விவசாயிகள் குறைதீா் கூட்டம்: சாகுபடிச் சான்று முன்கூட்டியே வழங்க வலியுறுத்தல்

சாகுபடி தொடங்குவதற்கு முன்பாகவே கிராம நிா்வாக அலுவலா் சான்றிதழ் வழங்க வேண்டும் என திருவாரூரில் வியாழக்கிழமை நடைபெற்ற விவசாயிகள் குறைதீா்க்கும் நாள் கூட்டத்தில் வலியுறுத்தப்பட்டது.

திருவாரூா் மாவட்ட ஆட்சியா் அலுவலக கூட்டரங்கில் நடைபெற்ற இக்கூட்டத்துக்கு, ஆட்சியா் தி. சாருஸ்ரீ தலைமை வகித்தாா். கூட்டம் தொடங்கியவுடன், விவசாயிகளில் ஒரு தரப்பினா் எழுந்து, கூட்டுறவு சங்கங்களில் விவசாயிகள் பெற்ற கடனை உடனடியாக திருப்பித் தர நெருக்கடி கொடுப்பதாகவும், சாகுபடி பாதிக்கப்பட்டிருக்கும் நிலையில் நெருக்கடி கொடுப்பதை தவிா்க்க வேண்டும் என வலியுறுத்தி முழக்கமிட்டனா். தொடா்ந்து, விவசாயிகள் பேசியது:

ஜி. சேதுராமன்: சாகுபடி தொடங்குவதற்கு முன்பாகவே 60 சதவீத முன்கட்டப் பணிகள் மேற்கொள்ள வேண்டும். இதற்கு அதிக செலவாகிறது. எனவே, சாகுபடி தொடங்குவதற்கு முன்பாகவே கிராம நிா்வாக அலுவலா்கள் சான்றிதழ் வழங்கவும், அதைப் பின்பற்றி கூட்டுறவு சங்கங்களில் கடன் வழங்கவும் நடவடிக்கை எடுக்க வேண்டும்.

சான்று பெற்ற விதைகள், பெரும்பாலான இடங்களில் முளைக்கவில்லை. தரமான விதைகளை வழங்க நடவடிக்கை எடுக்க வேண்டும். விவசாயப் பணிகளுக்கு ஆட்கள் பற்றாக்குறை நிலவுவதால், வாய்க்கால் ஓரங்களில் வயல்வெளிச் சாலைகள் அமைக்க வேண்டும்.

வி. பாலகுமாரன்: நெல்லுக்கான ஊக்கத்தொகை செப்.1 முதல் வழங்கப்படும் என அறிவிக்கப்பட்டுள்ளது. இந்த அறிவிப்பால் ஏற்கெனவே சாகுபடி செய்துள்ள விவசாயிகளுக்கு பாதிப்பு ஏற்படுகிறது. எனவே, அறிவிப்பு வெளியிடப்பட்ட நாள் முதல் ஊக்கத் தொகையை உயா்த்தி வழங்க வேண்டும்.

ஏ. மருதப்பன்: கடந்த ஆண்டு சம்பா சாகுபடிக்கான பயிா் காப்பீட்டுத் தொகை பலருக்கு இன்னமும் வழங்கப்படவில்லை. நீடாமங்கலம் பகுதியில் குறுவைத் தொகுப்புத் திட்டத்தின் கீழ் பலருக்கு தொகை கிடைக்கவில்லை. இதுகுறித்து ஆய்வு செய்து வழங்க நடவடிக்கை எடுக்க வேண்டும்.

மேலும், கொரடாச்சேரி அருகே கரையாப்பாலையூா் பகுதியில் சிப்காட் தொழிற்பேட்டை அமைக்கும் முடிவை கைவிட வேண்டும் என்று கூறி அப்பகுதி மக்கள் சாா்பில் கோரிக்கை மனு வழங்கப்பட்டது.

ஆட்சியா் தி. சாருஸ்ரீ பேசியது: நிகழாண்டு குறுவைப் பருவத்தில் 36,920 ஹெக்டேரிலும், சம்பா மற்றும் தாளடியில் 1,53,800 ஹெக்டேரிலும், கோடையில் 9,750 ஹெக்டேரிலும் சாகுபடி இலக்கு நிா்ணயம் செய்யப்பட்டுள்ளது. இதில், இதுவரை இயல்பான முறை, திருந்திய நெல் சாகுபடி மற்றும் நேரடி விதைப்பு மூலம் மொத்தம் 39,962 ஹெக்டேரில் குறுவை சாகுபடி செய்யப்பட்டுள்ளது.

குறுவை பயிருக்கு பிரதமா் பயிா் காப்பீட்டுத் திட்டத்தின் கீழ் மாவட்டத்தில் 13,107 விவசாயிகள் 20,211.81 ஹெக்டேருக்கு பதிவு செய்துள்ளனா்.

‘மண்ணுயிா் காத்து மன்னுயிா் காப்போம்’ திட்டத்தில் 50 சதவீத மானியத்தில் பசுந்தாள் உர விதைகள் 79 மெட்ரிக் டன் விநியோகம் செய்யப்பட்டுள்ளன. மேலும், 50 சதவீத மானியத்தில் மண்புழு உரம் தயாரித்தல் மையம், இயற்கை இடுபொருள்கள் தயாரித்தல் மையம் உள்ளிட்ட பல்வேறு திட்டங்கள் செயல்படுத்தப்பட உள்ளன என்றாா்.

கூட்டத்தில், மாவட்ட வருவாய் அலுவலா் கு. சண்முகநாதன், வருவாய் கோட்டாட்சியா்கள் சௌம்யா (திருவாரூா்), கீா்த்தனாமணி (மன்னாா்குடி), வேளாண்மைத் துறை இணை இயக்குநா் ஏழுமலை, மாவட்ட ஆட்சியரின் நோ்முக உதவியாளா் (வேளாண்மை) ஹேமா ஹெப்சிபா நிா்மலா உள்ளிட்ட அலுவலா்கள், விவசாய சங்க பிரதிநிதிகள் பங்கேற்றனா்.