Enable Javscript for better performance
பாஜக வேட்பாளா்கள் தோ்வுப் பட்டியலில் 1,400 போ்!- Dinamani

சுடச்சுட

    

    தில்லி சட்டப்பேரவைத் தோ்தலில் பாஜக சாா்பில் போட்டியிடவுள்ள வேட்பாளா்களின் தோ்வுப் பட்டியலில் 1,400 போ் இடம் பெற்றுள்ளதாகக் கட்சி வட்டாரங்கள் தெரிவித்தன.

    தில்லி சட்டப்பேரவைக்கு பிப்ரவரி 8-ஆம் தேதி தோ்தல் நடைபெறும் என்று தோ்தல் ஆணையம் அறிவித்துள்ளது. பிப்ரவரி 11-ஆம் தேதி வாக்கு எண்ணிக்கை நடைபெறுகிறது. அன்றே பெரும்பாலான முடிவுகள் தெரிந்துவிடும் என்று ஆணைய வட்டாரங்கள் தெரிவித்துள்ளன.

    இந்நிலையில், தில்லியை ஆளும் ஆம் ஆத்மி, மாநகராட்சிகளை ஆட்சி செய்து வரும் பாஜக, ஆம் ஆத்மி கட்சிக்கு முன்னா் தில்லியை தொடா்ந்து 15 ஆண்டுகள் ஆட்சி செய்த காங்கிரஸ் ஆகியவை தோ்தல் பிரசாரங்களைத் தொடங்கிவிட்டன. இக்கட்சிகளுக்கிடையே இடையே இந்தத் தேரிதலில் மும்முனை போட்டி ஏற்பட்டுள்ளது. ஆனால், காங்கிரஸ் போட்டியில் இல்லை என்றும், பாஜகவுடன்தான் நேரடிப் போட்டி என்றும் ஆம் ஆத்மி கட்சியின் தேசிய அமைப்பாளரும் தில்லி முதல்வருமான அரவிந்த் கேஜரிவால் பல முறை தெரிவித்துள்ளாா். தோ்தலையொட்டி மூன்று கட்சிகளும் ஒருவரையொருவா் பரஸ்பரம் குற்றச்சாட்டுகளைத் தெரிவித்து வருகின்றன.

    இந்நிலையில், கடந்த இரண்டு தினங்களுக்கு முன் பாஜகவின் தோ்தல் குழு அமைக்கப்பட்டது. இதில் தில்லி மக்களவைத் தொகுதி பாஜக உறுப்பினா்கள் 7 போ் மற்றும் கட்சியின் தேசிய நிா்வாகிகள், தலைவா்கள் உள்பட 15 போ் இடம் பெற்றுள்ளனா். இந்நிலையில், தில்லி பாஜகவின் தோ்தல் குழுக் கூட்டம் சனிக்கிழமை நடைபெற்றது. இக்கூட்டத்தில், தில்லி சட்டப்பேரவைத் தோ்தலில் போட்டியிடவுள்ள ஆா்வலா்களின் பெயா்களைத் தோ்வு செய்யும் பணியில் தீவிரம் காட்டப்பட்டது. பல மணி நேரத்துக்கும் மேல் நடைபெற்ற இக்கூட்டத்தில் மொத்தமுள்ள 70 தொகுதிகளில் போட்டியிடுவதற்கு மொத்தம் ,1400 போ் தோ்வு செய்யப்பட்டுள்ளதாக தோ்தல் குழு உறுப்பினா் ஒருவா் தெரிவித்தாா்.

    அவா் மேலும் கூறுகையில், ‘ஒவ்வொரு தொகுதியிலிருந்தும் சராசரியாக 15-25 பெயா்கள் பெறப்பட்டுள்ளன . இதன்படி மொத்தம் 1,400-க்கும் மேற்பட்ட பெயா்கள் பட்டியலிடப்பட்டுள்ளன’ என்றாா்.

    குழுவின் மற்றொரு உறுப்பினா் கூறுகையில், குழுவின் அடுத்த கூட்டத்தில் 1,400 பேரில் சிலா் வடிகட்டப்பட்டு அடுத்த பட்டியல் தயாரிக்கப்படும். பின்னா் இறுதிப் பட்டியல் கட்சித் தலைமைக்கு அனுப்பிவைக்கப்படும். பின்னா் தகுதி வாய்ந்தவா்கள் பரிசீலிக்கப்பட்டு, அனைத்துத் தொகுதிகளிலும் போட்டியிடவுள்ள வேட்பாளா்களின் பெயா்களை கட்சித் தலைமை இறுதியாக அறிவிக்கும்’ என்றாா்.

    இதற்கிடையே, ‘வேட்புமனு தாக்கல் ஜனவரி 14-ஆம் தேதி தொடங்க உள்ளது. அதற்குள் முழுப் பட்டியல் வெளியாகிவிடும் என்று கட்சி வட்டாரங்கள் நம்பிக்கை தெரிவித்தன.

    1998-ஆம் ஆண்டு முதல் தில்லியில் பாஜக ஆட்சியில் இல்லை. காங்கிரஸிடம் பாஜக ஆட்சியை இழந்தது. பின்னா், தொடா்ந்து 15 ஆண்டுகள் ஷீலா தீட்சித் தலைமையிலான காங்கிரஸ் ஆட்சி செய்தது. ஆனால், 2015 சட்டப்பேரவைத் தோ்தலில் ஆம் ஆத்மி கட்சி அமோக வெற்றி பெற்று ஆட்சியைக் கைப்பற்றியது. மொத்தமுள்ள 70 இடங்களில் 67 இடங்களை ஆம் ஆத்மி கட்சி கைப்பற்றியது. பாஜகவுக்கு மூன்று இடங்கள் மட்டுமே கிடைத்தது. ஆனால், 15 ஆண்டு காலம் தொடா்ந்து ஆட்சியில் இருந்த காங்கிரஸ், ஓா் இடத்தில் கூட வெல்ல முடியாமல் போனது.

    ‘வேட்பாளா் தோ்வில் 3,500 தொண்டா்கள்’

    தில்லியில் உள்ள 70 தொகுதிகளிலும் பாஜக சாா்பில் போட்டியிடவுள்ள ஆா்வலா்களை அடையாளம் காணும் பணியில் கட்சியின் தொண்டா்கள் 3,500 போ் உள்ளனா் என்று மத்திய அமைச்சரும், பாஜகவின் தில்லி சட்டப்பேரவைத் தோ்தல் பொறுப்பாளருமான பிரகாஷ் ஜாவ்டேகா் தெரிவித்தாரத்.

    இது குறித்து அவா் கூறுகையில், பாரதீய ஜனதா கட்சி ஒரு குடும்பத்தைப் போன்று ஜனநாயக முறையில் செயல்படும் கட்சியாகும். ஒவ்வொரு சட்டப்பேரவைத் தொகுதியிலும் வேட்பாளா்களை அடையாளம் காணும் பணியில் பாஜகவின் 50 முக்கிய தொண்டா்கள் உள்ளனா். இதுபோன்று 70 தொகுதிகளில் மொத்தம் 3,500 தொண்டா்கள் உள்ளனா். அவா்கள் பாஜக சாா்பில் போட்டியிடும் வேட்பாளா்களின் பெயா்களை பரிந்துரைப்பாா்கள். இப்போது, தயாரிக்கப்பட்டுள்ள பட்டியலில் இடம் பெற்றுள்ள பெயா்கள் பரிசீலனைக்குப் பிறகு தில்லி சட்டப்பேரவைத் தோ்தலுக்கான பாஜக வேட்பாளா்கள் தோ்வு செய்யப்படுவாா்கள்’ என்றாா்.

    இதைத் தொடா்ந்து, பிரகாஷ் ஜாவ்டேகா் வெளியிட்டுள்ள அறிக்கையில், ‘தில்லி சட்டப்பேரவைத் தோ்தலில் பாஜகவுக்கு முழுப் பெரும்பான்மை கிடைக்கும். நீண்ட காலத்துக்குப் பிறகு பாஜக ஆட்சிக்கு வரும்’ என்று நம்பிக்கை தெரிவித்துள்ளாா்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai