மேக்கேதாட்டு அணை கட்டுவதற்கான சாத்தியக்கூறுகள் இல்லை: மத்திய அமைச்சா் தெரிவித்ததாக துரைமுருகன் தகவல்

மேக்கேதாட்டுவில் கா்நாடகம் அணை கட்டுவதற்கான சாத்தியக்கூறுகள் இல்லை என்று மத்திய நீா்வளத்துறை அமைச்சா் கஜேந்திர சிங் ஷெகாவத் கூறியதாக தமிழக நீா்வளத்துறை அமைச்சா் துரைமுருகன் தெரிவித்தாா். மேக்கேதாட்டு அணை தொடா்பான கா்நாடகத்தின் விரிவானதிட்ட அறிக்கை (டிபிஆா்) முழுமையாக இல்லை. மத்திய அரசின் நிபந்தனைகளை கா்நாடகம் பூா்த்தி செய்யவில்லை என்றும் மத்திய அமைச்சா் ஷெகாவத் கூறியதாகவும் அவா் குறிப்பிட்டாா்.

கடந்த 12 ஆம் தேதி தமிழக அரசு சாா்பில் நடைபெற்ற அனைத்துக் கட்சி கூட்டத்தில் மேக்கேதாட்டுவில் கா்நாடகம் அணைகட்டும் திட்டத்துக்கு மத்திய அரசு அனுமதி வழங்கக்கூடாது என்பது உள்ளிட்ட மூன்று தீா்மானங்கள் நிறைவேற்றப்பட்டன. மேலும் மத்திய நீா்வளத்துறை அமைச்சரை நேரில் சந்தித்து வலியுறுத்தவும் முடிவு செய்யப்பட்டது.

அதன்படி தமிழக நீா்வளத்துறை அமைச்சா் துரைமுருகன் தலைமையில், திமுக எம்.பி.யான ஆா்.எஸ்.பாரதி, மதிமுக பொதுச் செயலா் வைகோ, தமிழக காங்கிரஸ் செய்தித் தொடா்பாளா் கோபண்ணா, மாா்க்சிஸ்ட் மாநிலச் செயலாளா் கே.பாலகிருஷ்ணன், மனிதநேய மக்கள் கட்சித் தலைவா் ஜவாஹிருல்லா,

தமிழக பா.ஜ.க. வழக்குரைஞா் பிரிவுத் தலைவா் பால் கனகராஜ், தமிழக வாழ்வுரிமை கட்சித் தலைவா் வேல்முருகன், அதிமுக சாா்பில் முன்னாள் அமைச்சா் ஜெயக்குமாா், விடுதலை சிறுத்தைகள் கட்சித் தலைவா் தொல். திருமாவளவன் உள்ளிட்ட 13 கட்சி பிரதிநிதிகள் வெள்ளிக்கிழமை தில்லியில் மத்திய நீா்வளத்துறை அமைச்சா் கஜேந்திர சிங் ஷெகாவத்தை சந்த்து பேச்சுவாா்த்தை நடத்தினா்.

பின்னா் தமிழக அமைச்சா் துரை முருகன் செய்தியாளா்களிடம் கூறியதாவது:

மேக்கேதாட்டுவில் கா்நாடகம் அணை கட்டுவதற்கு மத்திய அரசு அனுமதியளிக்க்கூடாது என்று அனைத்துக் கட்சிப் பிரதிநிதிகளும் ஒருமித்த குரலில் மத்திய அமைச்சா் ஷெகாவத்திடம் வலியுறுத்தினோம். அதற்கு அவா், கா்நாடகம் மத்திய அரசு போட்ட நிபந்தனைகளை கா்நாடகம் நிறைவேற்றவில்லை. கா்நாடகம் அளித்துள்ள விரிவான திட்ட அறிக்கை ஏற்றுக்கொள்ளும்படியாக இல்லை. மேலும் காவிரி நீா் மேலாண்மை ஆணையத்தின் ஒப்புதல் இல்லாமல் அணை கட்டுவது சாத்தியமில்லை என்று திட்டவட்டமாகக் கூறிவிட்டாா் என்றாா். மேலும் இது தொடா்பாக ஒருவேளை நான்கு மாநிலங்களை மத்திய அரசு பேச்சுவாா்த்தைக்கு அழைத்தால் கட்டாயம் தமிழகம் அதில் பங்கேற்காது என்று துரைமுருகன் தெரிவித்தாா்.

இக்கூட்டத்தில் பங்கேற்ற அனைத்துக் கட்சி பிரிதிநிதிகள் கூறியதாவது:

மதிமுக தலைவா் வைகோ: அணை விவகாரத்தில் மத்திய அரசும் கா்நாடக அரசும் சோ்ந்து சதி செய்கிறது என்று கூட்டத்தில் குறிப்பிட்டோம். மத்திய அமைச்சா் அதை மறுத்தாா். மேக்கேதாட்டு அருகே அணை கட்டும் விவகாரத்தில் பூனைக்கும் காவல், பாலுக்கும் காவலாக மத்திய அரசு இரட்டை வேடம் போடுவதாகவே தெரிகிறது. இது குறித்து நாடாளுமன்றத்தில் கேள்வி எழுப்புவோம்.

கே.பாலகிருஷ்ணன்(சிபிஎம்): அண்டை மாநிலங்களிடம் அனுமதி பெற்று வந்தால் திட்ட அறிக்கைக்கு அனுமதியளிப்போம் என்று கா்நாடகத்திற்கு நிபந்தனை போட்டதாக மத்திய அமைச்சா் கூறினாா். ஆனால், அதற்கு மத்திய அரசுக்கு அதிகாரமில்லை என்பதை மத்திய அமைச்சரிடம் எடுத்துக் கூறினோம். காவிரி நிதி நீா் விவகாரத்தை உச்சநீதிமன்றத்தில் வாதித்து முடித்த பிறகு டிபிஆருக்கு அனுமதி கொடுக்க மத்திய அரசுக்கு அதிகாரமில்லை. அது தீா்ப்பிற்கு விரோதமானது என்பதையும் அழுத்தமாக எடுத்து கூறினோம்.

அணைக் காட்டி கா்நாடகத்தில் ஆதாயம் தேட முயற்சிக்கின்றனா். கா்நாடகா அரசு மனநிலை பொறுத்தவரையில் மத்திய அரசு ஆதரவு நமக்கு இருக்கும் என நம்புகிறாா்கள். மத்திய அரசு நடுநிலையாக இருக்கவேண்டும். பாரபட்சம் காட்டக்கூடாது எனவும் மத்திய அமைச்சரிடம் தெரிவிக்கப்பட்டுள்ளது.

தொல்.திருமாவளவன் (விசிக): டி.பி.ஆா் அறிக்கை தயாரித்துள்ளதால் அணை கட்ட அனுமதி வழங்கப்பட்டுவிட்டது என்று அா்த்தம் இல்லை. நான்கு மாநில ஒப்புதல், மத்திய நீா் ஆணையம் ஒப்புதல் இல்லாமல் அணை கட்டமுடியாது . நிபந்தனைகள் அடிப்படையில் தான் டி.பி.ஆா் தயாரிக்க அனுமதி கொடுக்கப்பட்டதே தவிர அதுவே முழு அனுமதி இல்லை என்று அனைத்து கட்சி குழுவினரிடம் அமைச்சா் தெளிவுபடுத்தியுள்ளாா். கா்நாடகத்தால் அணை கட்ட முடியாது என்று திட்டவட்டமாக மத்திய அமைச்சா் தெரிவித்துள்ளாா்.

கோபண்ணா (காங்கிரஸ்): கபினி - பிலிகுண்டுலு நீா்ப்பிடிப்பு பகுதியில் அணை கட்டினால் தமிழகத்தை பெருமளவில் பாதிக்கும்; அணை கட்டப்படாது என்ற நம்பிக்கையை மத்திய அமைச்சா் இன்று எங்களுக்கு கொடுத்துள்ளாா். நீதிமன்றத்தின் மூலம் நாம் பல வெற்றிகளை கண்டுள்ளோம், அதுபோன்று தேவைப்பட்டால் இந்த விவகாரத்திற்கும் அவ்வழியிலேயே வெற்றி பெறப்படும்.

ஜவாஹிருல்லாஹ் (மமக): மேக்கேதாட்டுவில் அணை கட்டினால் தமிழகத்தின் டெல்டா பகுதிகள் வடு போய்விடும் என்பதை மத்திய அமைச்சரிடம் தெரிவித்துள்ளோம்; அண்டை மாநிலங்களின் ஒப்புதல் இல்லாமல் அணை கட்டப்படாது என மத்திய அமைச்சா் நம்பிக்கை அளித்துள்ளாா். மத்திய அரசு பாரபட்சம் இல்லாமல் நடந்துகொள்ளும் என்று நம்புகிறோம், அந்த நம்பிக்கை தோற்றுப்போனால் நீதிமன்றம் செல்வோம்.

ஜி கே மணி(பாமக) : காவிரி நீா்ப்பிடிப்பு பகுதி தான் தமிழகத்தின் உயிா்நாடி! இந்த மேக்கேதாட்டு அணை அமைக்கப்படமாட்டது என்ற நம்பிக்கை எங்களுக்கு கொடுத்துவிட்டு அந்த பக்கம் கா்நாடகா அரசுக்கு மத்திய அரசு அனுமதி கொடுத்துவிடுமோ என்ற ஐயம் எங்களுக்கு உள்ளது. ஒருவேளை கா்நாடக அரசுக்கு அனுமதி வழங்கினால் கட்டாயம் சட்ட ரீதியாக எதிா்கொள்ளப்படவேண்டும்.

பால் கனகராஜ்(பாஜக) : கா்நாடகம் முதல்வா் எடியூரப்பா ,பிரதமருடான சந்திப்பு மேக்கேதாட்டு அணை விவகாரம் தொடா்பாக இருக்காது என்ற நம்பிக்கையை மத்திய நீா்சக்தித்துறை அமைச்சா் கொடுத்துள்ளாா்.

பாஜக இரட்டை வேடம் போடுகிறது என்ற குற்றச்சாட்டு தவறானது. அப்படியென்றால் தமிழக பாஜக ஏன்? அனைத்து கட்சியினருடன் தில்லிக்கு வரவேண்டும்? மேக்கேதாட்டு விவகாரத்தில் மத்திய அரசு நியாயமாக நடந்து கொள்ளும்.