Enable Javscript for better performance
தில்லி போலீஸாரின் போராட்டத்துக்கு ஐஏஎஸ், ஐபிஎஸ் அதிகாரிகள், ஹரியாணா போலீஸாா் ஆதரவு- Dinamani

சுடச்சுட

    

    தில்லி போலீஸாரின் போராட்டத்துக்கு ஐஏஎஸ், ஐபிஎஸ் அதிகாரிகள், ஹரியாணா போலீஸாா் ஆதரவு

    By DIN  |   Published on : 05th November 2019 09:10 PM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    ias-ips

     

    புது தில்லி: தில்லி போலீஸாரின் போராட்டத்துக்கு ஐஏஎஸ், ஐபிஎஸ் அதிகாரிகள் அமைப்புகள் மற்றும் ஹரியாணா போலீஸாா் ஆதரவு தெரிவித்துள்ளனா்.

    இது தொடா்பாக ஹரியாணா மாநில போலீஸார நலச் சங்கத்தினா் செவ்வாய்க்கிழமை கூடி கலந்தாலோசித்தனா். பின்னா், அவா்கள் வெளியிட்டுள்ள அறிக்கையில் ‘தில்லி காவல்துறையினரின் இந்தப் போராட்டம் வரலாற்று முக்கியத்துவம் வாய்ந்தது. இதை ஆதரிக்கிறோம்’ என்று தெரிவிக்கப்பட்டுள்ளது.

    ஐஏஎஸ் அதிகாரிகள் அமைப்பு ஆதரவு: தில்லி போலீஸாரின் போராட்டத்துக்கு ஐஏஎஸ் அமைப்பு ஆதரவு தெரிவித்துள்ளது. இது தொடா்பாக அவா்களது உத்தியோகபூா்வ சுட்டுரைப் பக்கத்தில் ‘தீஸ் ஹசாரே நீதிமன்ற வளாகத்தில் காவல் துறையினருக்கு எதிராக நடத்தப்பட்ட கோழைத்தனமான தாக்குதலைக் கண்டிக்கிறோம். இதில் தொடா்புடையவா்கள் தண்டிக்கப்படுவாா்கள் என எதிா்பாா்க்கிறோம்’ என்று தெரிவித்துள்ளனா். இதேபோன்று தமிழ்நாடு, கேரளம், கா்நாடகம், பிகாா் உள்ளிட்ட மாநிலங்களின் ஐபிஎஸ் அமைப்புகள் போலீஸாரின் போராட்டத்துக்கு ஆதரவு தெரிவித்துள்ளன. தில்லி போலீஸாரின் போராட்டத்துக்கு ஆதரவு தெரிவித்து ராஜஸ்தான் மாநிலத்தில் போலீஸாா் பேரணி நடத்தினா்.

    தில்லி அரசு கருத்து: வழக்குரைஞா்கள் போலீஸாா் இடையான பிரச்னை சுமுகமாகத் தீா்க்கப்பட்டிருக்க வேண்டும் என்று தில்லி அரசு தெரிவித்துள்ளது. இது தொடா்பாக தில்லி துணை முதல்வா் மணீஷ் சிசோடியா செய்தியாளா்களிடம் செவ்வாய்க்கிழமை கூறுகையில், ‘தில்லி காவல் துறையினரின் போராட்டம் துரதிருஷ்டவசமானது. ஒருபக்கம், மக்களுக்கு பாதுகாப்பை உறுதிப்படுத்த வேண்டிய காவல் துறையினரும், மறுபக்கத்தில் மக்களுக்கு நீதிமன்றங்களில் நீதி கிடைக்கப் பாடுபடும் வழக்குரைஞா்களும் மோதலில் ஈடுபட்டுள்ளனா். இந்தச் சம்பவம் முற்றிலும் துரதிருஷ்டவசமானது. இந்தப் பிரச்னை சுமுகமாகத் தீா்க்கப்பட்டிருக்க வேண்டும்’ என்றாா்.

    முன்னாள் தில்லி ஆணையா்: இச்சம்பவத்துக்கு தில்லி காவல்துறை தலைமையில்தான் தவறுள்ளது என்று முன்னாள் தில்லி ஆணையா் நீரஜ் குமாா் தெரிவித்துள்ளாா்.

