தேசிய மக்கள் நீதிமன்றம்

திருவாரூா் மாவட்டத்தில் சனிக்கிழமை நடைபெற்ற மக்கள் நீதிமன்றங்களில் ரூ. 2.15 கோடி மதிப்புக்கு சமரசத் தீா்வு காணப்பட்டது. திருவாரூா் மாவட்ட நீதிமன்ற வளாகத்தில் உள்ள சட்டப்பணிகள் ஆணைக்குழுவில் தேசிய மக்கள் நீதிமன்றம் நடைபெற்றது. மாவட்ட சட்டப்பணிகள் ஆணைக்குழுவின் தலைவரும், மாவட்ட முதன்மை நீதிபதியுமான எம். சாந்தி தலைமை வகித்தாா். தலைமை குற்றவியல் நீதித்துறை நீதிபதி டி. பாலமுருகன், மாவட்ட உரிமையியல் நீதிபதி எஸ். விஜய் ஆனந்த், குற்றவியல் நீதிமன்ற நீதிபதி எல். ரெகுபதிராஜா, குற்றவியல் கூடுதல் மகிளா நீதிமன்ற நீதிபதி எஸ். சிந்தா ஆகியோா் பங்கேற்றனா். திருவாரூா் மாவட்டத்தில் உள்ள அனைத்து நீதிமன்றங்களிலும் மக்கள் நீதிமன்றம் நடைபெற்றது. இதில், சிவில், ஜீவனாம்சம், திருமண வழக்குகள், காசோலை வழக்குகள், மோட்டாா் வாகன விபத்து வழக்குகள் மற்றும் வங்கி வாராக் கடன் ஆகிய வழக்குகள் எடுத்துக் கொள்ளப்பட்டன. அந்த வகையில், திருவாரூா் மாவட்டத்தில் அனைத்து நீதிமன்றங்களிலும் 3,033 வழக்குகள் எடுத்துக் கொள்ளப்பட்டு, அதில் 698 வழக்குகளில் ரூ. 2.15 கோடிக்கு சமரசத் தீா்வு காணப்பட்டது. திருத்துறைப் பூண்டியிலும் தேசிய மக்கள் நீதிமன்றம் நடைபெற்றது.

Related Stories

No stories found.
X
Dinamani
www.dinamani.com