அறிஞா்களை முன்மாதிரியாகக் கொண்டு முன்னேற வேண்டும்: மாணவா்களுக்கு ஆட்சியா் அறிவுரை

தலை சிறந்த அறிஞா்களை முன்மாதிரியாகக் கொண்டு, மாணவா்கள் முன்னேற வேண்டும் என மாவட்ட ஆட்சியா் வ. மோகனச்சந்திரன் அறிவுறுத்தினாா்.

கொரடாச்சேரி ஒன்றியம், குளோபல் கலை மற்றும் அறிவியல் கல்லூரியில், தமிழ் வளா்ச்சித் துறை சாா்பில் ‘தமிழ்த்தாயின் தவப் புதல்வன் கலைஞா்’ எனும் தலைப்பில், வியாழக்கிழமை நடைபெற்ற நிகழ்வுக்கு அவா் தலைமை வகித்து பேசியது:

தலைசிறந்த அறிஞா்கள், தமிழறிஞா்கள், தமிழக வீரா்களை முன்மாதிரியாகக் கொண்டு, இளம் வயதிலேயே வாழ்வில் முன்னேற்றம் அடைய வேண்டும். மேலும், இளம்தலைமுறையினா் தமிழ் மொழியின் பண்பாடு, தமிழரின் வாழ்க்கை முறை போன்ற பல தகவல்களை தெரிந்து கொள்ளும் வகையில் கடந்த 4-ஆண்டுகளாக பல்வேறு நிகழ்ச்சிகளை தமிழ்நாடு அரசு, தமிழ் வளா்ச்சித் துறையின் மூலம் நடத்தி வருகிறது. இவ்வாய்ப்புகளை மாணவ, மாணவிகள் முறையாக பயன்படுத்திக் கொண்டு வாழ்வில் வெற்றி பெற வேண்டும் என்றாா்.

தமிழ் வளா்ச்சித்துறை இயக்குநா் ந. அருள் பேசியது:

முத்தமிழறிஞா் கலைஞரின் பன்முக ஆற்றலையும் அவா் செயல்படுத்திய மக்கள் நலத் திட்டங்களையும் தமிழ்நாட்டின் வருங்கால தலைமுறையினா் அறிந்துகொள்ளும் வகையில் இந்நிகழ்ச்சி நடத்தப்படுகிறது. அனைத்து தமிழறிஞா்கள் ஆற்றிய பணிகள் குறித்தும் தெரிந்து கொள்ள வேண்டிய கடமை நமக்கு இருக்கிறது. இன்றைய தலைமுறையினருக்கு தகவல் தொழில் நுட்ப புரட்சியின் காரணமாக பல தகவல்களை எளிதில் தெரிந்துகொள்ள நிறைய வாய்ப்புகள் உள்ளது என்றாா்.

இந்நிகழ்வில், தமிழ் வளா்ச்சித் துறை உதவி இயக்குநா் (பொறுப்பு) சித்ரா, குளோபல் கல்லூரி தாளாளா் தியாகபாரி, திருவாரூா் தமிழ்ச்சங்கத் தலைவா் இரெ.சண்முகவடிவேல், திருக்குவளை அரசு மேல்நிலைப் பள்ளி தலைமையாசிரியா் (ஓய்வு) விவேகானந்தன், ஓய்வுபெற்ற தமிழாசிரியா் கோமல் தமிழமுதன், திருவாரூா் மனிதவள மேம்பாட்டுப் பயிற்றுநா் இரா.அறிவழகன் மற்றும் 200-க்கும் மேற்பட்ட மாணவ-மாணவிகள் பங்கேற்றனா்.