சுடச்சுட

    

    கேரளத்துக்கு மணல் கடத்தப்படுவதை தடுக்க ரோந்துப் பிரிவு அமைக்கப்படுமா? சமூக ஆர்வலர்கள்  எதிர்பார்ப்பு

    By DIN  |   Published on : 16th June 2018 12:46 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    நாகப்பட்டினம், திருவாரூர் மாவட்ட கிழக்கு கடற்கரை சாலை வழியே கேரளத்துக்கு மணல் கடத்தப்படுவதை தடுக்க   வருவாய்த் துறையினர், காவல் துறையினரைக் கொண்ட ரோந்து பிரிவு ஏற்படுத்த வேண்டும் என்பது சமூக ஆர்வலர்களின் எதிர்பார்ப்பாக உள்ளது.
    தமிழகத்தில் தற்போது மணல் தட்டுப்பாடு உள்ளதால், அதன் விலை உயர்ந்து வருகிறது. திருவாரூர் மாவட்டம், முத்துப்பேட்டை பகுதி கடற்கரை மற்றும் கடல் வழியாக கடத்தல் தொழில் பல காலமாகவே கொடிகட்டிப் பறந்தது. இடையில், கடும் கட்டுப்பாட்டினால் தமிழகம் வழியாக கடத்தல் சம்பவங்கள் நடைபெறாத நிலையில், கட்டுப்பாடுகள் தளர்ந்ததையடுத்து மீண்டும் தங்கக் கடத்தல் வெகு ஜோராக நடைபெற்று வருகிறது.
    அண்மையில்,  சொகுசு காரில் தங்கக் கட்டிகள் கடத்திச் சென்றவர்கள் கோபாலசமுத்திரம் கடலோர காவல் சோதனைச் சாவடியில் பணியில்  இருந்த சிறப்பு காவல் உதவி ஆய்வாளரை மிரட்டிவிட்டு, தப்பிய சம்பவமும் நடந்துள்ளது.
    மேலும்,  கடலோர சோதனை சாவடிகளில் முறையான கண்காணிப்பு இல்லாத  சூழலிலும், கடற்கரை பாதுகாப்பு குழும காவலர்கள் பணியமர்த்தப்படாத நிலையிலும், மாவட்ட காவல் நிலையங்களில் பணியாற்றும் போலீஸாரை, தண்டனை போல இந்த காவல் சோதனை சாவடிகளில் கடமைக்கு பணியமர்த்துகின்றனர். 
    இது கடத்தல்காரர்கள் எளிதில் தப்பிச்செல்ல வசதியாக உள்ளது. இதனால் நாகை, கடலூர் மாவட்டங்களில் இருந்து சவுடுமண் என உரிமம் பெற்று, கிழக்கு கடற்கரை சாலை வழியாக கேரளத்துக்கு மணல் கடத்திச் செல்கின்றனர். மேலும், அந்த உரிமத்தில் தேதி, கிழமைகளை  நவீன முறையில் திருத்தம் செய்தும், எத்தனை முறை வேண்டுமானாலும் கொண்டு செல்லும் நிலையும் உள்ளது.
    நான்கு கடத்தல் மணல் லாரிகள் திருவாரூர் மாவட்ட நெடுஞ்சாலை ரோந்துப் பிரிவு போலீசாருக்கு கையூட்டு கொடுத்து விட்டு தப்பிச்சென்றதை,  வருவாய்த் துறையினர் தஞ்சை மாவட்ட எல்லையில் பறிமுதல் செய்த சம்பவமும் அண்மையில் நடந்துள்ளது. சில  கடத்தல் மணல் லாரிகள் பெயரளவுக்குப் பிடிக்கப்படுகின்றன. பல கடத்தல் லாரிகள் சுலபமாக தப்பிச்செல்லும் நிலை தொடர்கிறது.
    பாரதப் பிரதமரின் சொந்த வீடு  திட்டம், தூய்மை பாரத இயக்கம் சார்பில் தனிநபர் இல்லக்கழிவறை கட்டும் பணிகள் மணல் தட்டுப்பாட்டால் கானல் நீராகவே உள்ளன. 
    அதிமுக  ஆட்சிப் பொறுப்பேற்ற 6 ஆண்டுகளில் மணல் கடத்தல் தொடர்பாக 48 ஆயிரம் லாரிகள் பறிமுதல் செய்யப்பட்டு ரூ.120 கோடி அபராதம்  வசூலிக்கப்பட்டுள்ளதாக  சட்டப்பேரவையில் தமிழக முதல்வர் எடப்பாடி கே. பழனிசாமி தெரிவித்திருப்பது மணல் கடத்தல் சம்பவங்களை  உறுதி செய்யும் வகையில் உள்ளது.  இது ஒரு பானை சோற்றுக்கு ஒரு சோறு பதம் என்ற அளவிலேயே உள்ளது.
     இந்த கணக்குப்படி பார்த்தால் ஆயிரக்கணக்கான கோடி ரூபாய் மதிப்புள்ள மணல் கடத்தல் நடைபெற்றது ஊர்ஜிதமாகிறது.  எனவே மணல்,  தங்கம் கடத்தலைத் தடுக்க கடலோர சோதனைச்சாவடிகளைப் பலப்படுத்துவது அவசியமாகிறது.
     எனவே, காவல்துறை இயக்குநர் உரிய  ஆய்வு மேற்கொண்டு, கிழக்கு கடற்கரை சாலை வழியே  மணல் கடத்தப்படுவதைத் தடுக்க காவல்துறை,  வருவாய்த் துறை இணைந்த மணல் கடத்தல் தடுப்புப் பிரிவை ஏற்படுத்தி, சோதனைச் சாவடிகளையும் பலப்படுத்த வேண்டும் என சமூக ஆர்வலர்கள் கோரிக்கை விடுத்துள்ளனர்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai