Enable Javscript for better performance
ஹைதராபாத் சம்பவம்: மக்களவையில் அனைத்துக் கட்சி எம்பிகள் கண்டனம்- Dinamani

சுடச்சுட

    

    ஹைதராபாத் சம்பவம்: மக்களவையில் அனைத்துக் கட்சி எம்பிகள் கண்டனம்

    By DIN  |   Published on : 03rd December 2019 01:14 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    புது தில்லி: மக்களவையில் திங்கள்கிழமை கேள்வி நேரம் முடிந்ததும் உடனடிக் கேள்வி நேரத்தின்போது, பெண்களுக்கு எதிராக நிகழ்ந்து வரும் குற்றங்கள் குறித்து உறுப்பினா்கள் பேசுவதற்கு அவைத் தலைவா் ஓம் பிா்லா அனுமதி அளித்தாா். இதில் அரசியல் கட்சிகளைச் சோ்ந்த உறுப்பினா்கள் அனைவரும் ஹதராபாத் சம்பவம் உள்ளிட்ட பெண்களுக்கு எதிரான குற்றங்கள் அதிகரித்து வருவதற்கு கடும் கண்டனம் தெரிவித்தனா்.

    தெலங்கானாவைச் சோ்ந்த காங்கிரஸ் உறுப்பினா் உத்தம் குமாா் ரெட்டி பேசுகையில், ஹைதராபாதில் இளம் கால்நடை பெண் மருத்துவக்கு நிகழ்ந்த சம்பவம் மிகவும் மனவலி தரக்கூடியதாகவும், மனிதத் தன்மையற்ாகவும் உள்ளது. இந்தச் சம்பவம் குறித்து உணா்வுபூா்மற்ற வகையில் தெலங்கானா உள்துறை அமைச்சா் கருத்து தெரிவித்திருப்பது சரியல்ல.

    சம்பவம் குறித்து பெற்றோா் புகாா் அளிக்க சென்றபோது போலீஸாா் மெத்தனத்துடன் நடந்து கொண்டு தாமதம் செய்துள்ளனா். தெலங்கானாவில் மது பானம் விற்கப்படுவதும் இதுபோன்ற துரதிஷ்டவசமான சம்பங்கங்களுக்கு காரணமாகும். ஆகவே, இதுபோன்ற வழக்குகளை விரைவு நீதிமன்றங்கள் மூலம் விசாரித்து குற்றம்சாட்டப்பட்ட நபா்கள் தூக்கிலிடப்பட வேண்டும் என வலியுறுத்தினா்.

    ஸ்ரீபெரும்புதூா் தொகுதி திமுக உறுப்பினா் டி.ஆா். பாலு பேசுகையில், ‘தமிழகத்தில் உள்ள கோயம்புத்தூரில் பள்ளி மாணவி ஒருவா் பாலியல் பலாத்காரத்திற்கு உள்ளாக்கப்பட்டுள்ளாா்.இந்தக் குற்றச் சம்பவத்தில் தொடா்புடையவா்கள் தண்டிக்கப்பட வேண்டும். அரசு உடனடியாக உரிய காலத்திற்குள் நடவடிக்கை எடுப்பதை உறுதிப்படுத்த முன்வர வேண்டும்’ என்றாா்.

    கரூா் தொகுதி காங்கிரஸ் உறுப்பினா் ஜோதிமணி பேசுகையில், ‘தமிழகத்தில் கோயம்புத்தூரில் 17 வயது பெண் பலாத்காரத்திற்கு உள்ளாக்கப்பட்டுள்ளாா். அதற்கு முன்பாக பொள்ளாட்சியில் நூற்றுக்கணக்கான பெண்கள் மிரட்டி பலாத்காரத்திற்கு உள்ளாக்கப்பட்டனா். இந்தச் சம்பவம் தமிழ்நாட்டையே உலுக்கியது. சட்டம் இருக்கிறது ஆனால், உரிய வகையில் அமல்படுத்தப்படுவதில்லை. நாட்டில் ஒவ்வொரு நாளும், ஒவ்வொரு நிமிடமும், நொடியும் பெண்கள் பாலியல் பலாத்கார துன்புறுத்தலுக்கு உள்ளாகி வருகின்றனா். இதற்கு முடிவு கட்டுவது அவசியமாகும்’ என்றாா்.

    திரிணமூல் காங்கிரஸ் உறுப்பினா் செளகதா ராய் பேசுகையில், இது ஒரு கொடூரமான கொலைச் சம்பவம். நிா்பயா சம்பவத்திற்குப் பிறகு கடுமையான சட்டங்கள் இயற்றப்பட்ட பிறகும்கூட பாலியல் பலாத்கார சம்பவங்கள் இன்னும் நிகழ்ந்துகொண்டிருக்கின்றன. இதுபோன்ற சம்பவங்களை இந்த அவை கவனத்தில் எடுத்துக்கொண்டு, பாலியல் குற்றத்திற்கு மரண தண்டனை வழங்கும் சட்டத்தை உடனடியாக உருவாக்க மத்திய அரசை வலியுறுத்த வேண்டும்’ என்றாா்.

    பாஜக உறுப்பினா் பாந்தி சஞ்சய் குமாா் பேசுகையில், இதுபோன்ற சம்பவங்களுக்கு சம்பவ இடத்திலேயே தண்டனை அளிக்கப்பட வேண்டும் என்றாா்.

    பிஜேடி உறுப்பினா் நிா்பயா வழக்கில் மரண தண்டனை பெற்றவா்களுக்கு தண்டனை நிறைவேற்றுவதில் இன்னும் தாமதம் ஆகிக் கொண்டிருக்கிறது. தண்டனை பெற்றவா்களுக்கு தண்டனை நிறைவேற்றப்படாத வரை சட்டங்களும், விரைவு நீதிமன்றங்கள் அமைப்பதும் எந்த ஒரு மாற்றத்தையும் உருவாக்காது. ஆகவே, இந்த விவகாரத்தில் அனைவரும் ஒரே குரலில் பேச வேண்டும் என்றாா்.

    தேசியவாதக் காங்கிரஸ் உறுப்பினா் சுப்ரியா சுலே பேசுகையில், ‘இதுபோன்ற சம்பவங்களில் சகிப்புத்தன்மை அறவே கூடாது. ஒவ்வொரு ஆணும்கூட பாதுகாப்புக்கு தகுதி உடைவா்கள்தான்’ என்றாா்.

    தெலங்கானா ராஷ்டிர சமிதி எம்பி கொத்த பிரபாகா் ரெட்டி பேசுகையில், இது மிகவும் அவமானகரமான செயலாகும். இதுபோன்ற சம்பவங்களைக் கட்டுப்படுத்த ஒரு சட்டத்தை கொண்டு வர வேண்டும் என்றாா்.

    ஹைதராபாத் உள்ளிட்ட பெண்களுக்கு எதிரான சம்பவங்களுக்கு கண்டனம் தெரிவித்து அப்னா தளம் கட்சி உறுப்பின் அனுப்பிரியா படேல், சிவசேனை கட்சி எம்பி விநாயக் ரெளத், பகுஜன் சமாஜ் கட்சி உறுப்பினா் தனிஷ் அலி உள்ளிட்டோரும் பேசினா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai