறுப்பினர்கள் 8 பேர் என 37 பேர் கைது செய்யப்பட்டனர். பின்னர் இவர்கள் விடுவிக்கப்பட்டனர். 
    இதேபோல், செவ்வாய்க்கிழமை மாலை திருவாரூர் அருகே அடியக்கமங்கலத்தில் மனிதநேய மக்கள் கட்சியினர் ரயில் நிலைய தண்டவாளத்தில் அமர்ந்து முழக்கங்களை எழுப்பினர். காரைக்கால்-எர்ணாகுளம் விரைவு ரயிலை மறிக்கும் வகையில் நடைபெற்ற இப்போராட்டத்தில், ரயில் வருவதற்கும் முன்பே போராட்டக்காரர்கள் 50 பேர் கைது செய்யப்பட்டு தனியார் மண்டபத்துக்கு கொண்டு செல்லப்பட்டனர். பின்னர், அனைவரும் விடுவிக்கப்பட்டனர்.
    இதேபோல், நீடாமங்கலத்தில் ரயில் மறியலில் ஈடுபட முயன்ற காவிரி விவசாயச் சங்கத்தினர் மற்றும் அம்மா மக்கள் முன்னேற்றக் கழகத்தினர் 59 பேரை போலீஸார் கைது செய்தனர்.


    நீதிமன்ற புறக்கணிப்பு...
    இதேபோல் காவிரி மேலாண்மை வாரியம் அமைக்க வலியுறுத்தி திருவாரூரில் வழக்குரைஞர்கள் நீதிமன்ற புறக்கணிப்பில் ஈடுபட்டனர்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai