ஆசிரியர் கலந்தாய்வை முறையாக நடத்தக் கோரி ஆர்ப்பாட்டம்

திருவாரூரில் ஆசிரியர்கள் பணியிட மாறுதல் கலந்தாய்வை முறையாக நடத்தக் கோரி ஆசிரியர்கள் புதன்கிழமை ஆர்ப்பாட்டத்தில் ஈடுபட்டனர். 
திருவாரூரில் தனியார் பள்ளியில் பட்டதாரிஆசிரியர்கள் பணியிட மாறுதல் கலந்தாய்வு நடைபெற்று வருகிறது. 2-ஆம் நாளான புதன்கிழமை 300-க்கும் மேற்பட்ட ஆசிரியர்கள் கலந்தாய்வில் பங்கேற்றிருந்தனர். நீண்ட நேரமாகியும் உரிய அலுவலர்கள் வராததால் கலந்தாய்வு தொடங்கவில்லை. பின்னர், நீண்ட நேரத்துக்குப் பிறகு பணியிடங்கள் காலியில்லை என தகவல் பலகையில் நோட்டீஸ் ஒட்டப்பட்டது. இதையறிந்து, ஆசிரியர்கள் கலந்தாய்வுக்கு அழைப்பு விடுத்துவிட்டு காலிப் பணியிடங்களை மறைத்து முறைகேடுகளில் அலுவலர்கள் ஈடுபடுவதாக குற்றம்சாட்டியும், ஆசிரியர் காலிப் பணியிட மாறுதல் கலந்தாய்வை முறையாக நடத்த வேண்டும் என்ற கோரிக்கையை வலியுறுத்தி 300-க்கும் மேற்பட்ட ஆசிரியர்கள், கலந்தாய்வு மையம் அருகில் ஆர்ப்பாட்டத்தில் ஈடுபட்டனர்.