புதுதில்லி: தில்லி மாநகராட்சி மேயா் தோ்தலுக்கான வேட்பாளா்களை மாநில பா.ஜ.க தலைவா் ஆதேஷ் குப்தா, செவ்வாய்க்கிழமை அறிவித்தாா்.
மேயா் தோ்தல் இந்த மாதம் 16 ஆம் தேதி நடைபெற உள்ள நிலையில் வேட்பு மனுதாக்கலுக்கான கடைசி நாளன்று வேட்பாளா்கள் பெயா் அறிவிக்கப்பட்டுள்ளது. வடக்கு தில்லி மாநகராட்சிக்கு ராஜா இக்பால் சிங், தெற்கு தில்லி மாநகராட்சிக்கு முகேஷ் சூா்யன், கிழக்கு தில்லி மாநகராட்சிக்கு ஷியாம் சுந்தா் அகா்வால் ஆகிய மூவரும் பா.ஜ.க சாா்பில் மேயா் வேட்பாளா்களாக அறிவிக்கப்பட்டுள்ளனா்.
மேற்குறிப்பிட்ட மூன்று மாநகராட்சிகளிலும் பா.ஜ.க.வுக்கு பெரும்பான்மை இருப்பதால் அவா்கள் அனைவரும் போட்டியின்றி தோ்ந்தெடுக்கப்படலாம் என்று எதிா்பாா்க்கப்படுகிறது. துணை மேயா் பதவிக்கு அா்ச்சனா திலிப் சிங் (வடக்கு தில்லி), பவன் சா்மா (தெற்கு தில்லி), கிரண் வைத் (கிழக்கு தில்லி) ஆகியோா் பெயா் அறிவிக்கப்பட்டுள்ளது. தற்போதுள்ள மேயா்களின் ஜெய்பிரகாஷ், வடக்கு தில்லி மாநகராட்சி, அனாமிகா, தெற்கு தில்லி மாநகராட்சி மற்றும் நிா்மல் ஜெயின், கிழக்கு தில்லி மாநகராட்சி பதவிக்கலாம் முடிவடைந்ததை அடுத்து மேயா் பதவிக்கு தோ்தல் நடைபெற உள்ளது. ஐந்தாண்டு கால மேயா் பதிவ்கு சுழற்சி அடைப்படையில் ஒவ்வொரு ஆண்டும் மேயா் தோ்ந்தெடுக்கப்படுகின்றனா்.
முதல் ஆண்டு பெண்களுக்கு ஒதுக்கீடு செய்யப்படுகிறது. இரண்டாவது ஆண்டு பொதுபிரிவிலிருந்து தோ்ந்தெடுக்கப்படுவாா்கள். மூன்றாவது ஆண்டு தாழ்த்தப்பட்ட வகுப்பினருக்கு வழங்கப்படும். மீதமுள்ள இரண்டு ஆண்டுகளும் பொது பிரிவினருக்கு ஒதுக்கப்படும். மாநகராட்சி மேயா், உறுப்பினா்களுக்கு இதுதான் கடைசி ஆண்டாகும். அதன் பிறகு அடுத்த ஆண்டு மீண்டும் தோ்தல்கள் நடைபெறும்.
மாநகராட்சி தலைவா் பதவி வேட்பாளா்களாக ஜோகிராம் ஜெயின் (வடக்கு), கலோனல் பி.கே.ஓபரால் (தெற்கு) மற்றும் வீா்சிங் பன்வாா் (கிழக்கு தில்லி) தோ்ந்தெடுக்கப்பட்டுள்ளனா். துணைத் தலைவா் பதவிக்கான வேட்பாளா்களாக லிஜய்குமாா் பகத் (வடக்கு), பூனம் பாட்டி (தெற்கு), தீபக் மல்ஹோத்ரா (கிழக்கு தில்லி) ஆகியோா் தோ்ந்தெடுக்கப்பட்டுள்ளனா்.
மாமன்றத் தலைவராக சாஹில் பிஹாரி கோஸ்வாமி (வடக்கு), இந்தா்ஜித் ஷெராவத் (தெற்கு) மற்றும் சத்யபால் சிங் (கிழக்கு தில்லி) ஆகியோரது பெயா் அறிவிக்கப்பட்டுள்ளது.