Enable Javscript for better performance
சுற்றுச்சூழல் பாதுகாப்பு விதிகளில் பட்டாசுக்கு நிரந்தர விலக்கு வேண்டும்: மத்திய அரசுக்கு பட்டாசு தயா- Dinamani

சுடச்சுட

    

    சுற்றுச்சூழல் பாதுகாப்பு விதிகளில் பட்டாசுக்கு நிரந்தர விலக்கு வேண்டும்: மத்திய அரசுக்கு பட்டாசு தயாரிப்பாளர்கள் சங்கம் வலியுறுத்தல்

    By DIN  |   Published on : 11th January 2018 04:46 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    சுற்றுச்சூழல் பாதுகாப்பு விதியில் இருந்து பட்டாசுக்கு நிரந்தர விலக்கு அளிக்க நடவடிக்கை எடுக்க வேண்டும் என்று மத்திய சுற்றுச்சூழல், வனத் துறை அமைச்சர் டாக்டர் ஹர்ஷ் வர்தனுக்கு தமிழ்நாடு பட்டாசு மற்றும் கேப்வெடி தயாரிப்பாளர்கள் சங்கம் வலியுறுத்தியுள்ளது. 
    இது தொடர்பாக தில்லியில் உள்ள அமைச்சர் ஹர்ஷ் வர்தன் அலுவலகத்தில் தமிழ்நாடு பட்டாசு மற்றும் கேப்வெடி தயாரிப்பாளர்கள் சங்கத்தின் தலைவர் ஏ.ஆசைத்தம்பி எழுதியுள்ள கோரிக்கைகள் அடங்கிய மனுவை அச்சங்கத்தின நிர்வாகக் குழு உறுப்பினர் வி.எஸ்.எம். வேல்முருகன் அளித்தார். 
    அதில் "அகில இந்திய அளவில் பட்டாசுக்கு தடை விதிக்கக் கோரி உச்ச நீதிமன்றத்தில் தாக்கல் செய்யப்பட்டுள்ள மனுவை, இத்தொழிலைச் சார்ந்த ஒரு கோடி தொழிலாளர்களின் வேலைவாய்ப்பு இழப்பை கருத்தில் கொண்டு உடனடியாக விசாரித்து பைசல் செய்ய வேண்டும். மேலும், பட்டாசு தொழிலைப் பாதுகாக்கும் நோக்கில் மத்திய அரசும், தமிழக அரசும் தேவையான அனைத்து முயற்சிகளையும் எடுக்க வேண்டும். சுற்றுச்சூழல் பாதுகாப்பு விதிகள், 1986-இன் விதி 3பி-இல் இருந்து பட்டாசுக்கு விலக்கு அளித்து நிரந்தரத் தீர்வு காண வேண்டும்' என்று கோரப்பட்டுள்ளது.
    இதுகுறித்து வி.எஸ்.எம். வேல்முருகன் செய்தியாளர்களிடம் கூறியதாவது: 
    கடந்த தீபாவளியை ஒட்டி தில்லியில் பட்டாசு விற்பனைக்கு தடை விதிக்கப்பட்டது. சுற்றுச்சூழல் மாசுவுக்கு பட்டாசுதான் காரணம் என மாசுக் கட்டுப்பாடு வாரியம் தெரிவித்தது. இந்நிலையில், சுற்றுச்சூழல் மாசுவைக் கட்டுப்படுத்த இந்தியா முழுவதும் பட்டாசுக்கு தடை விதிக்க வேண்டும் என்று உச்ச நீதிமன்றத்தில் மனு தாக்கல் செய்யப்பட்டுள்ளது. இந்த விவகாரத்தில் மத்திய அரசின் சுற்றுச்சூழல் துறையின் சார்பில் உச்ச நீதிமன்றத்தில் பதில் மனு தாக்கல் செய்யும் போது சுற்றுச்சூழல் பாதிப்புக்கு பட்டாசு மட்டுமே காரணம் அல்ல என்பதை வலியுறுத்துமாறு கோரி அமைச்சரின் அலுவலகத்தில் மனு அளித்துள்ளோம்.
    தில்லியைச் சார்ந்து அதைச் சுற்றியுள்ள 8 மாநிலங்களுக்கு பட்டாசுகள் விநியோகம் செய்யும் நிலை உள்ளது. இந்நிலையில், தில்லியில் பட்டாசு விற்கக் கூடாது என்று உத்தரவு பிறப்பிக்கப்பட்டதால் அதை ஒட்டியுள்ள பிற மாநிலங்களிலும் பட்டாசு விற்பனை கடுமையாகப் பாதிக்கப்பட்டது. 
    தீபாவளி பண்டிகைக்காக ஆண்டு முழுவதும் பட்டாசு உற்பத்தி சிவகாசி உள்ளிட்ட பகுதிகளில் நடைபெற்று வருகிறது. தற்போது இந்த விவகாரம் தொடர்பான வழக்கு நீதிமன்றத்தில் இருப்பதால், தில்லி மற்றும் அண்டைய மாநிலங்களைச் சேர்ந்த பட்டாசு வியாபாரிகள் ஆர்டர்களை வழங்காமல் உள்ளனர். இதனால், 10 நாள்களுக்கு மேலாக சிவகாசியில் பட்டாசு ஆலைகள் மூடப்பட்டுள்ளன. 8 லட்சம் தொழிலாளர்களின் வாழ்வாதாரம் பாதிக்கப்பட்டுள்ளது. பட்டாசு உற்பத்தியில் ஈடுபடும் விருதுநகர், தூத்துக்குடி மாவட்டங்கள் மிகவும் பாதிக்கப்பட்டுள்ளன. 
    இதனால், இந்த விவகாரம் தொடர்பாக அமைச்சர் ஹர்ஷ் வர்தன் அலுவலகத்தில் மனு அளிக்கப்பட்டுள்ளது. வியாழக்கிழமை அமைச்சரை நேரில் சந்தித்தும் இந்த விவகாரம் தொடர்பாக சங்கத்தின் முக்கிய நிர்வாகிகள் முறையிட உள்ளனர் என்றார். 
     

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai