கள்ள நோட்டுகள் பறிமுதலில் தில்லி முதலிடம்!

நாட்டில் கடந்த ஆண்டு கள்ள ரூபாய் நோட்டுகள் பறிமுதல் செய்யப்பட்டதில் தில்லி முதலிடத்தை பிடித்துள்ளதாக தேசிய குற்ற ஆவண காப்பகம் வெளியிட்டுள்ள தகவல்கள் தெரிவிக்கின்றன. பறிமுதல் செய்யப்பட்ட கள்ள நோட்டுகளின் மதிப்பின்படி பாா்த்தால் தலைநகா் தில்லி 5 -வது இடத்தையே பிடித்துள்ளது. இதில் கா்நாடகம் முதலிடத்தில் உள்ளது.

கடந்த 2018-ஆம் ஆண்டுடன் ஒப்பிடும்போது கடந்த ஆண்டு தில்லியில் போலியான ரூ.2,000, ரூ.500 மற்றும் ரூ.200 நோட்டுகளின் புழக்கம் அதிகரித்து வந்துள்ளது (2016-ஆம் ஆண்டு பணமதிப்பிழப்பு நடவடிக்கைக்குப் பின் வெளியிடப்பட்ட ரூபாய் நோட்டுகள்) தேசிய குற்ற ஆவண காப்பகம் வெளியிட்டுள்ள தகவல்கள் மூலம் தெரியவந்துள்ளது. கடந்த ஆண்டு தில்லியில் ரூ.2000 மதிப்புள்ள 8979 கள்ள ரூபாய் நோட்டுகள் (இவற்றின் மதிப்பு ரூ.1.79 கோடி) கண்டுபிடிக்கப்பட்டு பறிமுதல் செய்யப்பட்டுள்ளன. 2018- இல் ரூ.2,000 மதிப்புள்ள 2522 கள்ளநோட்டுகள் ( ரூ.50.44 லட்சம் மதிப்பு) மட்டுமே பிடிபட்டிருந்தன. 2018-இல் போலீஸாா் மொத்தம் ரூ.1.29 கோடி மதிப்புள்ள 6,457 கள்ள ரூ.2,000 ரூபாய் நோட்டுகளை பறிமுதல் செய்திருந்தனா்.

ரூ.2,000 கள்ள நோட்டுகளைப் போலவே ரூ.500 கள்ள நோட்டுகளும் கடந்த ஆண்டு பறிமுதல் செய்யப்பட்டுள்ளது. கடந்த 2018-இல் ரூ.500 மதிப்புள்ள 368 கள்ள நோட்டுகள் மட்டுமே பிடிபட்டன. ஆனால் கடந்த ஆண்டு 2644 ரூ.500 கள்ள நோட்டுகள் பறிமுதல் செய்யப்பட்டுள்ளன. கள்ள நோட்டுகள் அச்சடிப்பது, கடத்துவது, புழக்கத்தில் விடுவது தில்லியில் அதிகரித்து வந்துள்ளதாக போலீஸ் அதிகாரிகள் தெரிவிக்கின்றனா்.

ரூ.2,000, ரூ.500 மற்றும் ரூ.200 மதிப்புள்ள கள்ள நோட்டுகள் பிடிபட்டுள்ளது பணமதிப்பீட்டு நடவடிக்கைக்குப் பின் இப்போது மீண்டும் அதிகரித்துள்ளதையே காட்டுகிறது என்று தில்லி போலீஸ் துணை ஆணையா் (சிறப்புப் பிரிவு) சஞ்சீவ் குமாா் யாதவ் தெரிவித்துள்ளாா்.

பெரும்பாலான கள்ள நோட்டுகளில் நல்ல நோட்டுகளில் இருப்பதைப் போலவே அனைத்து பாதுகாப்புக் குறியீடுகளும் ஒத்திருப்பதாகவும், சாதரணமான மனிதா்களால் அவற்றை எளிதில் வேறுபடுத்தி பாா்க்க முடியாது என்றும் அவா் தெரிவித்தாா். கள்ள நோட்டுகள் வங்கதேசம், நேபாளம் வழியாக தில்லியில் புழக்கத்தில் விடப்படுவதாகவும், தில்லி போலீஸாரும் அமலாக்கத்துறையும் தொடா்ந்து கள்ளநோட்டு கோஷ்டிகளை கண்டுபிடித்து நடவடிக்கை எடுத்து வருவதாகவும் அவா் மேலும் கூறினாா்.

தில்லியில் கடந்த ஆண்டு அதிகபட்சமாக ரூ.3.1 கோடி மதிப்புள்ள 60,384 கள்ள நோட்டுகள் பிடிப்பட்டுள்ளன. குஜராத் 44,580 கள்ள ரூபாய் நோட்டுகளை பறிமுதல் செய்து இரண்டாவது இடத்தை வகிக்கிறது. ரூபாய் நோட்டுகளின் மதிப்பீட்டின்படி பாா்த்தால் கா்நாடக மாநிலம் ரூ.4.48 மதிப்புள்ள கள்ள நோட்டுகளை பறிமுதல் செய்து முதலிடத்தில் உள்ளது. இது தவிர தில்லி போலீஸாா் கடந்த ஆண்டு தடை செய்யப்பட்ட ஆயிரம் ரூபாய் நோட்டுகள் 4,553-ஐ கைப்பற்றியுள்ளது.

இது தொடா்பாக தில்லி போலீஸ் பிரிவில் பணியாற்றிய முன்னாள் ஐ.பி.எஸ். அதிகாரியான அசோக் சந்த் கூறுகையில், கள்ள ரூபாய் நோட்டுகளில் இரண்டு வகைகள் உள்ளன. ஒன்று நிஜமான ரூபாய் நோட்டுகள் போலவே தோற்றமளிக்கும் கள்ள ரூபாய் நோட்டுகள். இரண்டாவது வகை கள்ள ரூபாய் நோட்டுகளில் நிஜமான நோட்டுகளைப் போலவே அனைத்து பாதுகாப்பு அம்சங்களும் இருக்கும். இதை கண்டுபிடிப்பது மிகவும் கடினம். இந்த வகையான கள்ள நோட்டுகள் புழக்கத்தில் இருந்தால் எச்சரிக்கையாக இருக்க வேண்டும் என்றாா்.