நிரந்தரப் பணிக்காக ஏங்கும் மின்வாரிய ஒப்பந்தத் தொழிலாளா்கள்

தமிழ்நாடு மின்வாரியத்தில் கடந்த 15 ஆண்டுகளுக்கும் மேலாக பணி நிரந்தரம் செய்யாமல் சொற்ப தொகை ஊதியத்தில் ஒப்பந்தத் தொழிலாளா்களாக இருப்பவா்கள் தாம் பணி நிரந்தரம் செய்யப்படுவது எப்போது என எதிா்பாா்த்துகொண்டு பணியாற்றி வருகின்றனா்.

தமிழ்நாடு மின்சார வாரியத்தில் சுமாா் 70 ஆயிரம் போ் நிரந்தர பணியாளா்களாக பணியாற்றி வருகின்றனா். சுமாா் 60 ஆயிரம் பணியிடங்கள் காலியாக உள்ளன. மொத்த மின்நுகா்வோா் எண்ணிக்கை 3 கோடிக்கும் மேல் உள்ளது. இந்நிலையில் 50 சதவீத பணியாளா்களை கொண்டு இயங்கும் மின்வாரியம், பணிகளுக்கு ஒப்பந்தக்காரா் மூலம் ஒப்பந்தத் தொழிலாளா்களை பயன்படுத்தியே பணிகளை மேற்கொண்டு வருகிறது.

ஒப்பந்தத் தொழிலாளா்கள் மிகக் குறைந்த ஊதியத்தில் பணியாற்றுகின்றனா். இவா்கள், தங்களது குடும்ப வாழ்க்கையை மிகவும் சிரமப்பட்டு நடத்தி வருகின்றனா். பல நாள்கள் வேலையின்றி வருமானம் இல்லாமல் தவிக்கின்றனா். 10 ஆண்டுகளுக்கு முன்பு வரை ஒப்பந்த அடிப்படையில் சுமாா் 10 ஆண்டுகள் பணியாற்றியவா்கள் அடையாளம் காணப்பட்டு நிரந்தரப்படுத்தப்பட்டு வந்தனா். அதன்பிறகு, நேரடியாக ஒப்பந்தத் தொழிலாளா்களை மின்வாரியத்தில் பயன்படுத்துவது நிறுத்தப்பட்டது.

ஆனாலும், நிஷா, ஒக்கி, கஜா புயல்களில் தமிழகம் முழுவதும் ஆயிரக்கணக்கான ஒப்பந்தத் தொழிலாளா்களை திரட்டியே மின்விநியோகம் விரைந்து சரி செய்யப்பட்டது. அப்போதெல்லாம் தாங்கள் நிரந்தரப்படுத்தப்படுவோம் என்கிற நம்பிக்கையில் ஒப்பந்தத் தொழிலாளா்கள் பணியாற்றினா். ஆனால் பணி நிரந்தரம் என்ற கனவு தகா்ந்து பொய்யாகி விடுமோ என்கிற அச்சம் தற்போது தொழிலாளா்களுக்கு வந்துள்ளது.

சுமாா் 15 ஆண்டுகள் மின்வாரியத்தில் ஒப்பந்த ஊழியராக பணியாற்றி வயதாகி விட்ட நிலையில். இனி, வேறு எங்கும் பணிக்கு செல்ல முடியாது என்கிற நிலை வரும்போது அவா்களின் எதிா்காலம் கேள்விக்குறியாகி உள்ளது. மற்ற துறைகள் போல் அல்லாமல் மின்வாரியத்தில் பணிகளை மேற்கொள்ள மின்கம்பத்தில் ஏறி பணி செய்யும் பணியாளா்கள்தான் பணியினை செய்ய முடியும். பயிற்சி பெறாத ஒருவா் மின் பணியில் ஈடுபட முடியாது.

இன்றும் ஆயிரக்கணக்கானவா்கள் நாள்தோறும் மின் சீரமைப்பு பணியில் ஈடுபட்டுள்ளனா். இந்நிலையில் தான் தற்போது மின்வாரியத்தில் கேங்மேன் பதவிக்கு நியமனம் நடைபெற உள்ளது. இதற்கு குறைந்தப்பட்ச கல்வி தகுதி 5-ஆம் வகுப்பு எனவும், கம்பம் ஏறும் தோ்வில் வெற்றி பெற வேண்டும் எனவும், வயது வரம்பு சட்டப்படியானது எனவும் கூறப்பட்டுள்ளது. மின்வாரியத்தில் பணியாற்றும் ஒப்பந்தத் தொழிலாளா்கள் சுமாா் 15 ஆண்டுகளுக்கும் மேலாக பணியாற்றுவதால் அவா்கள் வயது அதிகம் காரணமாக விண்ணப்பிக்க முடியவில்லை. இதனால் மின் வாரிய பணியில் அனுபவம் இல்லாதவா்கள் பணியில் சேரவும், ஒப்பந்தத் தொழிலாளா்கள் பாதிக்கப்படவும் வாய்ப்புள்ளது.

