ஜோதிட நம்பிக்கையால் 5 வயது மகனைமண்ணெண்ணெய் ஊற்றி எரித்த தந்தை
By DIN | Published On : 04th March 2021 05:28 AM | Last Updated : 04th March 2021 05:28 AM | அ+அ அ- |
நன்னிலம்: திருவாரூா் மாவட்டம், நன்னிலத்தில் ஜோதிட நம்பிக்கையால் தனது 5 வயது மகன்மீது தந்தையே மண்ணெண்ணெய் ஊற்றி எரித்த சம்பவத்தில், குழந்தை செவ்வாய்க்கிழமை இறந்ததை அடுத்து, அதன் தந்தை மீது போலீஸாா் கொலை வழக்குப் பதிவுசெய்துள்ளனா்.
நன்னிலத்தைச் சோ்ந்தவா் ஆட்டோ ஓட்டுநா் ராம்கி (26). இவரது மனைவி காயத்ரி. இவா்களுக்கு சாய்சரண் (5), சா்வேஷ் (3) என 2 மகன்கள். ஜோதிடத்தில் மிகுந்த நம்பிக்கை கொண்ட ராம்கியிடம், அவரது மூத்த மகனுக்கும், தந்தைக்கும் ஆகாது என ஜோதிடா் தெரிவித்தாராம்.
இதைத்தொடா்ந்து, ராம்கி தனது மூத்த மகனை தொடா்ந்து வெறுப்பு மனப்பான்மையுடன் நடத்தியுள்ளாா். இதனால், தம்பதிக்கிடையே அடிக்கடி தகராறு ஏற்பட்டுள்ளது. இந்நிலையில், கடந்த பிப். 26 ஆம் தேதி ஏற்பட்ட தகராறின்போது, குடிபோதையில் இருந்த ராம்கி, தனது 5 வயது மகன் சாய்சரண் மீது மண்ணெண்ணெயை ஊற்றி தீவைத்தாராம். இதில், பலத்த தீக்காயமடைந்த சாய்சரண், தஞ்சை அரசு மருத்துவக் கல்லூரி மருத்துவமனையில் சோ்க்கப்பட்டு, சிகிச்சை பலனின்றி செவ்வாய்க்கிழமை உயிரிழந்தாா்.
இந்த சம்பவம் தொடா்பாக ஏற்கெனவே ராம்கியை கைதுசெய்த நன்னிலம் போலீஸாா், குழந்தை சாய்சரண் இறந்ததைத் தொடா்ந்து, அவா்மீது கொலை வழக்குப் பதிந்து விசாரணை நடத்திவருகின்றனா்.
செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...
