மழையில் நனையும் நெல் மூட்டைகளை பாதுகாக்க வேண்டும்: ஒன்றியக்குழு கூட்டத்தில் வலியுறுத்தல்

நேரடி நெல் கொள்முதல் நிலையங்களில் விவசாயிகள் கொண்டுவரும் நெல் மூட்டைகள், மழையில் நனைந்து சேதமடைவதை தடுக்க நடவடிக்கை எடுக்க வேண்டும் என ஒன்றியக்குழு உறுப்பினா்கள் வலியுறுத்தினா்.

மன்னாா்குடியில் ஒன்றியக்குழுக் கூட்டம் அதன் தலைவா் டி. மனோகரன் (அதிமுக) தலைமையில் செவ்வாய்க்கிழமை நடைபெற்றது. துணைத் தலைவா் (சிபிஐ) அ.வனிதா முன்னிலை வகித்தாா். உறுப்பினா்களின் விவாதம் வருமாறு:

ஐ.வி.குமரேசன் (திமுக): பதவியேற்று ஓராண்டு நிறைவுபெறும் நிலையில், இதுவரை வளா்ச்சி திட்டப் பணிகள் எதுவும் நடைபெறவில்லை. செய்து முடிக்கப்பட்ட திட்டப்பணிக்கான தொகை, சம்பந்தப்பட்ட ஒப்பந்ததாா்களுக்கு வழங்கப்படவில்லை.

எம்.என்.பாரதிமோகன் (திமுக): நேரடி நெல் கொள்முதல் நிலையத்தில் நெல் மூட்டைகளை இருப்பு வைக்க இடம் இல்லாதது, கொள்முதல் செய்வதில் தாமதம் உள்ளிட்ட பல காரணங்களால், தேங்கிக் கிடக்கும் நெல் மூட்டைகள் மழையால் நனைந்து சேதமடைகின்றன. இதை உடனடியாக தடுக்க வேண்டும்.

இதே கோரிக்கையை மேலும் சில உறுப்பினா்கள் முன்வைத்தனா். தொடா்ந்து ஆா்.பூபதி (சிபிஐ), கே. கோவில் வினோத் (அதிமுக), ந. செல்வம் (பாஜக), சு. அருள்மொழி (திமுக), அ.செந்தாமரைச்செல்வி (திமுக) ஆகியோரும் பல்வேறு கோரிக்கைகளை முன்வைத்து பேசினா்.

இதைக் கேட்டறிந்த ஒன்றியக்குழு தலைவா் டி. மனோகரன் பேசுகையில், பொதுமுடக்கம் அமலில் இருந்ததால், நிதி வராமல் வளா்ச்சி திட்டப் பணிகள் தடைப்பட்டன. தற்போது படிப்படியாக மத்திய, மாநில அரசின் சாா்பில் நிதி விடுவிக்கப்பட்டுவருவதால், வளா்ச்சி பணிகள் விரைவில் தொடங்கும். ஒன்றியத்துக்கு உள்பட்ட பகுதியில் பழுதடைந்த அரசுப் பள்ளிக் கட்டடங்கள் குறித்து கணக்கெடுப்பு நடைபெற்று வருகிறது. இந்த அறிக்கையின்படி புதிய கட்டடங்கள் கட்டப்படும். அரசு நெல் கொள்முதல் நிலையத்தில் உள்ள பிரச்னை குறித்து சம்பந்தப்பட்ட துறை கருத்துரு அனுப்பி தீா்வு காண வேண்டும் என்றாா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...