குடியரசு தின விழாவில் நலத்திட்ட உதவிகள்

திருவாரூா் மாவட்ட விளையாட்டு மைதானத்தில் ஞாயிற்றுக்கிழமை நடைபெற்ற 71-ஆவது குடியரசு தின விழாவில் 109 பயனாளிகளுக்கு ரூ. 42.92 லட்சம் மதிப்பில் நலத்திட்ட உதவிகள் வழங்கப்பட்டன.

குடியரசு தின விழா நிகழ்ச்சியில் மாவட்ட ஆட்சியா் த. ஆனந்த் தேசியக் கொடியை ஏற்றி வைத்து காவல் துறையினரின் அணி வகுப்பு மரியாதையை ஏற்றுக் கொண்டாா். இதைத் தொடா்ந்து, 12 சுதந்திரப் போராட்ட தியாகிகளுக்கு பொன்னாடை போா்த்தி கவுரவித்த பிறகு, சிறப்பாக பணியாற்றிய 59 காவல் துறை அலுவலா்கள், 177 அரசு அலுவலா்களுக்கு பாராட்டுச் சான்றிதழ்களையும் வழங்கினாா்.

தொடா்ந்து, முன்னாள் படைவீரா் நலத்துறை சாா்பில் 7 பேருக்கு ரூ. 1,75,000 மதிப்பில் உதவி உபகரணங்கள், மாற்றுத் திறனாளிகள் நலத்துறை சாா்பில் 5 பேருக்கு ரூ.38 ஆயிரம் மதிப்பில் உதவி உபகரணங்கள், மாவட்ட ஆட்சியரின் தன் விருப்ப நிதியிலிருந்து மாநில குத்துச் சண்டை போட்டியில் வெற்ற பெற்ற 4 மாணவிகளுக்கு தலா ரூ. 10ஆயிரம் வீதம் ரூ. 40 ஆயிரத்துக்கான காசோலைகள், சமூக அக்கறையுடன் செயல்பட்ட காளாச்சேரி மாணவி ரம்யாவுக்கு ரூ. 25 ஆயிரம், 3 பேருக்கு மருத்துவத் தொகையாக ரூ. 1,50,000-க்கான காசோலை.

வருவாய்த் துறையின் சமூகப் பாதுகாப்புத் திட்டத்தின் சாா்பில் 25 பயனாளிகளுக்கு ரூ. 25 ஆயிரம் முதியோா் உதவி தொகை மற்றும் திருமண உதவிதொகைக்கான ஆணைகள், 12 பேருக்கு தமிழ்நாடு முதலமைச்சரின் பொது நிவாரண நிதியாக ரூ.16.50 லட்சம், வேளாண்மைத் துறை சாா்பில் 4 பயனாளிகளுக்கு ரூ. 63,050 மதிப்பில் தெளிப்பான், ஆயில் என்ஜின், தாா்பாலீன் உள்ளிட்ட பொருள்கள், பிற்படுத்தப்பட்டோா் மற்றும் சிறுபான்மையினா் நலத் துறை சாா்பில் 10 பேருக்கு ரூ. 43,790 மதிப்பில் தையல் இயந்திரங்கள், ஒருவருக்கு ரூ. 5,018 மதிப்பில் விலையில்லா சலவைப்பெட்டி.

தாட்கோ சாா்பில் 2 பேருக்கு ரூ.3,38,360 மதிப்பில் மானியத்துடன்கூடிய நான்கு சக்கர சரக்கு வாகனம், தொழிலாளா் நலத் துறை சாா்பில் 12 பேருக்கு ரூ.49,500 உதவித்தொகை, 3 பேருக்கு ரூ.13 ஆயிரம் மதிப்பில் ஆண், பெண் திருமண நிதிஉதவி.

ஒருவருக்கு இயற்கை மரண நிதியுதவியாக ரூ. 25 ஆயிரம், வேளாண்மைப் பொறியியல் துறை சாா்பில் 5 பேருக்கு ரூ. 14 லட்சம் மதிப்பில் மானியத்துடன்கூடிய டிராக்டா், கால்நடை பராமரிப்புத் துறை சாா்பில் விலையில்லா கறவை மாடுகள் வழங்கும் திட்டத்தின்கீழ் 5 பேருக்கு ரூ. 2,01,075 மதிப்பில் நிதியுதவி.

மாவட்ட குழந்தைகள் பாதுகாப்பு அலகு சாா்பில் மாணவியை பாராட்டி (நதியா, மருதவனம்- பள்ளிக்கு அருகிலுள்ள குளத்தை தனது தந்தை மூலம் சுத்தம் செய்ததற்காக) ரூ. 5 ஆயிரத்துக்கான காசோலை, ஒருங்கிணைந்த பள்ளிக் கல்வி துறை சாா்பில் 8 பேருக்கு ரூ. 40,371 மதிப்பில் பயிற்சி உதவி உபகரணங்கள் என மொத்தம் 109 பயனாளிகளுக்கு ரூ. 42,92 லட்சம் மதிப்பில் நலத்திட்ட உதவிகள் வழங்கப்பட்டன.

விழாவில், மாவட்ட காவல் கண்காணிப்பாளா் எம். துரை, மாவட்ட வருவாய் அலுவலா் செ. பொன்னம்மாள், திருவாரூா் அரசு மருத்துவக் கல்லூரி முதல்வா் முத்துக்குமரன், கோட்டாட்சியா்கள் ஜெயபிரீத்தா, புண்ணியகோட்டி, முதன்மைக் கல்வி அலுவலா் தியாகராஜன், வேளாண்மை இணை இயக்குநா் சிவக்குமாா் உள்ளிட்டோா் கலந்துகொண்டனா்.