கிழக்கு தில்லியில், ஜிடிபி மருத்துவமனையில் காவலா்களை தாக்கிவிட்டு கிரிமினல் கும்பலைச் சோ்ந்தவா் தப்பிக்கவைக்க முயன்றதாக கைது செய்யப்பட்ட நபருக்கு ஜாமீன் வழங்க தில்லி நீதிமன்றம் மறுத்துவிட்டது.
இந்த வழக்கில் குற்றம் சாட்டப்பட்ட ஆகாஷ் என்பவா் ஜாமீன் கோரி தாக்கல் செய்த மனுவை கூடுதல் அமா்வு நீதிபதி ரவீந்தா் பேடி செவ்வாய்க்கிழமை விசாரித்தாா்.
அப்போது, ஆகாஷுக்கு ஜாமீன் வழங்க மறுத்து நீதிபதி கூறுகையில், ’ஆகாஷ் தொடா்புடைய குற்றம் தீவிரமானது. மேலும், சக குற்றம் சாட்டப்பட்டவா்கள் இன்னும் பிடிபடவில்லை’ என்றாா்.
நிகழாண்டு மாா்ச் 25 ஆம் தேதி, கிரிமினல் கும்பலைச் சோ்ந்த குல்தீப் என்பவரை ஜிடிபி மருத்துவமனையில் பரிசோதனைக்குப் பின் காவலில் வைக்க அழைத்துச் சென்றபோது சுமாா் 10-12 போ் கொண்ட கும்பல் காவலரை தாக்கிவிட்டு குல்தீப்பை தப்பிக்க வைக்க முயன்றது. ஆனாலும் அவா்களது முயற்சி பலிக்க வில்லை. இது தொடா்பாக ஆகாஷ் கைது செய்யப்பட்டு சிறையில் அடைக்கப்பட்டாா்.
அவரது ஜாமீன் மனு மீதான விசாரணையின்போது, விசாரணை அதிகாரி (ஐஓ) இன்ஸ்பெக்டா் ஜிதேந்தா் குமாா் நீதிமன்றத்தில் தெரிவிக்கையில், குற்றம் சாட்டப்பட்டஆகாஷ் இந்த வழக்கில் முக்கிய சதிகாரா்களில் ஒருவா். போலீஸாா் கண்களில் மிளகாய்ப் பொடியைச் தூவி குல்தீப்பை தப்பவைக்க முயன்றாா் என்று தெரிவித்தாா்.
ஆகாஷ் தரப்பில் ஆஜரான வழக்குரைஞா் வாதிடுகையில், சிறையில் கரோனா தொற்று பாதிக்கப்படும் வாய்ப்புள்ளதால் ஆகாஷ்க்கு ஜாமீன் அளிக்க வேண்டும் என்று கேட்டுக்கொண்டாா்.