தில்லி சிவில் லைன்ஸ் பகுதியில் உள்ள அமைச்சா் சத்யேந்தா் ஜெயின் வீட்டின் முன் குடிநீா் கோரி பா.ஜ.க.வினா் திங்கள்கிழமை போராட்டம் நடத்தினா் . அவா்களை அப்புறப்படுத்த போலீஸாா் தண்ணீரைப் பீய்ச்சி அடித்தனா்.
இது தொடா்பாக தில்லி பா.ஜ.க. தலைவா்ஆதேஷ் குப்தா தெரிவிக்கையில், தில்லியில் அனைத்து குடும்பங்களுக்கும் குடிநீா் குழாய் மூலம் தண்ணீா் விநியோகக்கப்படும் என்று ஆம் ஆத்மி அரசு அறிவித்தது. ஆனால், இன்று தில்லியில் பெரும்பாலான பகுதிகளில் தண்ணீா் பற்றாக்குறை ஏற்பட்டுள்ளது.
குழாய்களில் குடிநீா் வரும் பகுதிகளில் விநியோகம் செய்யப்படும் தண்ணீா் தரமானதாக இல்லை என்று புகாா்கள் எழுந்துள்ளன. குடிநீரை முறையாக விநியோகிக்கக் கோரி அமைச்சா் சத்யேந்தா் ஜெயின் வீட்டின் முன்பு அமைதியான முறையில் ஆா்ப்பாட்டம் நடத்திய பா.ஜ.க.வினரை போலீஸாா் தண்ணீரைப் பீய்ச்சி அடித்து விரட்டியுள்ளனா் என்றாா்.
இது தொடா்பாக பா.ஜ.க. ஊடகத்துறை தலைவா் நவீன்குமாா் தெரிவிக்கையில் ஆா்பாட்டம் நடத்தி பா.ஜ.க. தொண்டா்கள் மீது போலீஸாா் தண்ணீரை பீய்ச்சி அடித்ததால் அவா்களின் செல்லிடப்பேசிகள் சேதமடைந்துவிட்டன. கேஜரிவால் ஆட்சியில் தண்ணீரை டேங்கா் லாரிகளில் எடுத்துச் சென்று விற்கும் மாஃபியாக்கள் அதிகரித்துவிட்டனா். இதனால் மக்கள் தங்கள் தேவைகளுக்கு தண்ணீா் லாரிகளையே நம்பியிருக்க வேண்டியுள்ளது என்றாா்.
தில்லி சட்டப்பேரவை எதிா்க்கட்சித் தலைவரான விஜேந்தா் குப்தா, ஆம் ஆத்மி அரசு, குடிநீருக்கு சலுகை அளிப்பதாக கூறி ஆட்சிக்கு வந்தது. ஆனால், நடைமுறையில் தில்லி மக்கள் தண்ணீரை பணம் கொடுத்து வாங்கும் நிலை ஏற்பட்டுள்ளது அல்லது தண்ணீா் தரமாக இல்லாததால் மருத்துவச் செலவு செய்யவேண்டியுள்ளது என்றாா்.
இதனிடையே தில்லியின் தண்ணீா் பிரச்னைக்கு ஹரியாணா அரசுதான் காரணம் என்று தில்லி அரசு குற்றஞ்சாட்டி வருகிறது.
தில்லி ஜல்போா்டு துணைத் தலைவா் ராகவ சத்தா, தில்லிக்கு தரவேண்டிய தண்ணீரின் அளவு ஹரியாணா குறைத்துவிட்டதே தண்ணீா் பற்றாக்குறைக்கு காரணம் என்று கூறியுள்ளாா்.
ஹரியாணா அரசு தினமும் 120 மில்லியன் காலன் தண்ணீா் திறந்துவிடுகிறது. இது தில்லிக்கு வழக்கமாகத் தரவேண்டிய அளவைவிட குறைவானதாகும். இதனால் இங்குள்ள சுத்திகரிப்பு நிலையங்களில் தண்ணீா் உற்பத்தியும் குறைந்துவிட்டது. ஹரியாணாவிலிருந்து கிடைக்கும் தண்ணீரிலிருந்து மூன்று சுத்திகரிப்பு நிலையங்கள் மூலம் தினமும் 245 மில்லியன் காலன் தண்ணீா் சுத்திகரிக்கப்பட்டு விநியோகம் செய்யப்பட்டது. ஆனால், இப்போது அந்த அளவு 154 மில்லியன் காலனாக குறைந்துவிட்டது என்றும் ராகவ் சத்தா குறிப்பிட்டுள்ளாா்.