தடுப்பூசி போட்டுக் கொள்ள மக்கள் தயங்க வேண்டாம்: திலிலியின் முதல் கரோனா நோயாளி வேண்டுகோள்

புதுதில்லி: நாடு முழுவதும் கரோனா தடுப்பூசி போடுவதற்கான தொடக்க நாள் நெருங்கி வரும் நிலையில், தடுப்பூசி போட்டுக் கொள்ள மக்கள் தயங்கக்கூடாது என்று தில்லியின் முதல் கரோனா நோயாளியான ரோஹித் தத்தா அனைவரையும் வலியுறுத்திக் கேட்டுக்கொண்டுள்ளாா்.

தடுப்பூசி போட்டுக் கொள்ள தயக்கம் வேண்டாம். இது விஷயத்தில் விஞ்ஞானிகள் சொல்வதை காது கொடுத்துக் கேளுங்கள். தடுப்பூசி தேவையில்லை என்று நியாயப்படுத்துவோா் சொல்வதையும், தடுப்பூசி பற்றி தவறான தகவல்களை பரப்பிவருபவா்களையும் நம்ப வேண்டாம் என்றும் அவா் கேட்டுக் கொண்டுள்ளாா்.

இந்தியாவில் தடுப்பூசிபோடும் முதல் கட்ட நடவடிக்கை நாடு முழுவதும் வருகிற 16-ஆம் தேதி தொடங்குகிறது. சுகாதார ஊழியா்களுக்கு முன்னுரிமை அடிப்படையில் தடுப்பூசி போடப்படும் என்றும் தெரிவிக்கப்பட்டுள்ளது. இதற்காக தில்லியில் 89 தடுப்பூசி மையங்கள் தயாா் நிலையில் உள்ளன. தடுப்பூசி போடுவதற்கான ஏற்பாடுகள் நடந்து வரும் நிலையில், தலைநகா் தில்லிக்கு இன்னும் இரண்டு நாள்களில் தடுப்பூசிகள் வந்து சோ்ந்துவிடும் என எதிா்பாா்க்கப்படுகிறது. இந்த நிலையில் கடந்த ஆண்டு மாா்ச் 1-ஆம் தேதி தில்லியில் முதன் முதலாக கரோனா வைரஸ் தொற்று பாதிக்கப்பட்ட நபரான ரோஹித் தத்தா, கரோனாவுக்கு தடுப்பூசி கண்டுபிடிக்கப்பட்டு பயன்பாட்டுக்கு வருவது குறித்து மகிழ்ச்சி தெரிவித்துள்ளாா்.

கடந்த சில மாதங்களுக்கு முன்புவரை நாங்கள் உயிருக்குப் போரடி வந்தோம். கரோனா தொற்று பெருமளவில் இருந்ததால் மக்கள் அதிக அளவில் பலியாகி வந்தனா். ஆனால், மருத்துவா்கள், செவிலியா்கள் மற்றும் சுகாதார ஊழியா்கள் உள்ளிட்டோா் நோய்த் தாக்கப்பட்டவா்களின் உயிரைக் காக்க 2020-ஆம் ஆண்டு கடுமையாகப் போராடி வந்தாா்கள். ஆனால், இப்போது தடுப்பூசி கண்டுபிடிக்கப்பட்டுள்ள நிலையில் கரோனாவை எதிா்த்துப் போராடிய வீரா்களுக்கு முதல் தடுப்பூசி போடப்படவுள்ளது என்றாா் அவா்.

46 வயதான தத்தா, தொழிலதிபா். கிழக்கு தில்லியில் , மயூா் விஹாரில் வசித்து வருகிறாா். நேரம் காலம் பாராமல் உழைத்து கரோனாவுக்கு தடுப்பூசி கண்டுபிடித்த விஞ்ஞானிகளுக்கு அவா் பாராட்டுத் தெரிவித்தாா். நான் கரோனா தொற்றால் பாதிக்கப்பட்ட போது பலா், தங்களை மருத்துவ நிபுணா்களைப் போல கருதிக் கொண்டு புதிய தொற்று குறித்து அவா்களுக்குத் தோன்றியதை எல்லாம் கூறினாா்கள். இந்தப் புதிய கரோனா தொற்று குறித்து விஞ்ஞானிகள் புரிந்து கொண்டு செயல்படுவதற்குள் பலரும் தவறான தகவல்களை பரப்பி வந்தனா். இப்போதும் தடுப்பூசி குறித்து சிலா் தவறான தகவல்களைக் கூறி வருகின்றனா். இப்போது விஞ்ஞானிகள் தடுப்பூசி கண்டுபிடித்துள்ளனா். அதை நாம் பயன்படுத்தித்தான் பாா்ப்போமே என்றும் அவா் குறிப்பிட்டாா். கரோனாவுக்கு சிகிச்சை பெற்ற இவா், மருத்துவமனையில் 14 நாள்களும், வீட்டில் 14 நாள்களும் தனிமைப்படுத்தப்பட்டு குணமடைந்தவா்.

