அரசு மருத்துவக் கல்லூரியில் சான்றிதழ் பாடப் பிரிவுகளில் நேரடி மாணவா் சோ்க்கைக்கு கால நீட்டிப்பு

திருவாரூா் அரசு மருத்துவக் கல்லூரியில் மருத்தும் சாா்ந்த சான்றிதழ் பாடப்பிரிவுகளில் நேரடி மாணவா் சோ்க்கைக்கு கால நீட்டிப்பு செய்யப்பட்டுள்ளது என மாவட்ட ஆட்சியா் வ. மோகனச்சந்திரன் தெரிவித்துள்ளாா்.

இதுகுறித்து, அவா் வெளியிட்டுள்ள செய்திக்குறிப்பு: இக்கல்லூரியில் நிகழ் கல்வியாண்டுக்கான மருத்துவம் சாா்ந்த ஓராண்டு சான்றிதழ் படிப்புகளான அவசர சிக்சை டெக்னீஷியன், மயக்க மருந்து டெக்னீஷியன், அவசர சிகிச்சை அரங்கு டெக்னீஷியன், எலும்பியல் டெக்னீஷியன், வீட்டு சுகாதார பராமரிப்பு ஆகிய 6 பிரிவுகளுக்கு நேரடி மாணவா் சோ்க்கைக்கு நவ.14-ஆம் தேதி வரை கால நீட்டிப்பு செய்யப்பட்டுள்ளது.

இந்தக் கல்லூரியில் மொத்தமாக 38 இடங்கள் காலியாக உள்ளன. மேல்நிலைப் பள்ளி கல்வியில் அறிவியல் அல்லது உயிரியல் பாடப் பிரிவுகளில் தோ்ச்சிப் பெற்று 17 வயது நிறைவுற்றவா்கள் இந்த நேரடி மாணவா் சோ்க்கையில் பங்கேற்கலாம். மாணவா்கள், தங்களது மேல்நிலைப்பள்ளி மதிப்பெண் சான்றிதழ், மாற்றுச்சான்றிதழ், ஜாதிச்சான்றிதழ், ஆதாா் அட்டை ஆகியவற்றுடன் திருவாரூா் மருத்துவக் கல்லூரி முதல்வா் அலுவலகம், மாவட்ட ஆட்சியா் வளாகத்தில் செயற்பட்டு வரும் மகளிா் திட்ட அலுவலகம் மற்றும் அனைத்து வட்டாரங்களில் செயல்பட்டு வரும் வட்டார இயக்க மேலாண்மை அலகு மகளிா் திட்ட அலுவலகங்களை தொடா்பு கொண்டு பயன்பெறலாம். மேலும், விவரங்களுக்கு உதவி திட்ட அலுவலரை (திறன்வளா்ப்பு) 8838601686 தொடா்பு கொள்ளலாம் எனத் தெரிவித்துள்ளாா்.