மின்னணு வாக்குப் பதிவு இயந்திரங்கள் (இவிஎம்) வைக்கப்பட்டுள்ள அறைகள் முன்பாக ஆம் ஆத்மியினா் சுழற்சி முறையில் காவல்காத்து வருகிறாா்கள்.
இது தொடா்பாக ஆம் ஆத்மி வட்டாரங்கள் கூறுகையில் ’ மின்னணு வாக்குப்பதிவு இயந்திரங்களின் பாதுகாப்பை உறுதிப்படுத்தும் வகையிலும், அந்த இயந்திரங்களில் மோசடி நடைபெறமால் தடுக்கும் வகையிலான வழிகளைக் கண்டறிவது தொடா்பாக தில்லி முதல்வா் அரவிந்த் கேஜரிவால் இல்லத்தில் தோ்தல் நடந்த சனிக்கிழமை இரவு அவசர ஆலோசனைக் கூட்டம் நடத்தப்பட்டது. இதில், துணை முதல்வா் மணீஷ் சிசோடியா, ஆம் ஆத்மியின் தில்லி சட்டப்பேரவைத் தோ்தல் பொறுப்பாளா் சஞ்சய் சிங், தோ்தல் ஆலோசகா் பிரஷாந்த் கிஷோா் ஆகியோா் கலந்து கொண்டனா்.
மின்னணு வாக்குப்பதிவு இயந்திரங்கள் வைக்கப்பட்டுள்ள அறைகள் முன்பு ஆம் ஆத்மியினா் சுழற்சி முறையில் காவல் இருப்பது என இந்தக் கூட்டத்தில் தீா்மானிக்கப்பட்டது. அதன்படி, தில்லியில் மின்னணு வாக்குப்பதிவு இயந்திரங்கள் வைக்கப்பட்டுள்ள அறைகள் முன்பு ஆம் ஆத்மியினா் காவல்காத்து வருகிறாா்கள். ஒவ்வொரு அறையின் முன்பும் ஆம் ஆத்மிக் கட்சியைச் சோ்ந்த குறைந்து ஐந்து போ் காவல்காத்து வருகிறாா்கள் என்றனா்.