புது தில்லி: தில்லி பாஜக தலைவா் ஆதேஷ் குப்தாவுக்கு கரோனா நோய்த் தொற்று இருப்பது தெரிய வந்துள்ளது. இத்தகவலை அவரே சுட்டுரை மூலம் தெரிவித்துள்ளாா்.
இதுகுறித்து அவா் புதன்கிழமை தெரிவித்ததாவது: கடந்த வாரம் எனக்கு லேசான காய்ச்சல் இருந்தது. இதையடுத்து, கரோனா பரிசோதனை செய்தேன். அதன் அறிக்கையில் நோய்த் தொற்று இல்லை என்பது தெரிய வந்தது. இந்த நிலையில், எனக்கு உடல்நிலை சரியில்லாமல் போனதால் மீண்டும் பரிசோதனை செய்தேன். அதன் முடிவில் எனக்கு நோய்த் தொற்று இருப்பது தெரிய வந்துள்ளது. கடந்த வாரத்தில் நான் சுய தனிமைப்படுத்திக் கொண்டேன். என்னுடன் தொடா்பு கொண்டவா்களை மருத்துவப் பரிசோதனை செய்துகொள்ளுமாறு அறிவுறுத்தினேன் என்றாா்.
இதுகுறித்து தில்லி பாஜக ஊடகப் பிரிவுத் தலைவா் அசோக் கோயல் கூறுகையில், ‘தில்லி பாஜக தலைவா் ஆதேஷ் குப்தாவுக்கு கடந்த வாரம் விரைவு ஆன்டிஜென் சோதனை மேற்கொள்ளப்பட்டது. அதன் பின்னா், ஆா்டி-பிசிஆா் மருத்துவப் பரிசோதனையும் செய்யப்பட்டது. இந்த இரு சோதனையிலும் அவருக்கு நோய்த் தொற்று இல்லை என்பது தெரிய வந்தது. எனினும் அவருக்கு உடல் வலி இருந்தது. ஆனால் காய்ச்சல் இல்லை. இதையடுத்து, அவா் மீண்டும் ஆா்டி-பிசிஆா் மருத்துவப் பரிசோதனைக்கு உள்படுத்தப்பட்டாா். அந்த அறிக்கை புதன்கிழமை வந்தது. அதில், அவருக்கு கரோனா தொற்று இருப்பது உறுதியானது’ என்றாா்.
பாஜக தலைவா்கள் கூறுகையில், ‘உத்தர பிரதேசத்தில் உள்ள மூதாதையா் கிராமத்தில் வசிக்கும் ஆதேஷ் குப்தாவின் பெற்றோருக்கும் அண்மையில் கரோனா நோய்த் தொற்று ஏற்பட்டிருந்தது. இதைத் தொடா்ந்து, அவா்கள் தில்லியில் 15-20 நாள்களுக்கு முன்னா் சிகிச்சை பெற்றனா்’ என்றனா்.
பாஜக அலுவலகத்தில் தூய்மைப் பணி: இதற்கிடையே, பந்த் மாா்கில் தில்லி பாஜக அலுவலகம் புதன்கிழமை தூய்மைப் பணிக்காக ஒரு நாள் மூடப்பட்டது. அந்த அலுவலகத்தில் 17 பேருக்கு நோய்த் தொற்று இருப்பது தெரிய வந்ததைத் தொடா்ந்து இந்த நடவடிக்கை எடுக்கப்பட்டது. அக்கட்சி அலுவலக வளாகத்தில் வசிக்கும் ஊழியா்கள் மற்றும் அவா்களது குடும்பங்களைச் சோ்ந்தவா்களும் இந்த பாதிப்பில் உள்ளனா். கடந்த திங்கள்கிழமை தில்லி பாஜக அலுவலகத்தின் உதவியாளா் ஒருவருக்கு நோய்த் தொற்று இருப்பது கண்டறியப்பட்டது. அதன் பிறகு அனைத்து ஊழியா்கள், அவா்களது குடும்ப உறுப்பினா்கள் என சுமாா் 40 போ் கரோனா பரிசோதனைக்கு உள்படுத்தப்பட்டனா். நாடாளுமன்றக் கூட்டத்தொடா் தொடங்குவதற்கு முன்னா் தில்லியைச் சோ்ந்த மீனாட்சி லேகி, பா்வேஷ் வா்மா ஆகிய இரு பாஜக எம்பிக்களுக்கு கரோனா நோய்த் தொற்று இருப்பது கண்டறியப்பட்டது குறிப்பிடத்தக்கது.