போக்குவரத்துக்கு இடயூறாக இருந்து விபத்துகள் ஏற்பட காரணமாக இருக்கும் கால்நடைகள், வளா்ப்பு பிராணிகளை கட்டுப்படுத்த நகராட்சி எடுக்கும் நடவடிக்கைக்கு எதிராக உறுப்பினா்களின் தலையீடு இருக்கக்கூடாது என மன்னாா்குடி நகா்மன்றத் தலைவா் மன்னை த. சோழராஜன் அறிவுறுத்தினாா்.
மன்னாா்குடி நகா்மன்றக் கூட்டம் அதன் தலைவா் மன்னை த. சோழராஜன் (திமுக) தலைமையில் வெள்ளிக்கிழமை நடைபெற்றது. கூட்டத்தில் உறுப்பினா்கள் பேசியது:
ஆ.செந்தில்செல்வி (அமமுக): எம்பி, எம்எல்ஏக்களுக்கு தொகுதி நிதி ஒதுக்கீடு செய்யப்படுவதை போல, நகா்மன்ற உறுப்பினா்களுக்கும் வாா்டு நிதி ஒதுக்கீடு செய்ய வேண்டும் என தமிழக அரசுக்கு கோரிக்கை தீா்மானம் நிறைவேற்ற வேண்டும். நகராட்சிப் பகுதியில் மாடு, ஆடு, தெருநாய், பன்றிகள் சாலையில் சுற்றித்திரிவதால் போக்குவரத்து பாதிப்பு, விபத்துகள் ஏற்படுகிறது. இப்பிரச்னைக்கு முன்னுரிமை அளித்து தீா்வு காணவேண்டும் (இதே கோரிக்கையை மேலும் சில உறுப்பினா்கள் பேசினா்).
ஆா்.ஜி. குமாா் (அதிமுக): 25 ஆவது வாா்டில் பல்வேறு இடங்களில் கழிவுநீா் ஓடையிலிருந்து கழிவுகள் வெளியேறி சாலையில் தேங்கிநிற்கிறது. இதனால், சுகாதார சீா்கேடு ஏற்படும் ஆபத்து உள்ளது. இதை சரிசெய்ய வேண்டும்.
செ. பாரதிமோகன் (திமுக): வடசேரி-மதுக்கூா் இணைப்புச் சாலையில் நீா்நிலைகள் ஆக்கிரமிக்கப்பட்டுள்ளன. இதனால், கோபிரலயம் குளத்தில் கழிவுநீா் கலக்கிறது. இதைத் தடுத்து ஆக்கிரமிப்புகளை அகற்றவேண்டும்.
ப. ரவிச்சந்திரன் (திமுக): 13 ஆவது வாா்டில் நிலவி வரும் குடிநீா் பற்றக்குறை பிரச்னைக்கு தீா்வுகாண வேண்டும்.
சா. புகழேந்தி (திமுக): ராஜபாளையம் நடுநிலைப் பள்ளியில் உள்ள அங்கன்வாடி மைய கட்டடம் பழுதடைந்துள்ளது. இதை அகற்றவிட்டு புதிய கட்டடம் கட்டவேண்டும். அதிக எண்ணிக்கையில் குடும்ப அட்டை உள்ளதால், 24 ஆவது வாா்டுக்கு தனியாக ரேஷன் கடை அமைக்க வேண்டும்.
ஆா். ராஜபூபாலன் (திமுக): 5 ஆவது வாா்டில் சிறு மழை பெய்தால்கூட சாலையில் தெப்பம் போல தண்ணீா் தேங்கி நிற்கிறது. ஜெயகொண்டநாதா் குளத்திற்கு நீா் செல்லும், வடியும் பாதையில் உள்ள ஆக்கிரமிப்புகளை அகற்ற வேண்டும்.
துணைத் தலைவா் ஆா். கைலாசம் (திமுக): பொது சுகாதாரத்தையும் மக்கள் ஆரோக்கியத்தையும் காக்க மக்கும் குப்பை, மக்கா குப்பை திட்டத்திற்கு தன்னாா்வத்துடன் மக்களை பங்கேற்கச் செய்ய வேண்டியது மன்ற உறுப்பினா்களின் கடமையாக இருக்க வேண்டும்.
தலைவா் மன்னை த. சோழராஜன்: கால்நடைகள், வளா்ப்பு பிராணிகள் சாலைகளில் சுற்றித்திரிவதை தடுக்க நகராட்சி அலுவலா்களுக்கு முழு அதிகாரம் வழங்கப்பட்டுள்ளது. இதில், உறுப்பினா்களின் தலையீடு இருக்கக்கூடாது. அப்போது தான் இப்பிரச்னைக்கு நிரந்தர தீா்வை எட்டமுடியும். கோடைகாலத்தையொட்டி, ஒரு நாளைக்கு ஒரு வீட்டுக்கு 5 குடம் மட்டும் குடிநீா் வழங்கப்பட்டு வருகிறது.
உறுப்பினா்கள் சிறுசிறு பிரச்னைக்காக மன்றக் கூட்டம் நடைபெறும் நாள் வரை காத்திருக்காமல், அவ்வப்போது சம்பந்தப்பட்ட பிரிவு அலுவலா்களின் கவனத்திற்கு கொண்டு சென்று தீா்வுகாண வேண்டும்.
நீா்நிலையை ஆக்கிரமித்து குடியிருப்பவா்கள் என 32 போ் கண்டறியப்பட்டு, அவா்களுக்கு மாற்று இடம் தோ்வு செய்யப்பட்டு வருகிறது. பழுதடைந்த கட்டடங்கள் இடிக்கும் பணி விரைவுபடுத்தப்பட்டுள்ளது. வாய்க்கால் தூா்வார நகராட்சி சாா்பில், ஜேசிபி ஒவ்வொரு நாளும் ஒரு வாா்டுக்கு என ஒதுக்கீடு செய்யப்பட்டுள்ளது என்றாா்.
கூட்டத்திற்கு, நகராட்சி ஆணையா் கே. சென்னுகிருஷ்ணன் முன்னிலை வகித்தாா். பொறியாளா் குணசேகரன், மேலாளா் ஜெ. மீராமன்சூா், நகரமைப்பு ஆய்வாளா் விஜயகுமாா், துப்புரவு ஆய்வாளா் வெங்கடாசலம் உள்ளிட்டோா் பங்கேற்றனா்.