சீரம் இன்ஸ்டிடியூட் தயாரித்துள்ள கோவிஷீல்டு தடுப்பூசிக்கும், பாரத் பயோடெக் நிறுவனம் தயாரித்துள்ள கோவாக்ஸின் தடுப்பூசிக்கு இந்திய மருந்து கட்டுப்பாளா்கள் ஒப்புதல் கொடுத்துள்ளனா். அதாவது அவசரப் பயன்பாட்டுக்கு பயன்படுத்த அனுமதி வழங்கியுள்ளனா். இப்போது தடுப்பூசி பயன்பாட்டுக்கு வந்துள்ள நிலையில், அதைப் போட்டுக் கொள்ள மக்கள் தயங்கக் கூடாது. இங்கிலாந்தில் ராணியும் அவரது கணவா் மற்றும் மன்னரான பிலிப் உள்ளிட்டோா் தடுப்பூசி போட்டுக் கொண்டுள்ளனா். அதே போல நநமது நாட்டிலும் தலைவா்கள் தடுப்பூசி போட்டுக்கொள்ள முன்வந்து மக்களுக்கு முன்னுதாரணமாக இருக்க வேண்டும் என்றாா் தத்தா.

தத்தா மேலும் கூறுகையில், ‘சிலா் எந்த அடிப்படை அறிவியலும் இல்லாமல் சாதாரண மக்களிடம் தடுப்பூசி போட்டுக் கொள்வது பற்றிய தவறான செய்திகளைப் பரப்பி வருகிறாா்கள். சில மதத்தலைவா்களும் இதில் அடக்கம். எனவே அறிவியல்பூா்வமாக இல்லாத வாதங்களை நம்ப வேண்டாம். போலியோ சொட்டு மருந்து போடப்பட்டபோதுகூட சிலா் அதை தங்கள் குழந்தைகளுக்கு போடுவதற்கு தயக்கம் காட்டினாா்கள். ஆனால், இப்போது தங்கள் குழந்தைகளை சொட்டு மருந்து போடும் இடத்துக்கே அழைத்துச் சென்று போட்டு வருகிறாா்கள். விஞ்ஞானிகள் மீது மக்கள் நம்பிக்கை வைக்க வேண்டும். நம்பிக்கையில்லை என்றால் எதுவும் செய்ய முடியாது. ’ என்றாா்.

தடுப்பூசி போட்டுக்கொண்டால் ஏதாவது பக்க விளைவுகளை ஏற்படுத்திவிடுமோ என்கிற பீதி மக்கள் மனதில் உள்ளது. ஆனால், தடுப்பூசி போடும் மையங்களில் அவசர சிகிச்சை அறையும் இருக்கும். அங்கு தடுப்பூசி போட்டுக் கொண்டவா்கள் அரை மணி நேரம் கண்காணிப்பில் வைக்கப்பட்டிருப்பாா்கள். தில்லியில் உள்ள 89 தடுப்பூசி மையங்களில் 40 அரசு மருத்துவமனைகள். 49 தனியாா் மருத்துவ நிலையங்கள் உள்ளன என்று மாநில சுகாதாரத் துறை அமைச்சா் சத்யேந்தா் ஜெயின் கூறியுள்ளாா்.

தில்லியில் இந்த மாத துவக்கத்திலிருந்தே தினசரி கரோனா பாதிப்பு 500-க்கும் கீழாக உள்ளது. கடந்த ஞாயிற்றுக்கிழமை தில்லியில் 399 போ் மட்டுமே கரோனாவால் பாதிக்கப்பட்டுள்ளனா். நோய் பாதிப்புக்குள்ளானவா்கள் விகிதமும் 0.51 சதவீதமாக உள்ளது. இதுவரை கரோனாவுக்கு 6.3 லட்சம் போ் பாதிக்கப்பட்டுள்ளனா். பலி எண்ணிக்கை 10,678 ஆக உள்ளது. ஞாயிற்றுக்கிழமை மட்டும் 12 போ் பலியாகியுள்ளனா்.

நான் தடுப்பூசி போட்டுக் கொள்வதற்காக தயாா் நிலையில் இருக்கிறேன். முன்னுரிமை அடிப்படையில் தடுப்பூசிகள் போட்ட பிறகு எனது முறை எப்போது வரும் என்று காத்திருக்கிறேன் என்றாா் தத்தா.

கரோனா தொற்று பரவல் இருந்த போது மக்கள் அதைக் கண்டு பயந்தாா்கள். பின்னா், அதை எதிா்கொள்ளத் தயாரானாா்கள். இப்போது தடுப்பூசி போடப்பட உள்ளது. தடுப்பூசி போட்டுக் கொள்ள சிலா் அச்சப்படலாம். ஏன் பயப்படுகிறாா்கள் என்று தெரியவில்லை. தசுப்பூசியின் செயல்திறன் பின்னா் தெரியவரும். ஆனால், அது பாதுகாப்பற்ல்ல என்றாா் தில்லியில் அரசு மருத்துவமனையில் கொவிட் சிகிச்சை பிரிவில் பணியாற்றி வரும் மருத்துவா் ஒருவா்.