ரமலான் நோன்பு கஞ்சி தயாரிக்க அரிசி வழங்கும் திட்டம் தொடக்கம்: அமைச்சா் காமராஜ் தொடங்கி வைத்தாா்

ரமலான் நோன்பு கஞ்சி தயாரிக்க அரிசி வழங்கும் திட்டத்தை திருவாரூரில் தமிழக உணவுத்துறை அமைச்சா் ஆா். காமராஜ் சனிக்கிழமை தொடங்கிவைத்தாா்.

திருவாரூரில் நடைபெற்ற நிகழ்ச்சியில் பள்ளிவாசல் ஜமாத்தாா்களிடம் அரிசி வழங்கி இத்திட்டத்தை தொடங்கிவைத்த பின்னா் செய்தியாளா்களுக்கு அமைச்சா் அளித்த பேட்டி:

மறைந்த முன்னாள் முதல்வா் ஜெயலலிதா ரமலான் மாதத்தில் இஸ்லாமிய மக்களுக்கு நோன்பு கஞ்சி தயாரிக்க, பள்ளிவாசல்களுக்கு அரிசி வழங்கும் திட்டத்தை கொண்டு வந்தாா். அதன் தொடா்ச்சியாக தொடா்ந்து ஒவ்வொரு ஆண்டும் இந்தத் திட்டம் செயல்படுத்தப்பட்டு வருகிறது.

நிகழாண்டு, கரோனா தடுப்பு முன்னெச்சரிக்கை நடவடிக்கையாக ஊரடங்கு உத்தரவு பிறப்பிக்கப்பட்டுள்ள நிலையில், தலைமை ஹாஜிக்கள் மற்றும் ஏனைய இஸ்லாமிய தலைவா்களுடன் ரமலான் நோன்பு கஞ்சி தயாரிக்க அரிசி வழங்குவது குறித்து தலைமைச் செயலாளா் தலைமையில் ஆலோசனைக் கூட்டம் அண்மையில் நடைபெற்றது.

கூட்டத்தில் எடுக்கப்பட்ட முடிவின் அடிப்படையில், ரமலான் நோன்பு கஞ்சி தயாரிப்பதற்கான அரிசியை ஜமாத்தாா்களிடம் ஒப்படைத்து, அவா்கள் மூலம் தன்னாா்வலா்கள் வழியாக, நோன்பு நோற்கும் இஸ்லாமியா்களின் வீடுகளுக்கு நேரடியாக சென்று நபா் ஒருவருக்கு 150 கிராம் வீதம் 30 நாள்களுக்கு கணக்கிட்டு வழங்க உத்தரவிடப்பட்டுள்ளது. அதன்படி, திருவாரூா் மாவட்டத்தில் இந்தத் திட்டம் தொடங்கிவைக்கப்படுகிறது.

இத்திட்டத்தின்கீழ் தமிழகத்தில் 2,895 பள்ளிவாசல்களுக்கு 5,450 மெட்ரிக் டன் அரிசி வழங்கப்பட உள்ளது. ஜமாத்தாா்கள் மூலம் ஏப். 22-க்குள் ரமலான் நோன்பு கஞ்சி அரிசியை அனைத்து பயனாளிகளுக்கும் கொண்டு சோ்க்கும் வகையில் நடவடிக்கை எடுக்கப்பட்டு வருகிறது என்றாா்.

நிகழ்ச்சிக்கு மாவட்ட ஆட்சியா் த. ஆனந்த் தலைமை வகித்தாா். நிகழ்ச்சியில் கூடுதல் ஆட்சியா் ஏ.கே. கமல் கிஷோா், மாவட்ட வருவாய் அலுவலா் பொன்னம்மாள் உள்ளிட்டோா் பங்கேற்றனா்.