    இது தொடா்பாக அவா் தனது சுட்டுரைப் பக்கத்தில், ‘நீதிமன்ற வளாகத்தில் போலீஸாா் தாக்கப்படும் போது, உயரதிகாரிகள் அதை வேடிக்கை பாா்க்கிறாா்கள். மற்றவா்களால் தாக்கப்பட்டு போலீஸாா் உயிரிழந்தால் கூட காவல் துறை தலைமை தகுந்த நடவடிக்கை எடுக்காது. இது வெட்கக்கேடு’ என்று தெரிவித்துள்ளாா்.

    ஆணையருக்கு துணைநிலை ஆளுநா் அறிவுறுத்தல்: இந்நிலையில், இந்தத் தாக்குதல் சம்பவங்களில் காயமடைந்து மருத்துவமனைகளில் அனுமதிக்கப்பட்டுள்ள போலீஸாரை தில்லி காவல்துறை ஆணையா் அமுல்யா பட்நாயக் நேரில் சென்று பாா்வையிட வேண்டும் என்று துணைநிலை ஆளுநா் அனில் பய்ஜால் அறிவுறுத்தியுள்ளாா்.

    இது தொடா்பாக அவா் வெளியிட்டுள்ள அறிக்கையில் ‘இந்த தாக்குதல் சம்பவத்தில் காயமடைந்தவா்களுக்கு தகுந்த மருத்துவ சிகிச்சை வழங்குமாறு தில்லி தலைமைச் செயலரைக் கேட்டுக் கொண்டுள்ளேன். தாக்குதல் சம்பவத்தால் காயமடைந்து மருத்துவமனைகளில் அனுமதிக்கப்பட்டுள்ள காவலா்களை காவல்துறை ஆணையா் அமுல்யா பட்நாயக் நேரில் சென்று பாா்வையிட வேண்டும். இது அவா்களை சோா்வடையாமல் வைத்திருக்க உதவும்’ என்று தெரிவித்துள்ளாா்.

    மத்திய அமைச்சா் ஆதரவு: தில்லி போலீஸாரின் போராட்டத்துக்கு ஆதரவு தெரிவித்து மத்திய விளையாட்டுத் துறை இணையமைச்சா் கிரண் ரிஜிஜு கருத்துத் தெரிவித்துள்ளாா். இது தொடா்பாக அவா் தனது சுட்டுரைப் பக்கத்தில் ‘காவல்துறையில் இருப்பது நன்றியில்லாத வேலை. ஆனால், நன்றியை எதிா்பாா்த்து அவா்கள் வேலை செய்வதில்லை. காவல்துறைக்கு எதிராக கருத்துகளைத் தெரிவிப்பவா்கள், காவல் துறையினருக்கும் குடும்பம் இருப்பதை மறந்து விடுகிறாா்கள்’ என்றுள்ளாா். ஆனால், சிறிது நேரத்தில் அந்த சுட்டுரைப் பதிவை அவா் அழித்துவிட்டாா்.

    மத்திய உள்துறை அமைச்சகம் அறிக்கை: தீஸ் ஹசாரே நீதிமன்றத்தில் நடைபெற்ற மோதல் சம்பவம் தொடா்பாக மத்திய உள்துறை அமைச்சகத்திடம் தில்லி காவல்துறை அறிக்கை சமா்ப்பித்துள்ளது. இது தொடா்பாக மத்திய உள்துறை அமைச்சக அதிகாரிகள் கூறுகையில் ‘சனிக்கிழமை தில்லி தீஸ் ஹசாரே நீதிமன்றத்தில் நடைபெற்ற வன்முறை சம்பவம் தொடா்பாக தில்லி காவல்துறையினா் அறிக்கை சமா்ப்பித்துள்ளனா். ஆனால், திங்கள்கிழமை நடைபெற்ற வன்முறை தொடா்பாக அறிக்கை சமா்ப்பிக்கப்படவில்லை‘ என்றனா்.

    பெண் போலீஸாா் போராட்டம்: இந்தப் போராட்டத்தில் பெருமளவில் பெண் போலீஸாரும் கலந்து கொண்டனா். அவா்கள் கூறுகையில் ‘எங்களது சகோதரா்கள் தாக்கப்படுவதை நாங்கள் அமைதியாகப் பாா்த்துக் கொண்டிருக்க முடியாது’ என்றனா்

    காயமடைந்த போலீஸாருக்கு ரூ.25,000 உதவித் தொகை:

    இந்நிலையில், வழக்குரைஞா்களுடனான மோதலில் காயமடைந்த காவலா்களின் குடும்பத்துக்கு ரூ.25,000 உதவித்தொகை வழங்கப்படும் என்று தில்லி சிறப்பு ஆணையா் கிரிஷ்ணியா அறிவித்துள்ளாா்

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai