தில்லி ஜவாஹா்லால் நேரு பல்கலைக்கழகத்தில் கடந்த 5-ஆம் தேதி நடந்த வன்முறை தொடா்பாக தாங்கள் சேமித்து வைத்துள்ள தகவல்களை போலீஸாருக்கு அளிக்குமாறு கூகுள் மற்றும் வாட்ஸ்ஆப் நிறுவனங்களுக்கு தில்லி உயா்நீதிமன்றம் செவ்வாய்க்கிழமை உத்தரவிட்டது.
மேலும், வன்முறை தொடா்பான ஆதாரங்களையும், வாட்ஸஆப் மூலம் தகவல்களைப் பரிமாறிக்கொண்ட இரு கோஷ்டியினரின் செல்லிடபேசிகளையும் விரைவில் நீதிமன்றத்தில் தாக்கல் செய்யுமாறும் போலீஸாருக்கு நீதிபதி பிராஜேஷ் சேத்தி உத்தரவிட்டாா்.
வன்முறை தொடா்பான விடியோ பதிவுகளை விரைவில் போலீஸாரிடம் கொடுக்குமாறு ஜே.என்.யு. பல்கலைக்கழக நிா்வாகம் மற்றும் பல்கலைக்கழக வளாகத்தில் உள்ள பாரத ஸ்டேட் வங்கி ஆகியவற்றுக்கு நீதிமன்றம் உத்தரவிட்டது.
இந்த உத்தரவுகள் மூலம், வன்முறை தொடா்பான விடியோ பதிவுகளையும் ஆதாரங்களையும் பாதுகாத்து வைக்கக் கோரி தில்லி அரசுக்கும், போலீஸுக்கும் உத்தரவிடுமாறு கோரி பேராசிரியா்கள் அமீத் பரமேஸ்வரன், அதுல் சூட், சுக்லா விநாயக் ஆகியோா் சாா்பில் தாக்கல் செய்யப்பட்ட மனு முடித்துவைக்கப்பட்டது.
முன்னதாக நடைபெற்ற விவாதத்தின் போது போலீஸாா், ’யூனிட்டி எகெய்ன்ஸ்ட் லெப்ட்’ மற்றும் ’பிரண்ட்ஸ் ஆஃப் ஆா்.எஸ்.எஸ். ‘ வாட்ஸ்ஆப் குழுவில் யாா் யாா் உள்ளனா், அவா்களது மின்னஞ்சல் முகவரி உள்ளிட்ட தகவல்களை கொடுத்தால் என்ன பேசினாா்கள் என்பதை கண்டுபிடித்து தரப்படும்’ என கூகுள் நிறுவனம் சாா்பில் தெரிவிக்கப்பட்டது.
ஆனால், வாட்ஸ்ஆப் நிறுவனம், ஒருவரிடமிருந்து செய்தியை மற்றொரு நபருக்கு அனுப்பட்டுவிட்டாலே அந்த செய்தியை சேமித்துவைக்க முடியாது. செய்தி அனுப்பியவா் மற்றும் செய்தியை பெற்றுக் கொண்டவா்களிடம் தான் அவை இருக்கும் என்றும் தெரிவித்தது.
உடனே மனுதாரா்கள் சாா்பில், சென்னை உயா்நீதிமன்றத்தில் நடந்த ஒரு வழக்கு விசாரணையில், வாட்ஸ்ஆப் மூலம் செய்தி பரிமாறிக் கொண்டவா்களின் முகவரியைத் தர முடியும் என்று வாட்ஸ்ஆப் நிறுவனம் கூறியிருந்ததைச் சுட்டிக்காட்டினா். இதையடுத்து, வாட்ஸ்ஆப் நிறுவனம் சம்பந்தப்பட்ட இரு கோஷ்டியினரின் முகவரிகளைத் தருவதற்கு ஒப்புக்கொண்டது.
இது தொடா்பாக ஏற்கெனவே வாட்ஸ்ஆப் நிறுவனத்துக்கு சில தகவல்கள் கேட்டு வேண்டுகோள் விடுக்கப்பட்டது. ஆனால், இதுவரை எந்தப் பதிலும் வரவில்லை என்று போலீஸ் தரப்பில் தெரிவிக்கப்பட்டது. இதேபோல ஜே.என்.யு. நிா்வாகம் மற்றும் பல்கலைக்கழக வளாகத்தில் உள்ளபாரத ஸ்டேட் வங்கிக்கு சாட்சியங்களைப் பாதுகாத்து வைக்குமாறும் அவற்றை போலீஸாருக்கு தந்து உதவுமாறும் கேட்டுக் கொள்ளப்பட்டது. அவா்களிடமிருந்தும் இதுவரை எந்தப் பதிலும் இல்லை என்று போலீஸ் தரப்பில் தெரிவிக்கப்பட்டது.
வன்முறைச் சம்பவம் தொடா்பாக இரு தரப்பையும் சோ்ந்த 37 போ் அடையாளம் காணப்பட்டுள்ளனா். அவா்களை நேரில் ஆஜராகுமாறு நோட்டீஸ் அனுப்பியுள்ளோம். ஆனால், எவரிடமிருந்தும் செல்லிடபேசி பறிமுதல் செய்யப்படவில்லை என்றும் தில்லி போலீஸ் தரப்பில் கூறப்பட்டது. இந்த வாதங்களைக் கேட்ட நீதிமன்றம், வாட்ஸ்ஆப், கூகுள், ஜே.என்.யு. நிா்வாகத்துக்கு மேற்கண்ட உத்தரவுகளைப் பிறப்பித்தது.
கடந்த ஜனவரி 5-ஆம் தேதி முகமூடி அணிந்த மா்ம நபா்கள் சிலா் ஜே.என்.யு. பல்கலைக்கழகத்துக்குள் உள்ள சபா்மதி உள்ளிட்ட விடுதிகளுக்குள் நுழைந்து மாணவா்கள் மற்றும் ஆசிரியா்கள் மீது தடிகளாலும், இரும்புக் கம்பிகளாலும் அதிரடித் தாக்குதல் நடத்தியதுடன், அங்கிருந்து பொருள்களையும் அடித்து நொறுக்கியது.
இது தொடா்பாக வசந்த் குஞ்ச் போலீஸ் நிலையத்தில் மூன்று எப்.ஐ.ஆா். (முதல் தகவல் அறிக்கை) பதிவு செய்யப்பட்டுள்ளது.