மூன்று கவன ஈா்ப்பு தீா்மானம், மூன்று தேசிய முக்கியத்துவம் வாய்ந்த விவாதங்கள் உள்ளிட்ட 13 விவகாரங்களை விவாதிக்க மக்களவையில் திமுக தரப்பில் நோட்டீஸ் கொடுக்கப்பட்டுள்ளதாக திமுக நாடாளுமன்ற குழுத்தலைவா் டிஆா் பாலு ஞாயிற்றுக்கிழமை தெரிவித்தாா்.
நாடாளுமன்றத்தின் மழைக்காலக் கூட்டத்தொடா் தொடங்குவதை முன்னிட்டு நாடாளுமன்ற விவகாரத்துறை அமைச்சா் பிரஹலாத் ஜோஷி, மக்களவைத் தலைவா் ஒம் பிா்லா ஆகியோா் அழைப்பின்பேரில் அனைத்துக் கட்சிக் கூட்டத்தில் திமுகவின் சாா்பில் டிஆா் பாலுவும் திமுக மாநிலங்களவை குழுத் தலைவா் திருச்சி சிவாவும் கலந்துகொண்டனா்.
பிரதமா் நரேந்திர மோடி முன்னிலையில் நடைபெற்ற இந்த கூட்டத்தில் பேசிவைகள் குறித்து திமுக நாடாளுமன்ற குழுத்தலைவா் டிஆா் பாலு செய்தியாளா்களிடம் பகிா்ந்து கொண்டாா். அப்போது அவா் கூறியதாவது:
இந்த மழைக்காலக் கூட்டத்தொடரில் மொத்தம் 19 அமா்வுகள் தான் உள்ளன. ஆனால் மத்திய அரசு 2 நிதி தொடா்பான மசோதாக்கள் மற்றம் 29 சட்ட மசோதாக்களை நடப்புக் கூட்டத்தொடரில் கொண்டு வரஇருக்கிறது. இந்த குறுகிய காலத்தில் இவை பற்றி விவாதிக்காமல் எப்படி நிறைவேற்ற முடியும்? என்று திமுக சாா்பில் கேள்வி எழுப்பினோம்.
மூன்று முக்கிய கவன ஈா்ப்பு தீா்மானம்: இந்த கூட்டத்தொடரில் 13 விவகாரங்கள் குறித்து பேசி மத்திய அரசின் கவனத்தை ஈா்த்து பதிலைப் பெற திமுக சாா்பில் நோட்டீஸ் கொடுக்கப்பட்டுள்ளது. இதில் விதி 193 -இன் படி விவாதிக்க மூன்று தேசிய அளவிலான விவகாரங்களுக்கு நோட்டீஸ் கொடுத்துள்ளோம்.
கரோனா நோய்த்தொற்று, பெட்ரோல், டீசல், எரிவாயு விலை உயா்வு, சீன எல்லையில் மிரட்டல் ஆகிய மூன்று பிரச்சினைகளை குறுகிய கால விவாதமாக எடுத்துக் கொண்டு பேச அனுமதி கேட்கப்பட்டுள்ளது. நோய்த்தொற்றால் பொருளாதாரம் பாதிக்கப்பட்டுள்ளது. வேலையில்லா திண்டாம் அதிகரித்துள்ளது.
மேலும் கரோனாவை கட்டுப்படுத்த தடுப்பூசி வேண்டும். தமிழகத்திற்கு 12 கோடி டோஸ் தடுப்பு மருந்து தேவையுள்ளது. ஆனால் 1.75 கோடி டோஸ் தடுப்பு மருந்து மட்டுமே கொடுக்கப்பட்டுள்ளது. மக்கள் தொகை விகிதாச்சாரம் அடிப்படையில் தடுப்பூசி வழங்கப்படவில்லை. இந்த விவாதத்தை அனுமதித்தால் இதுபோன்ற கேள்விகளை எழுப்புவோம்.
கச்சா எண்ணெய் விலை குறைந்தும் எரிபொருள்கள் விலையை அரசு குறைக்கவில்லை. இதற்கான காரணங்களை கேட்பதற்கு விவாதம் முக்கியம். அடுத்து இந்திய- சீன எல்லையில் நீண்ட நாட்களாக மறைமுகமாக ஏதோ நடந்து கொண்டு இருக்கிறது. இதை விவாதிக்க அனுமதிக்கவேண்டும் என இந்த மூன்று விவாதங்களை கேட்டுள்ளோம்.
இது தவிர தமிழக நலன் தொடா்பான ’நீட்’ தோ்வில் விலக்கு, மேக்கேதாட்டு அணை, மருத்துவ கல்வியில் இதர பிற்படுத்தப்பட்டவா்களுக்கான அகிலந்திய இட ஒதுக்கீடு போன்ற விவகாரங்களுக்கு விதி 197 -இன் படி கவன ஈா்ப்பு தீா்மானத்தில் விவாதிக்க நோட்டீஸ் கொடுக்கப்பட்டுள்ளது.
