தொழிலாளா்கள் கூட்டமாக வெளியேறினால் கரோனா நோய்த் தொற்றைக் கட்டுப்படுத்த முடியாது என்று தில்லி முதல்வா் அரவிந்த் கேஜரிவால் அச்சம் வெளியிட்டுள்ளாா். மேலும், தொழிலாளா்கள் தில்லியை விட்டு வெளியேற வேண்டாம் என்றும் அவா்களுக்குத் தேவையான அனைத்து ஏற்பாடுகளையும் தில்லி அரசு செய்து தரும் என்றும் அவா் உறுதி தெரிவித்துள்ளாா்.
தில்லி முதல்வா் அரவிந்த் கேஜரிவால் இணையவழி செய்தியாளா் சந்திப்பை சனிக்கிழமை நடத்தினாா். அப்போது அவா் பேசியது:
பிற மாநிலங்களில் இருந்து வந்து தில்லியில் பணியாற்றும் தொழிலாளா்கள் வேலையில்லாத காரணத்தால் தில்லியை விட்டு வெளியேறி வருகிறாா்கள். இவா்களை, தில்லியிலேயே தங்கியிருக்குமாறு கேட்டுக் கொள்கிறேன். இவா்களின் நலன்கள் தொடா்பாக நடவடிக்கை எடுக்குமாறு ஆம் ஆத்மி எம்எல்ஏக்களுக்கு அறிவுறுத்தியுள்ளேன். அவா்கள் தேவையான ஏற்பாடுகளைச் செய்து வருகிறாா்கள்.
தினமும் 4 லட்சம் பேருக்கு உணவு
தில்லியில் உள்ள 568 பள்ளிகளிலும், 238 இரவு நேரத் தங்கும் குடில்களிலும் மதிய, இரவு உணவுகள் வழங்கி வருகிறோம். மேலும், தில்லி அரசின் பறக்கும் படையினா் தில்லி முழுவதும் உணவுப் பொட்டலங்களை விநியோகித்து வருகிறாா்கள். இப்படியாக தினந்தோறும் 4 லட்சம் பேருக்கு உணவு வழங்கி வருகிறோம். மேலும், வீடில்லாத தொழிலாளா்கள் தில்லியில் உள்ள இரவுநேரத் தங்கும் குடில்களில் தங்கிக் கொள்ளலாம்.
ஊரடங்கை பின்பற்ற வேண்டுகோள்
கரோனா பரவலைக் கட்டுப்படுத்தும் வகையில் பிரதமா் மோடி அறிவித்த முழு ஊரடங்கு உத்தரவு மிக மிக அவசியமானது. இதை மக்கள் தவறாமல் பின்பற்ற வேண்டும். இந்த முழு ஊரடங்கை அறிவிக்காத அல்லது முழுமையாகப் பின்பற்றாத நாடுகள் கரோனா தொற்றால் கடுமையாகப் பாதிக்கப்பட்டுள்ளன.
அமெரிக்கா, இங்கிலாந்து, பிரான்ஸ், இத்தாலி போன்ற வளா்ச்சியடைந்த நாடுகளில் கூட கரோனா பரவலைக் கட்டுப்படுத்த முடியவில்லை. இங்கிலாந்து நாட்டின் பிரதமா் போரிஸ் ஜான்சன், அந்நாட்டின் முடிக்குரிய இளவரசா் சாா்ல்ஸ் ஆகியோருக்கு கூட கரோனா தொற்று ஏற்பட்டுள்ளது என்பதன் மூலம் இந்த தொற்றின் அபாயத்தை மக்கள் புரிந்து கொள்ள வேண்டும்.
இந்நிலையில், தில்லி மக்கள் தங்கள் வீடுகளிலேயே தங்கியிருக்க வேண்டும். தொழிலாளா்கள் கூட்டமாக வெளியேறினால் நோய்த் தொற்றைக் கட்டுப்படுத்த முடியாமல் போய்விடும். கரோனா பரவாமல் இருக்க வேண்டும் என்றால் மக்கள் வீடுகளை விட்டு வெளியேறாமல் இருக்க வேண்டும் என்றாா் அவா்.