சுடச்சுட

    

    நீட் தேர்வெழுத கேரளத்துக்கு சென்றபோது தந்தையை இழந்த மாணவருக்கு கல்வி உதவித்தொகை: அமைச்சர் ஆர்.காமராஜ் வழங்கினார்

    By DIN  |   Published on : 18th June 2018 01:17 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    திருத்துறைப்பூண்டி அருகே, நீட் தேர்வெழுத மகனை கேரளத்துக்கு அழைத்து சென்றபோது உயிரிழந்தவரின் குடும்பத்துக்கு ஞாயிற்றுக்கிழமை ஆறுதல் கூறிய தமிழக உணவுத் துறை அமைச்சர் ஆர். காமராஜ், அந்த மாணவரின் கல்வி செலவுக்காக அதிமுக சார்பில் ரூ. 2 லட்சம் நிதியுதவி அளித்தார்.
    திருத்துறைப்பூண்டி வட்டம், விளக்குடியைச் சேர்ந்தவர் கிருஷ்ணசாமி. இவரது மகன் கஸ்தூரி மகாலிங்கம் நீட் தேர்வெழுத கேரள மாநிலம் எர்ணாகுளத்துக்குச் சென்றபோது, உடன் கிருஷ்ணசாமியும் சென்றார். அங்கு, கிருஷ்ணசாமி மாரடைப்பால் உயிரிழந்தார். 
    இவரது குடும்பத்துக்கு ஞாயிற்றுக்கிழமை நேரில் சென்று ஆறுதல் கூறிய தமிழக உணவுத் துறை அமைச்சர் ஆர். காமராஜ், மாணவர் கஸ்தூரி மகாலிங்கம் கல்விச் செலவுக்காக அதிமுக சார்பில் ரூ. 2 லட்சத்துக்கான காசோலையை வழங்கினார்.
    பின்னர், அவர் கூறியது:
    மாணவர் கஸ்தூரி மகாலிங்கம் நீட் தேர்வில் 84 மதிப்பெண்கள் பெற்றுள்ளார்,  இதனால், நிகழாண்டு அவரால் மருத்துவப் படிப்பில் சேரமுடியவில்லை. இருப்பினும்,  நீட் தேர்வுக்கான பயிற்சி பெற்று, அடுத்த ஆண்டு தேர்வில் வெற்றி பெறுவேன் என உறுதியுடன் உள்ளார். அதன் அடிப்படையில், அவரது கல்வி செலவுக்காக அதிமுக சார்பில் ரூ. 2 லட்சம் வழங்கியுள்ளோம். 
    நீட் தேர்வில் தமிழகத்துக்கு விலக்களிக்க வேண்டும் என்பதுதான் அரசின் விருப்பம் என்றாலும், இந்தியா முழுவதும் இத் தேர்வு நடப்பதால், இனிவரும் காலங்களில் தமிழக மாணவர்கள் தமிழகத்திலேயே நீட் தேர்வு எழுத கோரிக்கை வைத்துள்ளோம். அனைத்து அரசுப் பள்ளி மாணவர்களுக்கும் நீட் தேர்வுக்கான பயிற்சியளிக்க நடவடிக்கை எடுக்கப்பட்டு வருகிறது. தனியார் மருத்துவக் கல்லூரிகளில் கூடுதல் கட்டணம் வசூலித்தால் உரிய நடவடிக்கை எடுக்கப்படும் என்றார்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai