குடவாசல் ஒன்றியத்தில் ஒருங்கிணைந்த பள்ளிக் கல்வி வட்டார வள மையம் சாா்பில் 6 முதல் 18 வயது வரை உள்ள மாற்றுத்திறன் மாணவா்களுக்கான மருத்துவ முகாம் குறித்து விழிப்புணா்வு பேரணி திங்கள்கிழமை நடைபெற்றது. நீடாமங்கலத்தில் மருத்துவ மதிப்பீட்டு முகாம் நடைபெற்றது.
விழிப்புணா்வு பேரணியை, வட்டாரக் கல்வி அலுவலா் க. குமரேசன், காவல் உதவி ஆய்வாளா் அமுல்தாஸ் ஆகியோா் தொடங்கி வைத்தனா். குடவாசல் அரசு ஆண்கள் மேல்நிலைப் பள்ளி தலைமை ஆசிரியா் மோகனகிருஷ்ணன், வட்டார வள மையத்தின் மேற்பாா்வையாளா் (பொ) த. பூபாலன் ஆகியோா் முன்னிலை வகித்தனா்.
இப்பேரணி அரசு ஆண்கள் மேல்நிலைப் பள்ளியில் தொடங்கி குடவாசல் பேருந்து நிலையம் வரை சென்று, மீண்டும் பள்ளியை வந்தடைந்தது. இதில், வட்டார வள மைய ஆசிரியா் பயிற்றுநா்கள் பலா் பங்கேற்றனா்.
மருத்துவ மதிப்பீட்டு முகாம்: நீடாமங்கலத்தில் வட்டார அளவில் மாற்றுத்திறன் மாணவா்களுக்கு மருத்துவ மதிப்பீட்டு முகாம் நடைபெற்றது. இதில், 152 மாற்றுத்திறன் மாணவா்கள் பங்கேற்றனா்.
இவா்களில், 41 பேருக்கு அடையாள அட்டை, 12 பேருக்கு உதவி உபகரணங்கள் வழங்கப்பட்டன. மேலும், அறுவைச் சிகிச்சை பெற 8 பேருக்கும், பேருந்து மற்றும் ரயில் பயணச் சீட்டு பெற 52 பேருக்கும் பரிந்துரைக்கப்பட்டன . 31 பேரிடம் மாற்றுத்திறனாளிக்கான தேசிய தனி அடையாள அட்டைக்கு விண்ணப்பம் பெறப்பட்டது. பள்ளி சிறாா் கண்ணொளித் திட்டத்தில் 8 மாணவா்களுக்கு கண்ணாடி வழங்கப்பட்டது.
இம்முகாமுக்கு ஒன்றியக் குழுத் தலைவா் செந்தமிழ்ச்செல்வன் தலைமை வகித்தாா். பேரூராட்சித் தலைவா் ராம்ராஜ் முன்னிலை வகித்தாா். வட்டார வளமைய மேற்பாா்வையாளா் சத்யா வரவேற்றாா். மாவட்ட உதவி திட்ட அலுவலா் பாலசுப்ரமணியன் முகாமை பாா்வையிட்டாா். மாவட்ட ஒருங்கிணைப்பாளா் பாலசுப்ரமணியன், வட்டார கல்வி அலுவலா்கள் சம்பத், முத்தமிழன் உள்ளிட்டோா் பங்கேற்றனா். ஒருங்கிணைப்பாளா் அன்புராணி நன்றி கூறினாா்.