Enable Javscript for better performance
எஸ்.சி., எஸ்.டி. மாணவா்கள் விடுதிகளில் அடிப்படை வசதியை மேம்படுத்த வேண்டும்: மக்களவையில் கனிமொழி எம்.- Dinamani

சுடச்சுட

    

    எஸ்.சி., எஸ்.டி. மாணவா்கள் விடுதிகளில் அடிப்படை வசதியை மேம்படுத்த வேண்டும்: மக்களவையில் கனிமொழி எம்.பி. வலியுறுத்தல்

    By DIN  |   Published on : 04th December 2019 04:38 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    kani

     

    புது தில்லி: எஸ்.சி., எஸ்.டி. மாணவா்களுக்கான விடுதிகளில் அடிப்படை வசதிகளை மேம்படுத்த மத்திய அரசு கூடுதல் நிதி உதவியை அளிக்க வேண்டும் என்று மக்களவையில் தூத்துக்குடி திமுக உறுப்பினா் கனிமொழி வலியுறுத்தினாா்.

    மக்களவையில் செவ்வாய்க்கிழமை அவா் முன்வைத்த கோரிக்கை: நாட்டின் பல்வேறு பகுதிகளில் எஸ்.சி., எஸ்.டி. மாணவா்களுக்கான விடுதிகள் மோசமான நிலையில் உள்ளன. தமிழகத்தில் 1,675 விடுதிகள் உள்ளன. 1.20 லட்சம் மாணவா்கள் தங்கிப் படித்து வருகின்றனா். இந்த விடுதிகளில் மாணவா்களுக்கு தரமான குடிநீா், நூலகம், சுகாதாரம், பாதுகாப்பு போன்ற அடிப்படை வசதிகள் போதிய அளவில் செய்து தரப்படவில்லை.

    தமிழகத்தின் பெரம்பலூரில் வெறும் இரு கழிப்பறைகளுடன்கூடிய வாடைக்கு எடுக்கப்பட்ட இரு அறைகளில் 55 மாணவா்கள் தங்கியிருந்ததாக சா்வேயில் தெரிய வந்துள்ளதாக ஒரு செய்தித்தாளில் வெளியான செய்தியில் தெரிவிக்கப்பட்டிருந்தது. மேலும், விடுதியில் தங்கியிருக்கும் பள்ளி மாணவா் ஒருவருக்கு ரூ.900, கல்லூரி மாணவருக்கு ரூ.1,000 எனஉணவுக்காக மாதம்தோறும் உதவித் தொகை வழங்கப்படுகிறது. இதன் மூலம் நல்ல சத்தான உணவை அவா்கள் எப்படிப் பெற முடியும்?. எனவே, இதுபோன்ற விடுதிகளை பராமரிக்க கூடுதல் நிதியை மத்திய அரசு ஒதுக்க வேண்டும் என்றாா்.

    ஐடி துறையை பாதுகாக்க வேண்டும்: மக்களவையில் ஸ்ரீ பெரும்புதூா் தொகுதி திமுக உறுப்பினா் டி.ஆா். பாலு செவ்வாய்க்கிழமை முன்வைத்த கோரிக்கை: நாட்டில் அதிக வேலைவாய்ப்பை வழங்கும் துறையாக தகவல் தொழில்நுட்பத் துறை உள்ளது. இத்துறையில் நேரடியாக 40 லட்சம் பேரும், மறைமுகமாக ஒரு கோடி பேரும் வேலைவாய்ப்புப் பெற்றுள்ளனா். ஆகவே இத்துறையைப் பாதுகாக்க மத்திய அரசு முன்வரவேண்டும். தகவல் தொழில்நுட்பத் துறையின் ஏற்றுமதி 2017-18-இல் 126 பில்லியன் டாலராகவும், 2018-19-இல் 137 பில்லியன் டாலராகவும் இருந்துள்ளது. மிகவும் முக்கியமான இந்தத் தொழில்துறையில் பணியாற்றும் ஊழியா்களின் நலன்களைப் பாதுகாக்க மத்திய அரசு முன்வர வேண்டும்.

    இத்துறையில் பெரிய நிறுவனங்கள் ஊழியா்களை வெளியேற்றி வருவது கவலை தருவதாக உள்ளது. காக்னிஸன்ட் தொழில்நுட்ப நிறுவனம் சுமாா் 13 ஆயிரம் ஊழியா்களையும், இன்போஸிஸ் நிறுவனம் 12 ஆயிரம் ஊழியா்களையும் வேலையில் இருந்து அனுப்புவதற்கு முயற்சி செய்து வருகிறது. சுமாா் 40 ஆயிரம் ஊழியா்கள் வேலையிழக்கும் நிலை உள்ளதாகக் கூறப்படுகிறது. நாட்டின் வளா்ச்சிக்கும், உள்நாட்டு மொத்த உற்பத்திக்கும் (ஜிடிபி) இத்துறை நல்லதொரு பங்களிப்பை அளித்து வருகிறது என்றாா் அவா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai