Enable Javscript for better performance
தனியார் மருத்துவமனைகளில் இலவச சிகிச்சை திட்டத்துக்கு துணைநிலை ஆளுநர் எதிர்ப்பு: சத்யேந்தர் ஜெயின் கு- Dinamani

சுடச்சுட

    

    தனியார் மருத்துவமனைகளில் இலவச சிகிச்சை திட்டத்துக்கு துணைநிலை ஆளுநர் எதிர்ப்பு: சத்யேந்தர் ஜெயின் குற்றச்சாட்டு

    By DIN  |   Published on : 03rd January 2018 12:30 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    தனியார் மருத்துவமனைகளில் நோயாளிகள் இலவசமாக சிகிச்சை எடுத்துக் கொள்ளும் திட்டத்துக்கு துணைநிலை ஆளுநர் அனில் பய்ஜால் எதிர்ப்பு தெரிவித்து பல்வேறு கேள்விகளை எழுப்பியுள்ளதாக தில்லி சுகாதாரத் துறை அமைச்சர் சத்யேந்தர் ஜெயின் குற்றம்சாட்டினார். இதுகுறித்து சத்யேந்தர் ஜெயின் செய்தியாளர்களிடம் செவ்வாய்க்கிழமை கூறியதாவது:
    தனியார் மருத்துவமனையில் இலவச சிகிச்சைப் பெறும் திட்டத்தை கடந்த மாதம் 12-ம் தேதி தில்லி அமைச்சரவை நிறைவேற்றி துணைநிலை ஆளுநர் ஒப்புதலுக்காக அனுப்பி வைக்கப்பட்டது.
    அதில், ஒரு  மாதத்திற்குள் அரசு மருத்துவமனைகளில் நோயாளிக்கு அறுவை சிகிச்சை அளிக்கப்படவில்லை என்றால், அவர் தனியார் மருத்துவமனையில் இலவச சிகிச்சைப் பெற்று கொள்ளலாம். 
    தில்லிவாசியாக இருந்தால்போதும் அவர் இந்தத் திட்டத்தில் பயன் பெறலாம் என்று தெரிவிக்கப்பட்டிருந்தது. ஆனால், இந்தத் திட்டத்தின் பயனாளிகள் தங்களின் வருமானச் சான்றிதழை இணைத்தால் மட்டும் பயன்பெற முடியும் என்று துணைநிலை ஆளுநர் கடிதம் மூலம் தெரிவித்துள்ளார். 
    இந்த நடைமுறையால் நோயாளிகள் கடுமையாக பாதிக்கப்படுவர். உதாரணமாக, தில்லி அரசு மருத்துவமனையில் இல்லாத மருத்துவ பரிசோதனையைச் செய்ய நோயாளிக்கு மருத்துவர் பரிந்துரைத்திருந்தால், அந்த நோயாளி நேரடியாக அரசு அங்கீகரித்துள்ள தனியார் மருத்துவமனைக்கு சென்று பரிசோதனையை முடித்துக் கொண்டு அரசு மருத்துவரிடம் மருத்துவ அறிக்கையை சமர்ப்பிக்கலாம். ஆனால், துணைநிலை ஆளுநரின் புதிய நெறிமுறையின்படி, அந்த நோயாளி முதலில் மாவட்ட ஆட்சியரிடம் சென்று வருமானச் சான்றிதழ் பெற்று பின்னர்தான் சிகிச்சைப் பெற முடியும். 
    இதனால் போலி வருமானச் சான்றிதழ்களைப் பெற லஞ்சம் ஊக்குவிக்கப்படும். உரிய நேரத்தில் நோயாளிகள் சிகிச்சைப் பெற முடியாது. இதனால் சில நேரங்களில் உயிரிழப்புகள் ஏற்பட வாய்ப்புகள் உள்ளன. வருமானச் சான்றிதழ் சரிபார்ப்பதற்காகவே புதிய அதிகாரிகளை நியமனம் செய்ய வேண்டியிருக்கும். 
    ஏற்கெனவே தில்லி அரசு மருத்துவமனைகளில் மருத்துவர்கள், துணை மருத்துவர்கள், மருந்தகத்தினர் உள்பட ஏராளமான பணியிடங்கள் காலியாக உள்ளன. அவற்றை நிரப்ப வேண்டும் என்று தொடர்ந்து துணைநிலை ஆளுநருக்கு கடிதங்கள் எழுதி வலியுறுத்தி வருகிறோம். 
    சுகாதாரத்துறை சேவைகளை அனைவருக்கும் வழங்க வேண்டும் என்பதுதான் தில்லி அரசின் கொள்கையாகும். தில்லி அரசின் இதுபோன்ற பல்வேறு முற்போக்கான திட்டங்களுக்கு துணைநிலை ஆளுநர் பல்வேறு தடைகளை ஏற்படுத்தி வருகிறார். 
    இதனால் தில்லியை ஆட்சி செய்வதே கடினமாக உள்ளது. இதுபோன்ற முடிவுகள் எடுக்கும் முன்பு முதல்வரையோ அல்லது துறை அமைச்சரையோ துணைநிலை ஆளுநர் கலந்து ஆலோசிக்க  வேண்டும். 
    இலவச சிகிச்சை குறித்து தில்லி துணைநிலை ஆளுநர் எழுப்பியுள்ள கேள்விகளுக்கு தில்லி அரசு தகுந்த பதிலளிக்கும் என்றார் சத்யேந்தர் ஜெயின்.
     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai