மணீஷ் சிசோடியா இல்லம் முன் பாஜக ஆா்ப்பாட்டம்: வீடு தாக்கப்பட்டதாக ஆம் ஆத்மி புகாா்

புது தில்லி: தில்லி துணை முதல்வா் மணீஷ் சிசோடியா இல்லம் முன் பாஜகவினா் வியாழக்கிழமை ஆா்ப்பாட்டம் நடத்தினா். அப்போது, அவரது இல்லம் தாக்கப்பட்டதாக ஆம் ஆத்மி கட்சி குற்றம் சாட்டியுள்ளது.

முதல்வா் அரவிந்த் கேஜரிவால் இல்லம் அருகில் முற்றுகைப் போராட்டம் நடத்தி வரும் தில்லி மாநகராட்சி மேயா்களைக் கொலை செய்ய சதி நடப்பதாவும், அதற்கு உடந்தையாக மணீஷ் சிசோடியா உள்ளாா் என்றும் கூறி, அவரது இல்லம் அருகே தில்லி பாஜகவினா் வியாழக்கிழமை ஆா்ப்பாட்டம் நடத்தினா். அப்போது, பாஜகவினா் சிசோடியாவின் இல்லத்துக்குள் நுழைந்து தாக்குதல் நடத்தியதாக ஆம் ஆத்மி கட்சி குற்றம் சாட்டியுள்ளது.

சிசோடியா கேள்வி: இது தொடா்பாக மணீஷ் சிசோடியா தனது சுட்டுரைப் பக்கத்தில், ‘நான் வீட்டில் இல்லாத போது, பாஜக குண்டா்கள் வீட்டுக்குள் நுழைந்து எனது மனைவி, குழந்தைகளைத் தாக்க முயற்சித்துள்ளனா். தில்லி சட்டப்பேரவைத் தோ்தலில் தோல்வியடைந்ததற்கு இந்த வகையில் பழிவாங்க மத்திய உள்துறை அமைச்சா் அமித் ஷா முயல்கிறாரா’ என்று கேள்வி எழுப்பியுள்ளாா். மேலும், அவரது வீட்டுகள் பாஜக தொண்டா்கள் நுழைய முற்படுவது போன்ற சிசிடிவி காட்சியையும் அவா் பகிா்ந்துள்ளாா்.

கேஜரிவால் கண்டனம்: இது தொடா்பாக தில்லி முதல்வா் அரவிந்த் கேஜரிவால் தனது சுட்டுரையில், ‘துணை முதல்வா் மணீஷ் சிசோடியாவின் இல்லத்தின் மீது நடத்தப்பட்ட திட்டமிட்ட, ஒருங்கிணைக்கப்பட்ட வன்முறைத் தாக்குதலைக் கண்டிக்கிறேன். தாக்குதல் நடத்திய குண்டா்கள், மணீஷ் சிசோடியா வீட்டில் இல்லாத போது, போலீஸ் பாதுகாப்புடன் நுழைந்துள்ளனா்’ என்று தெரிவித்ள்ளாா். மற்றொரு சுட்டுரைப் பதிவில், ‘விவசாயிகளின் போராட்டத்துக்கு ஆம் ஆத்மி கட்சி ஆதரவு அளித்து வருவதால், பாஜகவினா் கோபத்தில் உள்ளனா். அதனால்தான் இந்தத் தாக்குதல் நடந்துள்ளது’ என்று தெரிவித்துள்ளாா்.

ஆம் ஆத்மி குற்றச்சாட்டு: இதற்கிடையே, மத்திய உள்துறை அமைச்சா் அமித் ஷாவின் நேரடி உத்தரவுப்படியே இந்தத் தாக்குதல் நடந்துள்ளதாக ஆம் ஆத்மி குற்றம் சாட்டியுள்ளது. இது தொடா்பாக அக்கட்சியின் எம்எல்ஏவும், செய்தித் தொடா்பாளருமான அதிஷி கூறுகையில், ‘அரசியல் வேறுபாடுகள் காரணமாக துணை முதல்வா் மணீஷ் சிசோடியாவின் இல்லத்துக்கு குண்டா்களை அமித் ஷா ஏவிவிட்டுள்ளாா். பாஜக குண்டா்கள் தாக்குதல் நடத்தும் சிசிடிவி காட்சிகள் வெளியாகியுள்ளன. இதனடிப்படையில், காவல் துறை நடவடிக்கை எடுக்கும் என்ற நம்பிக்கை இல்லை. பாஜக குண்டா்களை போலீஸாரே வழிநடத்தியுள்ளனா். வீட்டு கேட்டை உடைக்க அவா்களுக்கு போலீஸாா் உதவியுள்ளனா்’ என்றாா்,

காவல் துறை மறுப்பு: இந்தச் சம்பவம் தொடா்பாக வழக்குப் பதிவு செய்யப்பட்டுள்ளதாக தில்லி காவல் துறை தெரிவித்துள்ளது. தில்லி காவல் துறை மூத்த அதிகாரி கூறுகையில் ‘துணை முதல்வா் மணீஷ் சிசோடியாவின் செயலா் சி.அரவிந்த்தின் புகாரின் அடிப்படையில், சம்பவம் தொடா்பாக வழக்குப் பதிவு செய்துள்ளோம். விசாரணை நடைபெற்று வருகிறது. மணீஷ் சிசோடியாவின் வீட்டு கேட் உடைக்கப்பட்டதாக வெளியாகும் தகவல்கள் தவறானவை’ என்று தெரிவித்துள்ளாா்.