Enable Javscript for better performance
கேந்திரிய வித்யாலயா பள்ளி ஆசிரியர் தேர்வு: ஹிந்தி மொழி கட்டாயத்தை நீக்க மாநிலங்களவையில் அதிமுக வலியு- Dinamani

சுடச்சுட

    

    கேந்திரிய வித்யாலயா பள்ளி ஆசிரியர் தேர்வு: ஹிந்தி மொழி கட்டாயத்தை நீக்க மாநிலங்களவையில் அதிமுக வலியுறுத்தல்

    By DIN  |   Published on : 06th January 2018 12:26 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    கேந்திரிய வித்யாலயா பள்ளி ஆசிரியர் பணியிடங்களுக்கான தேர்வுகளில் பங்கேற்பவர்கள் ஹிந்தி மொழி அறிந்திருப்பது கட்டாயமக்கப்பட்டுள்ளதை நீக்கக் கோரி மாநிலங்களவையில் அதிமுக உறுப்பினர் டி. ரத்தினவேலு வலியுறுத்தினார்.
    இது தொடர்பாக அவர் மாநிலங்களவையில் வெள்ளிக்கிழமை முன்வைத்த கோரிக்கை:
    இந்தியாவில் மொத்தம் 1,125 கேந்திரிய வித்யாலயா பள்ளிகள் இயங்கி வருகின்றன. தமிழகத்தில் மட்டும் 41 கேந்திரிய வித்யாலயா பள்ளிகள் உள்ளன. மொத்தம் 12 லட்சம் மாணவர்கள் பயிலும் கேந்திரிய வித்யாலயா பள்ளிகளில் 15,800 ஆசிரியர்களை பணியமர்த்த மத்திய அரசு அனுமதித்துள்ளது. ஒவ்வொரு ஆண்டும் காலியாக உள்ள ஆசிரியர் பணியிடங்களுக்கான தேர்வு நடத்தப்படுகிறது. தமிழகத்திலிருந்து ஆயிக்கணக்கானோர் இத்தேர்வில் பங்கேற்கின்றனர். ஆனால், 1986 -ஆம் ஆண்டிற்கு பிறகு கேந்திரிய வித்யாலயா பள்ளிகளில் பணியாற்ற அனைத்து ஆசிரியர்களுக்கும் ஹிந்தி தெரிந்திருப்பது கட்டாயம் என கேந்திரிய வித்யாலயா சங்கதன் ஆணையிட்டது துரதிருஷ்டமாகும். தமிழகத்தில் உள்ள பள்ளிகளில் ஹிந்தி கற்பிக்கப்படுவதில்லை. ஹிந்தி தெரியாத ஒரே காரணத்தால் நன்கு படித்த தமிழ்நாட்டு இளைஞர்கள் இத்தேர்வுகளில் பங்கேற்க முடியாமல் போகிறது. 
    கடந்த 30 ஆண்டுகளாக இந்த விதிமுறை இருந்து வருகிறது. இந்நிலையில், தற்போது ஆசிரியர் பணியிடங்களுக்கான தேர்வில் ஹிந்தி தேர்வும் ஓர் அங்கமாக அறிமுகப்படுத்தப்பட்டுள்ளது. இது தமிழ்நாட்டிலிருக்கும் ஹிந்தி அறியாத, நன்கு படித்த தகுதி வாய்ந்தவர்களை முற்றிலுமாகப் புறக்கணிக்கும் செயலாகும். இது நமது அரசியலமைப்புச் சட்டத்திற்கு புறம்பானதாகும். இந்த விதிமுறை காரணமாக ஆண்டுதோறும் தமிழ்நாட்டிலுள்ள நன்கு தகுதி வாய்ந்த படித்த இளைஞர்கள் ஆயிரக்கணக்கானோர் கேந்திரிய வித்யாலயா பள்ளி ஆசிரியர் பணியிடங்களுக்கான தேர்வுக்கு விண்ணப்பிக்க இயலாத நிலை உள்ளது. எனவே கேந்திரிய வித்யாலயா பள்ளி ஆசிரியர் பணியிடங்களுக்கான தேர்வுக்கு விண்ணப்பிக்க ஹிந்தியைக் கட்டாயமாக்கியுள்ளதை நீக்க வேண்டும். மேலும், ஹிந்தி மொழி ஆசிரியர் பணி தவிர்த்து மற்றஅனைத்து பாடங்களுக்கும் தகுதி வாய்ந்த அனைவரும் விண்ணப்பித்து, தேர்வு எழுதலாம் என்ற நிலையை மீண்டும் உருவாக்க மத்திய அரசு நடவடிக்கை எடுக்க வேண்டும் என்று அவர் கேட்டுக் கொண்டார்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai