விளையாட்டு, உடற்பயிற்சி சாதனங்கள் மீதான ஜிஎஸ்டி வரியை குறைக்க வணிகர்கள் கோரிக்கை

விளையாட்டு, உடற்பயிற்சி சாதனங்கள் மீதான ஜிஎஸ்டி வரியை குறைக்க வேண்டும் என்று வணிகர்கள் சங்கம் கோரிக்கை விடுத்துள்ளது.
இது தொடர்பாக விளையாட்டு உடற்பயிற்சி சாதனங்கள் வணிகர்கள் சங்க கூட்டமைப்பின் தலைவர் தினேஷ் கபூர் செய்தியாளர்களிடம் வியாழக்கிழமை கூறியது:
உடல் நலன் சார்ந்த சிறந்த சமூகத்தை உருவாக்க வேண்டும். விளையாட்டில் இந்தியா, உலக அளவில் சிறப்பாகத் திகழ வேண்டும். வாழ்வுமுறை நோய்கள் அதிகரித்து வரும் சூழலில் ஆரோக்கியமான வாழ்வு முறையை ஊக்கப்படுத்த வேண்டும்.
எனவே, உடற்பயிற்சி சாதனங்களையும் விளையாட்டுப் பொருள்களாகக் கருத வேண்டும். ஈட்டி எறிதல், உயரம் தாண்டுதல் ஆகியவற்றுக்குப் பயன்படுத்தப்படும் விரிப்பு, ஸ்பைக்டு ஷுக்கள், தடகளப் போட்டிகளில் பயன்படுத்தப்படும் விளையாட்டுப் பொருள்கள், உடற்பயிற்சிக் கூடத்தில் பயன்படுத்தப்படும் சாதனங்கள், யோகா விரிப்பு, எடை தூக்கிகள், ஜிம் பந்துகள், உடற்பயிற்சி பைக் ஆகியவற்றுக்கு 28 சதவீதம் வரி விதிக்க உத்தேசிக்கப்பட்டுள்ளது. இதனால், உடற்பயிற்சி சாதனங்களின் விற்பனை ரூ.500 கோடி அளவுக்கு சரியும் என மதிப்பிடப்படுகிறது.
எனவே, விளையாட்டு, உடற்பயிற்சி சாதனங்கள் மீதான ஜிஎஸ்டி வரியை 12 சதவீதமாக குறைக்க வேண்டும் என்ற வணிகர்களின் கோரிக்கையை ஜிஎஸ்டி கவுன்சில் பரிசீலிக்க வேண்டும் என்றார் தினேஷ் கபூர்.