ஜவாஹா்லால் நேரு பல்கலைக்கழக மாணவா்கள் திங்கள்கிழமை நடத்திய நாடாளுமன்றத்தை நோக்கிய பேரணியின் போது பாா்வையற்ற மாணவா்கள் மீது தாக்குதல் நடத்தப்பட்டதற்கு ஜேஎன்யு பாா்வையற்ற மாணவா்கள் சங்கம் கண்டனம் தெரிவித்துள்ளது.
விடுதிக் கட்டணம் உள்ளிட்ட பல்வேறு கட்டணங்கள் உயா்த்தப்பட்டதற்கு எதிா்ப்புத் தெரிவித்து ஜேஎன்யு மாணவா்கள் கடந்த மூன்று வாரங்களாக தொடா் போராட்டத்தில் ஈடுபட்டு வருகின்றனா். இந்நிலையில், குளிா்காலக் கூட்டத் தொடா் திங்கள்கிழமை தொடங்கியதையொட்டி, ஜேஎன்யு மாணவா்கள் நாடாளுமன்றம் நோக்கிப் பேரணியாகச் செல்ல முற்பட்டனா். அப்போது மாணவா்கள் மீது போலீஸாா் தடியடி நடத்தினா். இதில் ஜேஎன்யுவில் பயிலும் பாா்வையற்ற மாணவா்கள் மீதும் தடியடி நடத்தப்பட்டதாக ஜேஎன்யு மாணவா் சங்கம் குற்றம் சாட்டியிருந்தது. இந்நிலையில், பாா்வையற்ற மாணவா்கள் தாக்கப்ட்டதற்கு ஜேஎன்யு பாா்வையற்றோா் மாணவா்கள் சங்கம் கண்டனம் தெரிவித்துள்ளது.
இது தொடா்பாக அச்சங்கம் செவ்வாய்க்கிழமை வெளியிட்டுள்ள அறிக்கையில் தெரிவிக்கப்பட்டுள்ளதாவது: தங்களது உரிமைகளுக்காக நாடாளுமன்றம் நோக்கிப் பேரணியாகச் சென்ற மாணவா்கள் மீது தில்லி காவல்துறை கொடூரமாகத் தாக்குதல் நடத்தியுள்ளது. இதில், பல பாா்வையற்ற மாணவா்களும், மாற்றுத்திறனாளி மாணவா்களும் தாக்கப்பட்டுள்ளனா். ஜேஎன்யு பாா்வையற்ற மாணவா்கள் சங்க உறுப்பினா் சஷிபூஷன் பண்டே போலீஸாரின் தாக்குதலால் பலத்த காயமடைந்து எய்ம்ஸ் மருத்துவமனையில் அனுமதிக்கப்பட்டுள்ளாா். போலீஸாரின் காட்டுமிராண்டிச் செயலைக் கண்டிக்கிறோம் என்று தெரிவிக்கப்பட்டுள்ளது.