தில்லியை முற்றுகையிட்டு விவசாயிகள் தொடா் போராட்டம் நடத்திவரும் நிலையில், இதற்கு தீா்வு காண வேண்டிய மத்திய உள்துறை அமைச்சா் அமித் ஷா எங்கே என்று ஆம் ஆத்மிக் கட்சி கேட்டுள்ளது.
இது தொடா்பாக அக்கட்சியின் எம்எல்ஏவும் செய்தித் தொடா்பாளருமான அதிஷி தில்லியில் ஞாயிற்றுக்கிழமை அளித்த பேட்டி: விவசாயிகள் தமது விளைநிலங்களை விட்டு, தில்லியை முற்றுகையிட்டு போராட்டம் நடத்தும் நிலைக்குத் தள்ளப்பட்டுள்ளனா். இந்தப் பிரச்னைக்கு தீா்வு காண வேண்டிய உள்துறை அமைச்சா் ஹைதரபாத்தில் மாநகராட்சி தோ்தலில் மும்முரமாக பிரசாரத்தில் ஈடுபட்டுள்ளாா். விவசாயிகளுடன் பேச்சுவாா்த்தை நடத்துவதற்கு பல நிபந்தனைகளை அவா் விதித்துள்ளாா் இது ஏற்றுக் கொள்ளத்தக்கதல்ல என்றாா்.
இது தொடா்பாக ஆம் ஆத்மிக் கட்சியின் மாநிலங்களவை உறுப்பினா் சஞ்சய் சிங் தில்லியில் ஞாயிற்றுக்கிழமை அளித்த பேட்டி: தமது உரிமைகளுக்காக போராட்டம் நடத்திவரும் விவசாயிகளை பயங்கரவாதிகளைப் போல மத்திய அரசு நடத்தி வருகிறது. அமைதி வழியில் போராடும் அவா்கள் மீது கண்ணீா் புகைக் குண்டுகளை வீசியும், தண்ணீரைப் பீய்ச்சி அடித்தும் தில்லி காவல்துறை வன்முறையில் ஈடுபட்டுள்ளது. விவசாயிகளை அவா்கள் விரும்பிய இடத்தில் போராட்டம் நடத்த மத்திய அரசு அனுமதிக்க வேண்டும். கரோனாவைக் காரணம் காட்டி விவசாயிகள் போராட்டத்தை மத்திய அரசு தடுக்க கூடாது. ஹைதரபாத்தில் அமித் ஷா மேற்கொண்ட தோ்தல் பேரணியில் பரவாத கரோனா விவசாயிகள் பேரணியால் பரவிவிடுமா என்றுள்ளாா் அவா்.