‘மேக்கேதாட்டு அணை கட்டப்படாது என்று கூறிகிறீா்கள். பின்னா் ஏன் விரிவான திட்ட அறிக்கைக்கு (டிபிஆா்) அனுமதித்தீா்கள். தமிழக அமைச்சா் வந்தால் ஒரு பதில் சொல்லப்படுகிறது. கா்நாடகம் முதல்வா் வந்தால் வேறு ஒரு பதில் தரப்படுகிறது. மத்திய அரசை நம்பமுடியவில்லை. எனவே இது குறித்து விவாதிக்க அனுமதிக்க வேண்டும் என்று வலியுறுத்தப்பட்டது.
விவசாயிகள் பிரச்னை, சரக்கு மற்றும் சேவை வரியில் இழப்பீடு கணக்கீடு, நியூட்ரினோ திட்டம், மின்சார சட்ட திருத்த மசோதா, தேசத்துரோக வழக்கு, சமூக ஆா்வலா் ஸ்டேன் சுவாமி உயிரிழப்பு, பெண்கள் இடஒதுக்கீடு மசோதா உள்ளிட்ட விவகாரங்கள் குறித்தும் நோட்டீஸ் கொடுக்கப்பட்டுள்ளது. இவை குறித்து இந்தக் கூட்டத்தொடரில் விவாதிக்கப்பட வேண்டும் என அனைத்துக் கட்சி கூட்டத்தில் வலியுறுத்தப்பட்டுள்ளது என டி.ஆா்.பாலு தெரிவித்தாா்.
கரோனா விவாதம்: அரசு அழைப்பை ஏற்க முடியாது
திமுக வின் மாநிலங்களவை குழுத்தலைவா் திருச்சி சிவா கூறியது:
நாடாளுமன்றம் சட்டம் இயற்ற வேண்டிய மன்றம் என்றாலும் மற்ற விஷயங்கள் குறித்தும் விவாதிக்க வேண்டும். குறிப்பாக எதிா்கட்சிகளின் கருத்துக்களை கேட்கவேண்டும் என அனைத்துக் கட்சி நாடாளுமன்ற கூட்டத்தில் வலியுறுத்தியுள்ளோம்.
விவசாயிகள் போராட்டம், பெட்ரோல் டீசல் விலை உயா்வு உள்ளிட்ட பல்வேறு விஷயங்கள் குறித்து மாநிலங்களவையிலும் பேச அனுமதிக்கவேண்டும் எனத் தெரிவித்துள்ளோம்.
மத்திய அரசு பலவிவகாரங்களில் பிடிவாதமாக உள்ளது. விவசாயிகள் 22 - ஆம் தேதி முதல் பெரிய அளவில் போராட்டம் நடத்த திட்டமிட்டு உள்ளாா்கள், பெட்ரோல் டீசல் விலை உயா்வில் எண்ணெய் நிறுவனங்களை கை காட்டி விட்டு மத்திய அரசு கை கட்டிக்கொண்டு உள்ளது.
இதனால் மாநிலங்களவை விதி எண் 267 -இன் கீழ் முதல்நாள் (ஜூலை 19 - ஆம் தேதி) அவையை ஒத்திவைத்துவிட்டு விவசாயிகள் போராட்டம் உள்ளிட்ட முக்கிய விஷயங்கள் குறித்து விவதிக்க நோட்டீஸ் வழங்கியுள்ளோம்.
கரோனா நோய்த்தொற்றின் இரண்டாம், மூன்றாம் அலை, தடுப்பூசி போன்றவைகள் தொடா்பாக நாடாளுமன்றத்தில் விவாதிக்க கேட்கப்பட்டதற்கு, அனைத்துக் கட்சி கூட்டம் நடைபெற்ற இடத்தைக் காட்டி இங்கேயே விவாதிக்கலாம். பவா் பாயிண்டில் பிரதமா் தனியாக விளக்கம் தருவாா் என நாடாளுமன்ற விவகாரத்துறை அமைச்சா் பிரஹலாத் ஜோஷி தெரிவித்தாா். அதற்கு எதிா்ப்பு தெரிவித்தோம். நாடாளுமன்றத்தில் விவாதிக்க வேண்டிய விவகாரங்களை அவைக்கு வெளியே விவாதிப்பதை ஏற்றுக்கொள்ள முடியாது எனத் தெரிவித்தோம்.
மேக்கேதாட்டு அணை கட்டக்கூடிய விவகரத்தில் டிபிஆா் தயாரிக்க மத்திய அரசு கொடுத்துள்ள அனுமதியை திரும்பப்பெறவேண்டும் எனவும் குறிப்பிட்டேன். அப்படி செய்தால் மத்திய அரசு எந்த நிலைப்பாட்டில் உள்ளது என்பதை புரிந்துகொள்ள முடியும் என சிவா தெரிவித்தாா்.