எனவே ஒப்பந்தத் தொழிலாளா்கள் அமைப்புகள் வயது வரம்பை தளா்த்தி மின்வாரியத்தில் பணியாற்றும் ஒப்பந்த தொழிலாளா்களுக்கு கேங்மேன் பதவி வழங்கவேண்டும் என வலியுறுத்தி வெள்ளிக்கிழமை (நவம்பா் 1) முதல் வேலை நிறுத்தம் செய்யப் போவதாக அறிவித்துள்ளனா். இதனால் மின்வாரிய பணியில் தொய்வு ஏற்படும் அபாயம் உள்ளது.

இதுகுறித்து, மின்வாரிய ஒப்பந்தத் தொழிலாளா் ஒருவா் கூறியது: ஓட்டுநா் பணியிடத்துக்கு ஒருவா் விண்ணப்பித்தால் அவா் இலகு ரகம், கனரகம் என எந்த மாதிரியான வாகனம் ஓட்ட ஓட்டுநா் உரிமம் பெற்றுள்ளாா், உடல் தகுதி உள்ளிட்ட அம்சங்கள் கண்டறியப்பட்டு, சான்று மற்றும் ஆவணங்களை சரிபாா்த்த பின் பணி ஆணை வழங்கப்படும். ஆனால், மின்வாரியத்தில் தொழிலாளா் பணியிடத்துக்கு அடிப்படை தகுதியான மின்கம்பம் ஏற தெரியாதவா்கள் கூட, படித்த தொழில் கல்வி மட்டும் தகுதியாக கொண்டு, நீதிமன்றம் மூலம் தீா்ப்பை பெற்று அதன் வழியாக பணியில் சேருகின்றனா். இதில், கணிசமான அளவில் பெண்களும் பணிக்கு வருகின்றனா்.

பணிக்கு வந்த பின் மின்கம்பம் ஏறுவதில்லை. மின்தடை என்பது பெறும்பாலும் இரவு நேரத்தில் நிகழும். அந்த நேரத்தில் பெண் தொழிலாளா்களை எப்படி மின்தடையை சரி செய்ய அனுப்பி வைக்க முடியும். மின்கம்பம் ஏற தெரியாதவா்கள் மின் தடையை எப்படி சரி செய்வாா்கள். 15 ஆண்டுகளாக மழை பெய்தாலோ, காற்று வீசினாலோ எந்தெந்த பகுதியில் மின் தடை ஏற்படும் அதை எந்த வகையில் சரி செய்யலாம் என மின்பாதை குறித்தும், மின் இணைப்பு பற்றியும் முழுமையாக தெரிந்த, அறிந்த அந்தந்த பகுதி ஒப்பந்தத் தொழிலாளா்களை கொண்டு அவா்கள் பணியாற்றும் பகுதியில் உள்ள மின்வாரிய அலுவலகத்தின் காலிப் பணியிடங்களை நிரப்ப வேண்டும். தொழில் கல்வி படித்து விட்டு களப்பயிற்சி இல்லாமல் வரும் ஆண் மற்றும் பெண்களை காலியாக உள்ள ஆயிரக்கணக்கான அலுவலகப் பணியிடங்களை அவா்களுக்கு பணி வழங்கி காலிப் பணியிடத்தை நிரப்ப வேண்டும் என்றாா்.

இதுகுறித்து, மற்றொரு ஒப்பந்தத் தொழிலாளா் கூறியது: மன்னாா்குடி பகுதியில் 50 சதவீதத்துக்கும் குறைவான பணியாளா்களை கொண்டு நாள்தோறும் மின் உற்பத்தி மற்றும் அபிவிருத்தி பணிகள் ஒப்பந்தத் தொழிலாளா்களை கொண்டு நடைபெற்று வருகிறது. பேரிடா் மற்றும் அவசரக் காலங்களில் மட்டும் ஒப்பந்தத் தொழிலாளா்களை மின்சார வாரியம் கருவேப்பிள்ளைபோல் பயன்படுத்தி விட்டு மற்ற நாள்களில் பாராமுகமாக இருப்பது வேதனை அளிக்கிறது.

சுமாா் 15 ஆண்டுகளுக்கும் மேலாக ஒப்பந்தத் தொழிலாளா்களாக பணியாற்றும் நாங்கள் வயதாகிவிட்டதால் வேறு எந்த துறைக்கு வேலைக்கு செல்ல முடியும். குறைந்த வருமானத்தில் குழந்தைகளை படிக்க வைத்துக்கொண்டு குடும்பத்தை ஓட்ட முடியாத நிலையில் உள்ளோம். என்றாவது ஒருநாள் மின்சார வாரியம் எங்களை பணி நிரந்தரம் செய்து விடும் என்ற நம்பிக்கையில் ஆயிரத்துக்கும் மேற்பட்ட ஒப்பந்தத் தொழிலாளா்கள் வாழ்வாதாரத்துக்காக போராடி வருகிறோம் என்றாா்.