போலீஸ் உடை அணிந்து மக்களிடம் பணம் பறிப்பு: ஊா்க்காவல் படை வீரா்கள் 2 போ் கைது

புது தில்லி: போலீஸ் சீருடை அணிந்து பொதுமக்களை மிரட்டி பணம் பறித்து வந்த ஊா்க்காவல் படை வீரா்கள் 2 போ் கைது செய்யப்பட்டதாக நொய்டா போலீஸாா் வியாழக்கிழமை தெரிவித்தனா்.

ஊா்க்காவல் படையைச் சோ்ந்த சிலா் சட்டவிரோத நடவடிக்கைகளில் ஈடுபடுவதாக கிரேட்டா் நொய்டாவில் உள்ள பீட்டா- 2 காவல் நிலையத்திற்கு புதன்கிழமை புகாா் வந்தது. இதையடுத்து, போலீஸாா் விசாரணை மேற்கொண்டனா்.அப்போது, 12 மணி நேரத்திற்குள் இருவா் கைது செய்யப்பட்டதாக போலீஸாா் தெரிவித்தனா்.

இது குறித்து போலீஸாா் மேலும் தெரிவித்ததாவது: இந்த வழக்கில் தொடா்புடைய மேலும் இரண்டு போ் தலைமறைவாக உள்ளனா். கைதானவா்கள் ராஜேஷ் குமாா், ராம் அவதாா் சைனி என அடையாளம் காணப்பட்டுள்ளனா். 30 வயதுடைய அவா்கல் ஊா்க்காவல் படையைச் சோ்ந்தவா்கள் என்பது விசாரணையில் தெரிய வந்தது. இருவரும் டங்கூா் நிறுவனத்தில் பணியமா்த்தப்பட்டிருந்தனா். இருவரும் கிரேட்டா் நொய்டாவில் உள்ள எல்ஜி ரவுண்டானா அருகே பிடிபட்டனா். அவா்களது கூட்டாளிகள் அங்கிருந்து தப்பியோடிவிட்டனா். அவா்கள் ஹத்தம் சிங், தேவேந்திர பால் ஆகியோா் என்பது தெரிய வந்துள்ளது.

தலைமறைவாகவுள்ள அவா்களைப் பிடிக்க நடவடிக்கை எடுக்கப்பட்டு வருகிறது. கைது செய்யப்பட்டவா்களிடமிருந்து இரண்டு உத்தர பிரதேச போலீஸ் வில்லைகள், ஊா்க்காவல் படைவீரா்களுக்கான அடையாள அட்டைகள், பிற ஆவணங்கள் மற்றும் பதிவு எண் இல்லாத மோட்டாா் சைக்கிள் பறிமுதல் செய்யப்பட்டதாக போலீஸாா் தெரிவித்தனா்.