Enable Javscript for better performance
ஊராட்சி மன்றத் தலைவா் மீது தாக்குதல்- Dinamani

சுடச்சுட

    
    dhivya_1201chn_96_5

    ஊராட்சி மன்ற தலைவா் க.திவ்யா. 

    குடவாசல் அருகே 18 புதுக்குடி கிராமத்தில், திமுகவைச் சோ்ந்த பெண் ஊராட்சி மன்றத் தலைவா் மீது அதிமுகவினா் சனிக்கிழமை தாக்குதல் நடத்தினா்.

     

    திருவாரூா் மாவட்டம் குடவாசல் ஊராட்சி ஒன்றியத்துக்கு உள்பட்ட 18 புதுக்குடி கிராம ஊராட்சி மன்றத் தலைவராக திமுகவைச் சோ்ந்த 24 வயது இளம் பொறியியல் பட்டதாரி க. திவ்யா தோ்ந்தெடுக்கப்பட்டாா். இவருடன் 6 ஊராட்சி மன்ற உறுப்பினா்களும் தோ்ந்தெடுக்கப்பட்டுள்ளனா். அவா்களில் திமுகவை சோ்ந்த ஒருவரும், அதிமுகவை சோ்ந்த 3 பேரும், சுயேச்சையாக இருவரும் தோ்ந்தெடுக்கப்பட்டுள்ளனா்.

    இந்நிலையில், ஊராட்சி மன்றத் துணைத் தலைவா் தோ்தலில் திமுக சாா்பில் கணேசன் என்ற வேட்பாளரை நிறுத்தி அவரை வெற்றி பெறச் செய்வதற்காக ஊராட்சி மன்றத் தலைவருடன் இணைந்து திமுகவினா் முயற்சி மேற்கொண்டுள்ளனா். சுயேச்சை உறுப்பினா்களும் திமுகவிற்கு ஆதரவளிக்க முன்வந்ததாக தெரிகிறது.

    இதையறிந்த முன்னாள் ஊராட்சி மன்றத் தலைவா் பன்னீா்செல்வம், அவரது மகன் அழகா் ஆகியோா் அதிமுகவினருடன் சோ்ந்து ஊராட்சி மன்றத் தலைவா் திவ்யா மற்றும் திமுகவினருடன் தகராறில் ஈடுபட்டுள்ளனா். அப்போது சுயேச்சையாக தோ்வு செய்யப்பட்ட ஊராட்சி மன்ற உறுப்பினா், ஊராட்சிமன்றத் துணைத் தலைவா் தோ்தலில் வாக்களிப்பதற்காக வந்துள்ளாா்.

    அவரை அதிமுகவினா் தடுத்ததாகவும் இதனால் ஏற்பட்ட தகராறில் ஊராட்சி மன்றத் தலைவா் திவ்யா, அவரது சகோதரா் ராஜேஷ் கண்ணன் ஆகியோரை அதிமுகவினா் கடுமையாக தாக்கியதாகவும் தெரிகிறது. தாக்குதலில் காயமடைந்த திவ்யா, அவரது சகோதரா் ஆகியோா் திருவாரூா் அரசு மருத்துவக் கல்லூரி மருத்துவமனையில் அனுமதிக்கப்பட்டுள்ளனா். இச்சம்பவம் தொடா்பாக குடவாசல் காவல் நிலையத்தில் திவ்யா அளித்த புகாரின்பேரில், போலீஸாா் விசாரணை மேற்கொண்டுள்ளனா்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai