ஜாமீனில் வெளிவந்த இளைஞா் வெட்டிக் கொலை: தாய் மாமன் கைது

மன்னாா்குடி: திருவாரூா் மாவட்டம், மன்னாா்குடி அருகே ஜாமீனில் வெளிவந்த இளைஞா் தாய் மாமனால் ஞாயிற்றுக்கிழமை இரவு வெட்டிக் கொலை செய்யப்பட்டாா்.

மன்னாா்குடியை அடுத்த கருவாக்குறிச்சி காலனி தெற்கு தெருவை சோ்ந்த செல்வம் - லட்சுமி தம்பதியின் மகன் தவசீலன் (27) இவா், திருச்சியில் தங்கியிருந்த அங்குள்ள உணவகம் ஒன்றில் வேலை பாா்த்தபோது, அதே பகுதியை சோ்ந்த ராஜேஸ்வரி என்பவரை காதலித்து 6 ஆண்டுக்கு முன் திருமணம் செய்துகொண்டாா். தம்பதி திருச்சி தில்லைநகரில் வசித்து வந்தனா். இவா்களுக்கு, சாய் பிரசாத் (5), கவிநிலவு (3) என 2 குழந்தைகள் உள்ளனா்.

இந்நிலையில், கடந்த ஜனவரி மாதம் ஏற்பட்ட குடும்பத் தகராறில் மனைவி ராஜேஸ்வரியை கொலை செய்ததால், தவசீலன் கைது செய்யப்பட்டு, சிறையில் அடைக்கப்பட்டாா்.

அண்மையில் ஜாமீனில் வெளிவந்த தவசீலன், கடந்த 10 நாள்களுக்கு முன் தனது சொந்த ஊரான கருவாக்குறிச்சி வந்து பெற்றோருடன் தங்கியிருந்தாா்.

தவசீலன் நாள்தோறும் மது அருந்திவிட்டு வீட்டுக்கு வந்து பெற்றோருடன் தகராறில் ஈடுபட்டு வந்துள்ளாா். இதேபோல, ஞாயிற்றுக்கிழமை இரவு குடிபோதையில் தகராறு செய்த தவசீலனை, அருகில் வசிக்கும் அவரது தாய் மாமன் ரவி (58) கண்டித்துள்ளாா்.

இதனால், இருவருக்கும் இடையே தகராறு ஏற்பட்டுள்ளது. இதில் ஆத்திரமடைந்த ரவி, அரிவாளால் வெட்டியதில் பலத்த காயமடைந்த தவசீலன் சம்பவ இடத்திலேயே உயிரிழந்தாா்.

வடுவூா் காவல் நிலைய போலீஸாா், தவசீலனின் சடலத்தை பிரேத பரிசோதனைக்காக மன்னாா்குடி அரசு மருத்துவமனைக்கு அனுப்பிவைத்து, ரவியை கைது செய்து விசாரித்து வருகின்றனா்.