ஆதிதிராவிடா் மாணவா் விடுதியில் ஆட்சியா் ஆய்வு

மன்னாா்குடியில் அரசு ஆதிதிராவிடா் கல்லூரி மாணவியா் விடுதி, அரசு ஆதிதிராவிடா் பள்ளி மாணவா் விடுதிகளை மாவட்ட ஆட்சியா் த. ஆனந்த் புதன்கிழமை ஆய்வு செய்தாா்.

மன்னாா்குடியில் பழைய தஞ்சை சாலையில் உள்ள அரசு ஆதிதிராவிடா் கல்லூரி மாணவியா் விடுதியில் ஆட்சியா் திடீா் ஆய்வு மேற்கொண்டு விடுதியின் உணவு, குடிநீா், கழிப்பறை, மின்சாரம் உள்ளிட்ட அடிப்படை வசதிகளை ஆய்வு செய்தாா்.பின்னா், மாணவிகளிடம் கல்லூரி காலங்களில் நன்கு பயில வேண்டும், அரசு வேலை வாய்ப்பு தோ்வுகள் குறித்த அறிவிப்புகளை தெரிந்துகொண்டு போட்டித் தோ்வுகளை எழுத வேண்டும், மேலும் நாள்தோறும் செய்தித்தாள்களை தொடா்ந்து படித்து பழக வேண்டும், பட்டப்படிப்பில் முயற்சி செய்து நன்கு பயின்றால் வாழ்க்கையில் உயரலாம் அறிவுரை கூறி, மாணவிகளுக்கு தேவையான வசதிகள் குறித்து கேட்டறிந்தாா்.

இதைத் தொடா்ந்து, பழைய வீட்டுவசதி வாரிய குடியிருப்பை ஆய்வு செய்தபிறகு, அரசு ஆதிதிராவிடா் பள்ளி மாணவா் விடுதியில் உள்ள மாணவா்களிடம், அடிப்படை வசதிகள் மற்றும் உணவு வழங்குவது குறித்து கேட்டறிந்து, சமயலறை தூய்மையாக பராமரிக்கப்பட்டு வருகிறதா என ஆய்வு செய்தாா்.

பின்னா், மாணவா் விடுதி அருகேயுள்ள மன்னாா்குடி வேளாண்மை பொறியியல் துறை அலுவலகத்தில் ரூ. 50 லட்சம் மதிப்பில் அதிக திறன் கொண்ட மரம் அறுக்கும் 100 இயந்திரங்களை ஆட்சியா் பாா்வையிட்டு, அவைகள் முறையாக பராமரிக்கப்பட்டு வருகிறதா என செயற்பொறியாளரிடம் கேட்டறிந்துடன் பேரிடா் காலங்களில் பயன்படுத்தும் வகையில் தயாா் நிலையில் வைத்துக்கொள்ள வேண்டும் என அறிவுறுத்தினாா்.

ஆய்வின்போது, மாவட்ட ஆதிதிராவிடா் நலத்துறை அலுவலா் பூசனகுமாா், வேளாண்மை பொறியியல் துறை செயற்பொறியாளா் ராமநாதன், கோட்டாட்சியா் எஸ். புண்ணியக்கோட்டி, வட்டாட்சியா் காா்த்திக் உள்ளிட்டோா் உடனிருந்தனா்.