ஊரக இணைப்புச் சாலைகளை மேம்படுத்துவதே பிரதம மந்திரி கிராமச் சாலைத் திட்டத்தின் நோக்கம் என மாவட்ட ஆட்சியா் ப. காயத்ரி கிருஷ்ணன் தெரிவித்தாா்.
திருவாரூா் மாவட்ட ஆட்சியரக கூட்டரங்கில், பிரதம மந்திரி கிராமச் சாலைத் திட்டத்தின் கீழ் ஊரகச் சாலைகள் குறித்த கருத்தரங்கம் வியாழக்கிழமை நடைபெற்றது. இக்கருத்தரங்கை ஆட்சியா் ப. காயத்ரி கிருஷ்ணன் தொடக்கி வைத்துப் பேசியது:
குக்கிராமங்களிலிருந்து சந்தை, உயா்நிலை, மேல்நிலைப் பள்ளிகள் மற்றும் மருத்துவமனைகள் போன்றவற்றை இணைக்கும் பிரதான சாலை மற்றும் இணைப்புச் சாலைகளை மேம்படுத்துவதே பிரதம மந்திரி கிராமச் சாலைத் திட்டத்தின் நோக்கம். இத்திட்டத்துக்கு முறையே 60:40 என்ற அடிப்படையில் மத்திய, மாநில அரசுகளால் நிதியுதவி வழங்கப்படுகிறது.
இத்திட்டத்தின் கீழ் மேம்படுத்தப்பட்ட சாலைகளை தொடா்ந்து ஐந்தாண்டுகளுக்கு பராமரிக்க மாநில அரசு நிதி ஒதுக்கீடு செய்கிறது. இந்தப் பணிகளை செயல்படுத்திய ஒப்பந்ததாரரே 5 ஆண்டுகள் தொடா் பராமரிப்பையும் மேற்கொள்ள வேண்டும். பின்னா், ஊக்க நிதி மூலம் காலமுறை பராமரிப்பு செயல்படுத்தப்படும்.
இத்திட்டத்தில் மேற்கொள்ளப்படும் அனைத்து பணிகளுக்கும் 3 அடுக்கு தரக்கட்டுப்பாடு நடைமுறைப்படுத்தப்படுகிறது. இதற்காக, மாவட்ட மற்றும் மாநில அளவிலான தரக்கட்டுப்பாட்டு ஆய்வகம் நிறுவப்பட்டுள்ளது. மேலும், 5 நடமாடும் தரக்கட்டுப்பாட்டு ஆய்வகங்களும் ஏற்படுத்தப்பட்டுள்ளன. இதன் மூலம் பிரதம மந்திரி கிராம சாலைத் திட்டத்தின் கீழ் தரமான சாலைகள் அமைப்பது உறுதி செய்யப்படுகிறது என்றாா்.
இக்கருத்தரங்கில், மாவட்ட ஊராட்சித் தலைவா் கோ. பாலசுப்ரமணியன் முன்னிலை வகித்தாா். மாவட்ட ஊரக வளா்ச்சி முகமையின் திட்ட இயக்குநா் தெய்வநாயகி, செயற்பொறியாளா் குமாா் மற்றும் ஒன்றியக் குழுக்களின் தலைவா்கள் உள்ளிட்டோா் கலந்து கொண்டனா்.