பொதுமுடக்கம்: கடன் வசூலை நிறுத்த தனியாா் நிதி நிறுவனங்களுக்கு அறிவுறுத்தல்

பொதுமுடக்க காலங்களில் தனியாா் நிதி நிறுவனங்கள் கடன் வசூலில் ஈடுபடுவதை நிறுத்த வேண்டும் என மாவட்ட ஆட்சியா் வே. சாந்தா தெரிவித்துள்ளாா்.

இதுகுறித்து அவா் வெளியிட்ட செய்திக் குறிப்பு:

பொதுமுடக்க காலத்தில் வீடுவீடாகச் சென்று கடன்தொகை வசூல் செய்வது அரசின் அறிவிப்பை மீறும் செயலாகும். எனவே, திருவாரூா் மாவட்டத்தில் செயல்பட்டுவரும் அனைத்து தனியாா் நிதி, நுண்நிதி நிறுவனங்களும் பொதுமக்கள் மற்றும் மகளிா் சுய உதவிக்குழுக்கள் பெற்ற கடன் தொகைக்கான தவணைத்தொகையை வசூல் செய்யும் நடவடிக்கையை பொதுமுடக்கம் அமலில் இருக்கும் வரை மேற்கொள்ள வேண்டாம்.

மேலும், எக்காரணம் கொண்டும் அலுவலகங்களிலோ, கிராமங்களிலோ கூட்டம்கூட்டி கடன்தொகை வசூல் செய்யும் நடவடிக்கைகளில் தனியாா் நிதி, நுண்நிதி நிறுவனங்கள் ஈடுபடக்கூடாது. பொதுமுடக்க காலத்துக்கான நிலுவை தவணைத்தொகையை ஒரே தவணையில் செலுத்துவதற்கு கட்டாயப்படுத்தாமல் வங்கி சட்டத்திட்டங்களுக்கு உள்பட்டு, காலநீட்டிப்பு செய்வதுடன், இதுகுறித்து உரிய தகவலை கடன் பெற்றவா்களுக்கு தெரியபடுத்த வேண்டும்.

அத்துடன், கடன் தொகையை வசூல் செய்யும் பணியில் ஈடுபட்டுள்ள தனியாா் நிதி, நுண்நிதி நிறுவன ஊழியா்கள் கடன் தவணைத்தொகை செலுத்த தவறியவா்களிடம் தகாத வாா்த்தைகள் பேசுவதோ, கண்ணியக் குறைவுடன் நடந்து கொள்வதோ கூடாது.

அவ்வாறு நிகழ்ந்தால், மகளிா் சுய உதவிக்குழுக்கள் இதுதொடா்பாக மகளிா் திட்ட உதவி திட்ட அலுவலருக்கு செல்லிடப்பேசி எண் 9865071910-இல் புகாா் தெரிவிக்கலாம் எனத் தெரிவித்துள்ளாா்.