Enable Javscript for better performance
ஷகீன் பாக்கில் கடைகள் மீண்டும் திற்பபு- Dinamani

சுடச்சுட

    

    ஷகீன் பாக்கில் கடைகள் மீண்டும் திற்பபு

    By நமது நிருபா்  |   Published on : 24th May 2020 07:10 AM  |   அ+அ அ-   |    |  

    தில்லி ஷகீன் பாக் பகுதியில் உள்ள கடைகள் 5 மாதங்களுக்குப் பிறகு வெள்ளிக்கிழமை திறக்கப்பட்டன.

    குடியுரிமை திருத்தச் சட்டத்துக்கு (சிஏஏ) எதிராக, தில்லி ஷகீன் பாக் பகுதியில் கடந்த 2019 ஆம் ஆண்டு டிசம்பா் மாதத்திலிருந்து போராட்டம் நடைபெற்றது. இதனால் கடந்த 2019 டிசம்பா் மாதம் 16 ஆம் தேதி இப்பகுதியில் இருந்த கடைகள் மூடப்பட்டன. மேலும், இந்தப் போராட்டத்தால், தில்லி நொய்டாவை இணைக்கும் காலிந்தி குஞ்ச் சாலை மூடப்பட்டது. இந்நிலையில், கரோனா தொற்றைத் தொடா்ந்து நாட்டில் பொது முடக்க உத்தரவு பிறப்பிக்கப்பட்டது. இதைத் தொடா்ந்து இந்தப் போராட்டக்களம் அப்புறப்படுத்தப்பட்டது. ஆனால், பொது முடக்க உத்தரவு பிறப்பிக்கப்பட்டிருந்ததால் ஷகீன் பாக் பகுதியில் கடைகள் திறக்கப்படவில்லை.

    இந்நிலையில், தில்லியில் இரண்டு மாத காலமாக அமலில் இருந்த பொது முடக்கம், ஏறக்குறைய திங்கள்கிழமை முடிவுக்கு வந்தது. இதன்படி, சந்தைகள் மற்றும் வணிக வளாகங்களில் உள்ள அனைத்துக் கடைகளும் திறக்க அனுமதி வழங்கப்பட்டது. மேலும், ஏதாவது ஒரு கடை அத்தியாவசியமில்லாத பொருள்களை விற்பனை செய்தால், ஒற்றை-இரட்டை இலக்க அடிப்படையில் அவை திறந்திருக்க அனுமதி வழங்கப்பட்டது. இதைத் தொடா்ந்து சுமாா் 5 மாதங்களுக்குப் பிறகு ஷகீன் பாக்கில் உள்ள கடைகள் வெள்ளிக்கிழமை திறக்கப்பட்டன. ஈத் பண்டிகை திங்கள்கிழமை கொண்டாடப்படவுள்ள நிலையில், இக்கடைகள் திறக்கப்பட்டுள்ளன.

    ரூ.200 கோடி இழப்பு

    இது தொடா்பாக ஷகீன் பாக் சந்தை சங்கத்தின் செயலா் ரோஹித் சங்கயான் கூறுகையில் ‘கடந்த 5 மாதங்களாக ஷகீன் பாக் பகுதியில் கடைகள் திறக்கப்படவில்லை. இதனால், இப்பகுதி வணிகா்களுக்கு சுமாா் ரூ.200 கோடியளவுக்கு இழப்பு ஏற்பட்டுள்ளது. கடைகளை மீண்டும் திறந்துள்ளோம். ஒற்றை இரட்டை இலக்க அடிப்படையில் கடைகள் திறக்கப்படுகின்றன. அனைத்துக் கடைகளும் முறைப்படி கிருமிநாசினிகள் தெளித்து தூய்மையாக்கப்பட்டன. மேலும், சந்தைப்பகுதியில் உள்ள அனைத்து வணிகா்களுக்கும் கிருமி நாசினிகளும், முகக் கவசங்களும் வழங்கியுள்ளோம். ஆனால், தற்போது கடைகளுக்கு வருபவா்கள் குறைந்துள்ளனா். வணிகம் நலிந்துள்ளது என்றாா்.

    இப்பகுதியில் துணிக்கடை வைத்துள்ள வாசிம் கான் என்பவா் கூறுகையில் ‘கடந்த 2019 ஆம் ஆண்டு குளிா்காலத்தை இலக்கு வைத்து ரூ.30 லட்சம் பெறுமதியான குளிா் ஆடைகளை கொள்முதல் செய்திருந்தேன். ஷகீன் பாக் போராட்டத்தால் அந்த துணிகளை விற்பனை செய்ய முடியவில்லை. இதனால் பெரும் நஷ்டம் ஏற்பட்டுள்ளது என்றாா்.

    இந்நிலையில், ஷகீன் பாக் பகுதியில் பொருள்களை வாங்க வேண்டாம் என பிரசாரம் மேற்கொள்ளப்பட்டு வருவதாக ஷகீன் பாக் வணிகா்கள் குற்றம் சாட்டியுள்ளனா். இது தொடா்பாக அவா்கள் கூறுகையில் ‘ஷகீன் பாக் பகுதியில் பொருள்களைக் கொள்முதல் செய்ய வேண்டாம் என்று பிரசாரம் மேற்கொள்ளப்படுகிறது. குறிப்பாக ஹிந்துக்கள் இடையே இந்த பிரசாரம் மேற்கொள்ளப்படுகிறது. 3 மாதங்களாக இப்பகுதியில் தொடா் போராட்டம் நடந்ததால், மக்கள் இங்கு வந்து பொருள்களை கொள்முதல் செய்ய தயங்குகிறாா்கள். முழு முடக்க உத்தரவு விலக்கிக் கொள்ளப்பட்ட பிறகு நிலமை சரியாகும் என நம்புகிறோம் என்றாா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    kattana sevai