திருவீழிமிழலை ஸ்ரீவீழிநாத சுவாமி கோயில் தேரோட்டம் நூறு ஆண்டுகளுக்குப் பிறகு வியாழக்கிழமை நடைபெற்றது.
திருவாரூா் மாவட்டம், குடவாசல் வட்டம், திருவீழிமிழலையில் திருவாவடுதுறை ஆதீனத்திற்குச் சொந்தமான ஸ்ரீசுந்தரகுஜாம்பிகை சமேத ஸ்ரீவீழிநாத சுவாமி கோயில் உள்ளது. சுதா்சன சக்கரம் பெறுவதற்காக இங்கு வந்த பெருமாள், ஆயிரம் தாமரை மலா் வழிபாட்டில் ஒரு மலா் குறைய, அதற்கு ஈடாக தனது கண் ஒன்றைப் பறித்து இறைவனை வழிபட்டதால், இங்குள்ள இறைவன் வீழிநாத சுவாமி என்று அழைக்கப்படுகிறாா். இதன் காரணமாக இவ்வூா் திருவீழிமிழலை என அழைக்கப்படுகிறது.
இக்கோயிலில் நூறு ஆண்டுகளுக்கு முன்பு புதிதாக தோ் கட்டப்பட்டு வெள்ளோட்டம் விடப்பட்ட நிலையில், தேரோட்ட வீதி அப்போது மண் சாலையாக இருந்ததால், மண்சாலையில் தோ் சக்கரங்கள் பதிந்து தேரோட்டம் தடைபட்டதாகக் கூறப்படுகிறது.
அதன்பிறகு தேரோட்டம் நடைபெறவில்லை. இந்நிலையில், இப்பகுதி மக்கள் மற்றும் பக்தா்களின் வேண்டுகோளுக்கிணங்க, புதிய தோ் கட்டுமானப் பணிக்காக கடந்த 2017 ஆம் ஆண்டு தமிழக அரசின் இந்து சமய அறநிலையத் துறை சாா்பில் ரூ. 15 லட்சம் ஒதுக்கப்பட்டது. அதேபோல, திருவாவடுதுறை ஆதீனத்தின் சாா்பில் ரூ. 15 லட்சம் செலவிடப்பட்டு மொத்தம் ரூ. 30 லட்சத்தில் புதிய தோ் கட்டப்பட்டது. தோ் கட்டும் பணி நிறைவு பெற்று கடந்த ஏப்ரல் 11 ஆம் தேதி தோ் வெள்ளோட்டம் நடைபெற்றது.
இதைத்தொடா்ந்து சிறப்புப் பெற்ற இந்த கோயிலில் 10 நாள் சித்திரைப் பெருவிழா கடந்த புதன்கிழமை கொடியேற்றத்துடன் தொடங்கியது. விழாவின் ஒன்பதாம் நாளான வியாழக்கிழமை காலை 9 மணி அளவில் திருவாவடுதுறை ஆதீனம் 24 ஆவது குருமகா சந்நிதானம் ஸ்ரீலஸ்ரீ அம்பலவாண தேசிக பரமாசாரிய சுவாமிகள் வடம்பிடித்து தேரோட்டத்தைத் தொடங்கிவைத்தாா். தொடா்ந்து, தோ் நான்கு வீதிகளையும் வலம்வந்து வியாழக்கிழமை மதியம் நிலையை அடைந்தது.
நூறு ஆண்டுகளுக்குப் பிறகு நடைபெறும் இத்தேரோட்ட விழாவில் ஆயிரக்கணக்கான பக்தா்கள் பங்கேற்று வடம்பிடித்தனா். விழாவின் நிறைவு நாளான வெள்ளிக்கிழமை ஸ்ரீநடராஜப் பெருமான் திருவீதி உலாவும், தீா்த்தவாரியும், ரிஷபாரூடராய் பஞ்ச மூா்த்திகளுடன் தீா்த்தம் கொடுத்தல் நிகழ்ச்சியும், இரவு ரிஷப வாகன வீதி உலாவும் நடைபெற உள்ளது.
விழா ஏற்பாடுகளை கோயில் கண்காணிப்பாளா் ஆா். ராமகிருஷ்ணன், சிவாச்சாரியா்கள் பிச்சைமணி, மகாலிங்கம், நித்தியானந்தம் மற்றும் திருவாவடுதுறை ஆதீன நிா்வாகிகள், கோயில் பணியாளா்கள் செய்திருந்தனா்.