Enable Javscript for better performance
நாட்டுத் துப்பாக்கி வெடித்ததில் சகோதரர்கள் இருவர் காயம்- Dinamani

சுடச்சுட

    

    நாட்டுத் துப்பாக்கி வெடித்ததில் சகோதரர்கள் இருவர் காயம்

    By DIN  |   Published on : 24th August 2019 07:00 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    திருவாரூர் மாவட்டம், மன்னார்குடி அருகே வெள்ளிக்கிழமை இருசக்கர வாகனத்தில் சென்ற நரிக்குறவர் தவறி விழுந்ததில் அவர் வைத்திருந்த நாட்டுத் துப்பாக்கி வெடித்ததில், சாலையில் சைக்கிளில் சென்றுகொண்டிருந்த சகோதரர்கள் இருவர் காயமடைந்தனர்.
    மன்னார்குடியை அடுத்த பாமணி நரிக்குறவர் குடியிருப்பைச் சேர்ந்தவர் ஜி. சுந்தரம் (41). இவர், தனது மாமனார் ஆர். தங்கையனுக்குச் சொந்தமான உரிமம் புதுப்பிக்கப்படாத நாட்டுத் துப்பாக்கியை எடுத்துக்கொண்டு, இருசக்கர வாகனத்தில் சென்றுகொண்டிருந்தார். அவர், தென்கரைவயல், செருமங்கலம் சாலையில் சென்றபோது,  முன்னால் சென்ற சைக்கிளை முந்திச் செல்ல முயன்றாராம். அப்போது, நிலைதடுமாறி சுந்தரம் கீழே விழுந்ததில் அவர் வைத்திருந்த துப்பாக்கியின் விசை அழுத்தப்பட்டு, குண்டு பாய்ந்ததாகக் கூறப்படுகிறது.
    இதில், சைக்கிளில் சென்றுகொண்டிருந்த தென்கரைவயல் பிரதான சாலையைச் சேர்ந்த தமிழ்ச் செல்வன் மகன்கள் பாலமுரளி (14), செல்வபாலாஜி (12) ஆகியோர் மீது குண்டு பாய்ந்ததில் இருவரும் காயமடைந்தனர். அப்போது, அந்த வழியாக வந்தவர்கள், சுந்தரத்தை தாக்கினராம். இதனால், அவரும் காயமடைந்தார்.
    இதுகுறித்து தகவலறிந்த மன்னார்குடி ஊரக காவல் நிலையப் போலீஸார் நிகழ்விடத்துக்கு வந்து, 3 பேரையும் சிகிச்சைக்காக மன்னார்குடி அரசு மருத்துவமனையில் சேர்த்தனர்.
     பின்னர், பாலமுரளி, செல்வபாலாஜி ஆகியோர் தீவிர சிகிச்சைக்காக தஞ்சை மருத்துவக் கல்லூரிக்கு அனுப்பிவைக்கப்பட்டனர். 
    இந்ச சம்பவம் தொடர்பாக, நரிக்குறவர் காலனியைச் சேர்ந்த சுந்தரத்தை போலீஸார் கைது செய்தனர். குண்டு பாய்ந்து காயமடைந்த சகோதரர்களில் பாலமுரளி மன்னார்குடியில் உள்ள தனியார் பள்ளியில் 9 -ஆம் வகுப்பும், செல்வபாலாஜி தென்கரைவயலில் உள்ள அரசுப் பள்ளியில் 7-ஆம் வகுப்பும் படித்து வருகின்றனர்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai