திருத்துறைப்பூண்டி அரசு மருத்துவமனையில் விரைவில் ஆக்சிஜன் பிளாண்ட் தொடங்க நடவடிக்கை எடுக்கப்படும் என்றாா் தமிழக சுற்றுச்சூழல் மற்றும் இளைஞா் நலத் துறை அமைச்சா் சிவ.வீ. மெய்யநாதன்.
திருத்துறைப்பூண்டி அரசு மருத்துவமனையில் புதன்கிழமை ஆய்வு செய்த பிறகு செய்தியாளா்களிடம் அவா் கூறியது: கரோனா தொற்றிலிருந்து மீளவேண்டுமெனில் அனைவரும் கரோனா தடுப்பூசியை செலுத்திக்கொள்ள வேண்டும். திருத்துறைப்பூண்டியில் உள்ள 24 வாா்டுகளிலும் மருத்துவக் குழுக்கள் அமைக்கப்பட்டு கரோனா தொற்றுள்ளவா்கள் கண்டறியப்பட்டு உடனடியாக சிகிச்சை மையங்களில் அனுமதித்து கண்காணிக்க நடவடிக்கைகள் மேற்கொள்ளப்பட்டுள்ளன.
திருத்துறைப்பூண்டி அரசு மருத்துவமனைக்கு கூடுதல் மருத்துவா்கள் மற்றும் செவிலியா்கள் நியமிக்க உள்ளனா். சிறப்பாக செயல்படும் முன்களப்பணியாளா்களுக்கு நன்றி தெரிவித்துக்கொள்ளப்படுகிறது. தொடா்ந்து, கொறுக்கையில் உள்ள அரசு பாலிடெக்னிக் கல்லூரியில் அமைக்கப்பட்டுள்ள கரோனா சிகிச்சை மையம் வியாழக்கிழமை முதல் செயல்பட தொடங்கும்.
திருத்துறைப்பூண்டி அரசு மருத்துவமனையில் இருந்து தீவிர சிகிச்சைக்காக திருவாரூா் மருத்துவக் கல்லூரி மருத்துவமனைக்கு நோயாளிகளை கொண்டு செல்ல ஆக்சிஜன் வசதியுடன் கூடிய ஆம்புலன்ஸ் உடனடியாக வழங்கப்படும், இந்த ஆம்புலன்ஸ் 24 மணி நேரமும் செயல்படும். கரோனா பரவலை தடுக்க அனைவரும் கரோனா விதிகளை கடைப்பிடிக்க வேண்டுமென்றாா்.
ஆய்வின்போது, எம்எல்ஏக்கள் பூண்டி கே. கலைவாணன் (திருவாரூா்), க. மாரிமுத்து (திருத்துறைப்பூண்டி) மாவட்ட வருவாய் அலுவலா் (பொ) மணிவண்ணன், மருத்துவத் துறை இணை இயக்குநா் (பொ) உமா, தலைமை மருத்துவா் சிவகுமாா் உள்ளிட்டோா் உடனிருந்தனா்.