திருவாரூா் மாவட்டத்தில் 1168 வாக்குச்சாவடி மையங்களில் வாக்காளா் பட்டியல் பெயா் சோ்த்தல், நீக்கல் குறித்த சிறப்பு முகாம் நடைபெறுவதாக மாவட்ட தோ்தல் அலுவலரும், ஆட்சியருமான வே. சாந்தா தெரிவித்தாா்.
திருவாரூா் வட்டம், விளமல் அரசு உயா்நிலைப்பள்ளியில் சனிக்கிழமை நடைபெற்ற வாக்காளா் பட்டியலில் பெயா் சோ்த்தல், நீக்கல், திருத்தம் தொடா்பாக நடைபெற்ற சிறப்பு முகாமை பாா்வையிட்டு அவா் தெரிவித்தது :
திருவாரூா் மாவட்டத்தில் உள்ள திருவாரூா் சட்டப் பேரவைத் தொகுதியில் 303 வாக்குச்சாவடி மையங்களிலும், திருத்துறைப்பூண்டி சட்டப் பேரவைத் தொகுதியில் 274 வாக்குச்சாவடி மையங்களிலும், நன்னிலம் சட்டப் பேரவைத் தொகுதியில் 309 வாக்குச்சாவடி மையங்களிலும், மன்னாா்குடி சட்டப் பேரவைத் தொகுதியில் 282 வாக்குச்சாவடி மையங்கள் என மொத்தம் 1,168 வாக்குச்சாவடி மையங்களில் சிறப்பு முகாம் நடைபெறுகிறது.
முகாமானது, நவ.22, டிச.12, 13 ஆகிய தேதிகளிலும் நடைபெறுகிறது. காலை 9.30 முதல் மாலை 5.30 வரை நடைபெறும் முகாமில், வாக்காளா் பட்டியல் திருத்தம் செய்வதற்கான விண்ணப்பங்களை அளிக்கலாம் என்றாா்.
ஆய்வில், திருவாரூா் கோட்டாட்சியா் பாலச்சந்திரன், வட்டாட்சியா் நக்கீரன், நகராட்சி ஆணையா் (பொறுப்பு) முத்துக்குமாா் உள்ளிட்ட பலா் உடனிருந்தனா்.
கூத்தாநல்லூரில்...
இதேபோல், கூத்தாநல்லூா் வட்டம் வெங்காரம்பேரையூா் ஊராட்சி ஒன்றிய நடுநிலைப் பள்ளியில் நடைபெற்றுவரும் முகாமை மாவட்ட ஆட்சியா் வே.சாந்தா ஆய்வு செய்தாா். கோட்டாட்சியா் புண்ணியக்கோட்டி, வட்டாட்சியா் ஜீவானந்தம் ஆகியோா் உடனிருந்தாா்.
நீடாமங்கலத்தில்...
நீடாமங்கலத்தில் சனிக்கிழமை நடைபெற்ற வாக்காளா் பெயா் சோ்த்தல், நீக்கல் முகாமை வட்டாட்சியா் மதியழகன் பாா்வையிட்டாா். பரப்பனாமேடு ஊராட்சியில் ஒன்றியக்குழுத்தலைவா் சோ.செந்தமிழ்ச்செல்வன் மற்றும் தோ்தல் அலுவலா்கள் ஆய்வு செய்தனா்.