Enable Javscript for better performance
சேலம் - கரூர் பயணிகள் ரயிலை திருச்சி வரை நீட்டிக்க வேண்டும்: மக்களவையில் நாமக்கல் எம்பி வலியுறுத்தல்- Dinamani

சுடச்சுட

    

    சேலம் - கரூர் பயணிகள் ரயிலை திருச்சி வரை நீட்டிக்க வேண்டும்: மக்களவையில் நாமக்கல் எம்பி வலியுறுத்தல்

    By DIN  |   Published on : 04th January 2018 12:29 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    சேலம்-கரூர் பயணிகள் ரயில் திருச்சி வரை நீட்டிக்கப்பட வேண்டும் என்று மக்களவையில் நாமக்கல் தொகுதி அதிமுக உறுப்பினர் பி.ஆர்.சுந்தரம் வலியுறுத்தினார்.
    இது தொடர்பாக மக்களவையில் புதன்கிழமை விதி எண் 377-இன் கீழ் அவர் முன்வைத்த கோரிக்கை: 
    சேலம்  -  கரூர் பயணிகள் ரயில் (வ.எண்: 56105) நீண்ட காலமாக இயக்கப்பட்டு வருகிறது. வர்த்தகர்கள், மாணவர்கள், வேலைக்குச் செல்வோர் உள்ளிட்ட பல தரப்பினர் இந்த ரயில் சேவையால் மிகுந்த பயனடைந்து வருகின்றனர். இந்த ரயில் சேலம்,  ராசிபுரம், நாமக்கல், கரூர் ஆகிய பகுதிகளை இணைக்கிறது.  ஆனால், சேலம் கோட்டத்தில் போதுமான அளவில் ரயில்களை தெற்கு  ரயில்வே நிர்வாகம் இயக்குவதில்லை என்ற வருத்தம்  பயணிகளிடம் உள்ளது.  சேலம் - பழனி விரைவு ரயில் பாலக்காடு வரை நீட்டிக்கப்பட்டது.  அதேபோன்று, சேலம் - கரூர் பயணிகள் ரயிலை திருச்சி வரை ஏன் நீட்டிக்கக் கூடாது?  வருவாய் இழப்பு,  இதர பிற காரணங்களுக்காக இந்த ரயில் சேவையை ரத்து செய்வதற்கான முன்மொழிவு ரயில்வே துறையிடம் இருப்பதாகக் கூறப்படுகிறது.
    இந்த ரயில் சேவை திருச்சி வரை நீட்டிக்கப்பட்டால் ரயில்வே துறைக்கு கூடுதல் வருவாய் கிடைக்கும் என்பதை  அமைச்சரின் கவனத்திற்குக் கொண்டு வர விரும்புகிறேன்.  இது தொடர்பாக மக்களவையில் பலமுறை கோரிக்கை வைத்துள்ளேன்.  ரயில்வே அமைச்சரிடமும் முறையிட்டுள்ளேன். ஆகவே,  சேலம்- கரூர் ரயிலை திருச்சி வரை நீட்டிப்பது குறித்து ரயில்வே அமைச்சர் பரிசீலிக்குமாறு மீண்டும் கேட்டுக் கொள்கிறேன் என்றார் அவர். 

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai